Ümid
1.
Ümid kiçik bir şam kimi
Görünər uzaqlardan,
Əlinin buzunu əritməsə də
Qəlbini buzlanmağa qoymaz...
2.
Biz
Axşamdan bişən yemək kimi
Ümidin bir azını
Məcburuq saxlamağa sabaha.
3.
Həyat qanadlarını açıb
Şığıyan qartaldısa
Ümid
Körpə-körpə quşların üstünü örtən
Yamyaşıl yarpaqdı.
Bir intiharın tarixçəsi
Siqnal səsi daş kimi düşüb
Şüşə kimi çilik-çilik edər fikirlərini
Anidən ayılar sərxoş adam
Ayılar xəyala getdiyi yolun ortasında
Ayılar ağrılarından, acılarından...
Bir az geriyə qaçar,
Bir az qabağa
Sürücü yazıq bilməz
Sağa qaçsın,
Sola qaçsın.
Heç bilmədiyi bir oyunun içində
Hara gedəcəyini bilmədən qalar...
Sərxoş adamın film kimi
gözünün önündən keçər yaşamadıqları
Qızının əlindən tutub dərsə aparmamağı,
Yoldaşının üzünə gülməməyi,
Oğlunun çiyninə əlini qoymamağı...
Əyləc səsi,
İçini qurd yemiş ağac kimi yerə yıxılan adam
Sıraya düzülər maşınlar
Tanımadıqları adamın cənazə namazına...
Kimin göz yaşıdı belə
Kimin göz yaşıdı belə
Bir evdə bir cüt gözdən çıxıb
Min evin damından axır
Min-min adamı isladır.
Kimin göz yaşıdı belə
Oğluna sarı açılan
İsti-isti güllələri
Bir damcısıyla soyudur.
Kimin göz yaşıdı belə
Sahibsiz əsgər məzarının
Qapqara mərmərdəki
Üzünü, gözünü yuyur.
Kimin göz yaşıdı belə...
© Müəllif hüquqları qorunur! Mətndən istifadə etdikdə istinad mütləqdir!
