Sən hər gülümsəyəndə
bütün ağaclar çiçək açır.
Yaxınlıqdakı o qoca, o çopur,
o zavallı küknar belə...
Dağılır həyatımın toranlığı
Gözümə işıq gəlir,
İçim isinir, oğlum.
Uşaqlığımdakı o balaca,
o qaradinməz qız belə gülümsəyir,
Xoşbəxt olur bir anlıq.
Üzündə təbəssüm donanda
Qəfildən külək qopur,
Ləçəyi tökülür çiçəklərin.
Yaxınlıqdakı o qoca, o çopur,
o zavallı küknar
Bir az da miskinləşir.
Bir az da tündləşir
Həyatımın toranlığı.
Gözlərimə qaranlıq çökür,
İçim qaralır, oğlum.
Uşaqlığımdakı o balaca,
o qaradinməz qız
bir az da tökür qaşqabağını.
Bütün həsrətlərin
canı cəhənnəm, oğlum,
Bütün uzaqlıqların.
Bu dünyada olmasam belə,
Sən hər gülümsəyəndə
Göylərdə qanad açacaq ruhum.
© Müəllif hüquqları qorunur! Mətndən istifadə etdikdə istinad mütləqdir!
