Səcdədir hər handa
bir büt görsəm ayinim mənim...
Məhəmməd Füzuli
Ən əzəl - sözdü...
Və derlər ən əzəl söz kimisən!
Heyrət, ey büt!
Ey bütüm! Heyrət sənə! Heyrət sənə!
Sözdü derlər söz əzəldi...
Sən əzəl söz kimisən!
Bir sözüm yox,
nə deyim - İncilmi, ya Tövrat sənə?!
***
Hər neçə
söz vardı ki, kəlləmayallaq, tərsinə -
Dərs verib,
bir-bir çevirdim həpsini astarına!
Bu sirri
pünhan tutardım, bəs dedin rövşən qılım -
Mən də
qıydım sirrimi rövşənlərin aslanına!
Gər kəmənd atdım
səni bənd etməyə mən dərdmənd -
Bəndən oldum,
bənd olub döndüm sənin dustağına!
Bağlanıb
min-min nigari-ənbərinxət bəndinə -
Çevrildim
hər ləhzə yoxdan var sözün müştaqına!
Söz yükün batmandı, batman!
Duz yükündən yük tutub,
Ram olan
qəddimlə üz tutdum sənin duz dağına!
Hər sözün dastandı, dastan!
Dastanın sığmaz sənin -
Əttövbə
yüz Leylinin, yüz Məcnunun dastanına!
Göyə daş atmaq -
günahdır, göy üzü daş saxlamaz,
Günah eylər -
kəc baxıb, daş tullayan bostanına!
Yazmadı
Mahir bu mətni, bəs demə, ustad imiş,
Yazdı ki -
mahir desinlər Mahirin ustadına!
P.S.
Mən ki eynən
bu sayaq şövqlə göyündən keçirəm -
En ki, göydən,
sənə yetməz qanadım uçmaq ilən;
Hər neçə
yüksəyə uçsam, ətəyindən keçirəm -
Necə
xoşnuddu könül gər ayağın qucmaq ilən!
Heyrət, ey büt!
Sən idin, sən - gətirən vəcdə məni!
Kərəm et!
Bitməyə eşq - etməyə tərk səcdə məni!
Bütpərəstin...
Nədən imanı gərək mümkün ola?! -
Ya Məhəmməd!
Mədəd et, çəkmə üzü Həccə məni!
© Müəllif hüquqları qorunur! Mətndən istifadə etdikdə istinad mütləqdir!
