17 iyun, 2002-ci ildə Təbrizdə anadan olub. Humanitar elmlər fakültəsində təhsil alıb. O, 30 kitabın Güney Azərbaycanda əski əlifbada tərcüməçisi kimi tanınır. "Niyar karvanı", "Dəlilərin sevgisi" və yaxında nəşr ediləcək "Balıqsız dəniz" adlı romanların müəllifidir. "Cibimdə boğulan qız" adlı şeirlər kitabı 2020-ci ildə Bakıda çapa hazırlanıb.
Təbriz öz rəngində deyil
Yenə
Dönür vətənə,
34 il öncə
Torpağından
Sürgün düşənlərin
Oğulları,
Nəvələri,
Nəticələri...
Boz rəngində,
Ağ-qara aparatlarda
Görürəm onları.
Babalarını işğalda
Gördüyüm kimi...
Açıram xəritəni
Üzərinə masanın...
Axtarıram Qarabağı...
Düşüb adına qan,
Qan axıb
Aşırıb məftilləri
Axıb Təbrizə qədər
Araz Qırmızı Dənizinə bənzəyir.
Xəzərin nefti ilə
Qarabağdan axan qan
Qarışıb bir-birinə
Qarabağın rənginə bənzəmir
Bənzəyir qara bağrımın rənginə...
Xəritəni cırmağım gəlir,
Yenidən bir xəritə
Yenidən həyat
Yenidən vətən,
Yenidən dünya,
Dünyanı yenidən,
Yenidən
Yaratmağım gəlir...
Uzaqdan bir səs eşidirəm,
Yaxınlaşır...
Beynimin içində çalınır zəng.
Yuxudan ayılıram
Saymandır Bakıdan.
- Alo... Gecədən küçədəyik
Gözümüz aydın,
Qarabağ bizimdir...
Özümü atsam da küçəyə
Sevincimdən,
Bağırsam da belə
Küçəni,
Xiyabanı
Məhəlləni
Təbrizi
Ağ-qara görürəm
Köhnə aparatlardakı kimi...
© Müəllif hüquqları qorunur! Mətndən istifadə etdikdə istinad mütləqdir!
