***
Gedirik, qayıtmırıq, yol bizi ancaq irəliyə aparır
Yol bizi ancaq sabaha aparır,
Yol bizi ancaq itkiyə aparır...
Bir-birimizin içindən keçib gedirik
Bir-birimizdən keçib gedirik
Bu şəhərdən o şəhərə, bu ölkədən o ölkəyə
Bu ağrıdakı adamdan o ağrıdakı adama köçüb gedirik...
Allahın əzab verdiyi yerdən
Əzab vermədiyi yerə gedə bilmir adamlar.
Ağacların quruduğu yerlərdən
qurumadığı yerlərə
Çöllərin yandığı yerlərdən
Yanmadığı yerlərə.
Amma adamların axşam yatıb
Səhər oyanmadığı yerlərə gedirik hamımız...
***
Atamın məzar daşında əlimin həniri
Gözümün yaşı
Gülüşümdən bir damcı
Özümdən bir misqal.
Halbahal olmadığım yeganə yerdir atamın məzarı
Halbahal olmadığım yerdir
Orda bütün qəlbimlə bilirəm ki, mən ölüyəm,
Atam diridir...
***
Bir çiçək ləçəyinə öpüş qondurmaqdır qadın olmaq
Dodağını bir yarpağa toxundurmaq
Barmaqları nəğmə oxuya-oxuya çay dəmləmək
Dünyanı çək-çevir edə-edə çörək doğramaq,
Dadına baxmaq bəhanəsilə yeməkdən bir tikə oğurlamaqdır qadın olmaq.
Kim deyirsə ki, etməmişəm - yalandır.
***
Bilirsənmi indi ən çox nəyə baxıram dincliyin içində -
Küləyin vərəqlədiyi kitaba.
Nədir qəlbimi sakitliyə qərq edən - küçənin səsi.
Ən çox harda döyünür ürəyim - əllərimin içində, barmaqlarımın ucunda
Ən çox nə kədərləndirir məni - anamın xatirəsi.
Sən məni xatırlayanda bir insan gətirirsən gözlərinin qabağına
Ancaq
Ağac kimi quruyub
Ot kimi göyərmişəm dünyanın ortasında və bilirəm ki, buralarda
Bir daha sevgi yağışları yağmayacaq.
***
Bir budağın yuxusuyam
O yuxuda adam olur budaq
O yuxuda yeriyir budaq
Su içir, dua edir, kədərlənir, ağlayır, kiriyir budaq...
Ən yaxınlarını itirir
Ən uzaqlara dikilir gözləri
Ağacları sevir... sevir... sevir... - kökünə çəkir
Gəl ki, yuxudan oyanmaq istəmir budaq.
Bir quşun yuvası olur ürəyi
Kəpənək qanadı olur ürəyi
Çırpınır, çırpınır, çırpınır yazdan payıza - saralmağa, tökülməyə, qurumağa...
Onun yuxudan qayıdıb budaq olmağa vaxtı qalmır,
Mənim adam olmağa...
***
Bir qucaq Günəş işığı həmişə ordadır, üfüqdədir, Amina
Səhər də ordadır,
Axşam da ordadır
Heç kimə verilməyən bütün suallar da ordadır
Heç kimin vermədiyi cavablar da ordadır
Allah da ordadır, Amina,
Göndərdiyi kitablar da ordadır...
Mən əllərimi uzadıram üfüqə, dan yerinə, qürub yerinə
Bilirəm ki, qəlbini isidir Günəş işığı
Bilirəm ki, üzünü güldürür şəfəqlərin sehri.
Bilirəm ki, mən heç kiməm,
Adamlar üçün bir qucaq dua oğurlamışam,
Bilirəm ki, sən bunu yaxşı-yaxşı görürsən,
Bilirəm ki, sən qaranlıqda da Allahı görürsən, Amina.
© Müəllif hüquqları qorunur! Mətndən istifadə etdikdə istinad mütləqdir!
