Səhraların da dərdi var
Səhraların da dərdi var,
Aparır külək qumları.
Dözmür qumun gedişinə,
Qalır yaddaşda anları.
Gedənlərin apardığı
Cahan boyda bir ümmandır.
Gözü yaşlı qalan bizik,
Qalan bizə, bil, gümandır.
Yollar var ki, yolçusuyuq,
Dərk etmir, hələ gedirik.
Yaxşı-yaman da bilmirik,
Gülə-gülə tərs edirik.
Sonu olmayan yoldur ki,
Bəxt aparır, gedir hələ.
Tanrı yazan yazıdır ki,
Özü bilmir nə vaxt ölə.
Hisslərim tufan qopardı
Qürbət eldə çox yaşadım,
Yıxdı qəribçilik məni.
Vətənimin aşiqiyəm,
Saçlarımın artdı dəni.
Hisslərim tufan qopardı,
Apardı uzaq səfərə.
Qərib adamları gördüm,
Qayıtdım o bir nəfərə.
Bağlıyam elə-obaya,
Şirinim-acım ordadır.
Axtarsam qəmi, həsrəti,
Vətənimdən kənardadır.
Vətən adlı zirvədəyəm,
Bundan böyük qürur olmaz.
Vətənsizin göz yaşını
Axıtsan dəryalar dolmaz.
***
Quru bir cism olsam da,
Ruhumda can-can gəzirəm.
Düşünəndə şəfa yerin,
Yalnız qalır, dərd əzirəm.
Açıram əlimi, Allah,
Səndən nicat istəyirəm.
Canıma can olanları
Dərgahına səsləyirəm.
Aləmlərin sahibi Sən,
Sənsən bizi biz eyləyən.
Sənsən doğru yola çəkib
Haqqımızı üz eləyən...
Ruzidə payı var
Çəkirəm hər səhər
bəxtsiz dərdini.
Tale yazısıdır,
Alır qəmini.
Doğulan cisminin
Günahı nədir?!
Ruhu əsir qalır,
Demir ki, bəsdir.
Yaradan yaradıb,
Biz nəkarəyik.
Anlayın, deyin ki,
Fəqir, nökərik.
Ruzidə payı var,
Çatdırmaq olar.
Etsək insanlığı,
Savabı qalar.
Allah sevgisi
Xoşbəxtlik danışmaq, gülmək deyil ki,
Allah sevgisindən doğan bir eşqdir.
İnsanın ömrünü ömür eyləyən
Əbədi açılmaz düyün, sirr eşqdir.
Çatmaz ki ərşinə hər bəndə ruhu,
İmanı, təqvası, nizamda ola.
Haramı, halalı eyni bilənlər
Gərək min yuyula, min qüsl ala.
Hidayət yolçusu olmayan kəslər,
Ağıllı zənn edər, özün hər zaman.
Alimə, arifə rişxənd edərək,
Görürsən heç kəsə verməyir aman.
Tale yazısı
Yolum üstə bitən gördüm,
Bənövşəni, yasəməni.
Boynu bükük qalan güllər,
Həyat qocaldacaq məni.
Hardan biləydim axı mən,
Siz də bəxtdən küsmüsünüz.
Taleyə bax, qismətə bax,
Yolum üstə əsmisiniz.
Xətrinizə kim dəydi ki,
Ayrıldız ayrı düşdünüz.
Ümidini üzməyənlər,
Ağıllı bir iş gördünüz.
Təbiətin sehridir
Darıxır ruhum kimi: -
Tökülən sarı yarpaq.
Payızı yaman sevir
Sevdiyim ulu torpaq.
Təbiətin sehridir,
Ayırıb fəsillərə.
Yetişdirir ağacı
Gələcək nəsillərə.
Möcüzələr baş verir,
Adam heyrətə gəlir.
Ömrünə az qalanlar
Torpağın üstə ölür.
Belə yazır taleyi
Yaradan hər insana.
Cismə əzab verəni
Alar torpaq canına.
© Müəllif hüquqları qorunur! Mətndən istifadə etdikdə istinad mütləqdir!
