Ər oğullar, əsgər oğullar
Gənclərimiz bu gün Qarabağda
igidlik göstərirlər.
Füzulidən bir dilim alov kimi keçdilər,
Cəbrayılda düşməni alaq kimi biçdilər.
Qubadlıda bulaqdan bir doyunca içdilər
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Torpağıma soxulub donuz kimi gavurlar,
Yağıların gözünü bircə-bircə ovurlar.
Laçından it qovurlar,
Şuşadan it qovurlar
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Sən yenə Bakıdasan,
Səngərdə yatır indi,
Bir ox kimi düşmənin gözünə batır indi,
Haray çəkən yurdların hayına çatır indi
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Koroğlunun nəvəsi qorxmaz bir qaşıq qandan,
Vətən qana susayır, onlar keçirlər candan.
Yağıların başına od tökürlər hər yandan
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Murovda dalğalanan bayrağa dirəkdilər,
Bu torpağın köksündə döyünən ürəkdilər.
Vətənə bax bu gün də, sabah da gərəkdilər
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Yurdumda at oynadan düşmənə qan uddurur,
Köç salıb Qarabağa düşmənə qan uddurur,
Biri yağı düşmənin beşinə qan uddurur
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Bu saat Xankəndidə xan davası çəkirlər,
Bu saat Xocalıda qan davası çəkirlər,
Bu saat Kəlbəcərdə can davası çəkirlər
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Hələ neçə şəhidin qanını alacaqlar,
Göyçədə, İrəvanda himnimi çalacaqlar.
Təbriz, Dərbənd, Borçalı - körpülər salacaqlar
Dünən sənin Bakıda öydüyün ər oğullar!
Hər biri yüz düşmənə dəyən əsgər oğullar!
Yağılara göz dağı, bizə səngər oğullar!
Düşmənin ağ bayrağı
Mənim torpağımda sən nə gəzirsən? -
Bu yurdun, yuvanın yiyəsi mənəm.
Gülləni sıxmağa sinə gəzirsən,
Vətənin qayası, daşıdı sinəm.
Səni yıxan qaya, büdrədən daş da
Qoluma güc verir, dizimə təpər.
Mənim adladığım hər addamaş da
Sənin qabağında çəpərdi, çəpər.
Mənim nəfəsimi duyub, bir baxın,
Ağaclar sevinir, daşlar sevinir.
Səsim qulağına dəyib, bir baxın,
Çıxıb yuvasından quşlar sevinir.
Gecənin bağrını yarır bir işıq,
Qolları açılmış yurdlar ulaşır.
Üçrəngli bayrağım göyə yaraşıq -
Üzü ona sarı qurdlar ulaşır.
Torpaq da canlandı can sürtən kimi,
Sən demə, kül altda sönməyib közü.
Oğul barmağıyla qan sürtən kimi
Qurumuş bulağın açıldı gözü.
Tutub hər bəndimi, hər gədiyimi,
Dağlar çox gözlədi davamı mənim.
Nərgizlər uzaqdan alıb iyimi,
Ciyərinə çəkdi havamı mənim.
Koroğlu nərəni zilə dəmləyir,
Yağı dabanına tüpürüb qaçır.
Qartallar zirvədə bala yemləyir,
Qarğalar izini süpürüb qaçır.
Mənim torpağımda sən nə gəzirsən,
Bu yurdun, yuvanın yiyəsi mənəm.
Gülləni sıxmağa sinə gəzirsən,
Vətənin qayası, daşıdı sinəm.
Mənim daşdan möhkəm sinəmə dəyib,
Üstünə qayıdar atdığın güllə.
Tez ol, yağı düşmən, "mən təslim" deyib,
Qaldır başın üstə ağ bayraq yellə!
O görünən dağlar
Durub babam kimi, papağı ağdı,
Qıraqdan baxanda elə bil dağdı.
Görün kimlər öldü, kimlər də sağdı,
O görünən dağlar bizim dağlardı,
Mənim canım dağlar, gözüm dağlardı!
Bir qardaş Qoşqardı, biri Murovdu,
Saçı-saqqalı da qırov-qırovdu.
Daha nə əsirdi, nə də girovdu,
O görünən dağlar bizim dağlardı,
Mənim canım dağlar, gözüm dağlardı!
Ordan Göyçəyə bax, Şahdağına bax,
Heyrətindən donmuş dodağına bax.
Evindən çıxmayan qonağına bax,
O görünən dağlar bizim dağlardı,
Mənim canım dağlar, gözüm dağlardı!
Böyük Kirs böyükdü, başı göydədi,
Adı Bala Kirsin yaşı göydədi.
Düşmənin başının daşı göydədi,
O görünən dağlar bizim dağlardı,
Mənim canım dağlar, gözüm dağlardı!
O dağın adına Keyti deyirlər,
Bu həsrət belini əydi deyirlər.
Ölüm ayrılıqdan yeydi deyirlər,
O görünən dağlar bizim dağlardı,
Mənim canım dağlar, gözüm dağlardı!
Durub babam kimi, papağı ağdı,
Qıraqdan baxanda elə bil dağdı.
Görün kimlər öldü, kimlər də sağdı,
O görünən dağlar bizim dağlardı,
Mənim canım dağlar, gözüm dağlardı!
Bu nə taxtıydı
Keçir ömrüm-günüm zülüm içində,
Közüm sönüb gedir külün içində.
Gülsüzəm bu qədər gülün içində,
Tanrım, yazdın mənə bu nə baxtıydı?!
İyləyir, çüyləyir, seçir bir ömrü,
Bir qurtum su kimi içir bir ömrü.
Yaşıl zəmi kimi biçir bir ömrü,
Tanrım, mən doğuldum bu nə vaxtıydı?!
Gələn yapışır ki, mənimlə gedək,
Qalır ayağımda nə qədər ödək.
Bir ayağı sınıq,
Biri də gödək,
Tanrım, verdin mənə bu nə taxtıydı?!
İndi getsəm
Bircə kəlmə sözüm varmı
Səhər-axşam öpüşdüyüm
Bulaqların dodağında?!
Hardan bilim izim varmı
Gündə yüz yol görüşdüyüm
Ağacların budağında?!
Oturanda uca taxtdı.
Yatanda da başım altda
Qu tükündən balınc qaya.
Xəbərsizəm neçə vaxtdı
Hərdən-hərdən duman qından
Sıyrılırmı qılınc qaya?!
Öpüb-öpüb doymadığım
Bənövşələr gözlərində
Əksimicə saxlayırmı?!
Solmağına qıymadığım
Mənsiz qalan nərgizlərin
Könlü qubar bağlayırmı?!
Açılardı incə-incə
Gözü könül bulağımın,
Dodağımdan söz yağardı.
Qulağımın dibindəcə
Quşlar qulaq asa-asa
Dəndiyinə söz yığardı.
Demirəm ha doyub gəldim,
Öpüb, qucub, yola saldı
Ürəyimə girən dağlar.
Ürəyimi qoyub gəldim,
İndi getsəm onu mənə
Qaytararmı görən dağlar?!
© Müəllif hüquqları qorunur! Mətndən istifadə etdikdə istinad mütləqdir!
