Bir zamanlar...
Əvvəl səni sevirdim,
Sonra həsrətini.
İndi nə sən varsan,
Nə də həsrətin.
Bircə bir vaxt
Getdiyimiz uzun yol var,
Hər gün məni aparır
Xatirələrimizgilə...
Nə qalacaq bizdən sonra
Yollar yola calanacaq
Saldığımız izdən sonra.
Yenə dağlar görünəcək
Göz işləyən düzdən sonra.
Şəhərləri kənd eləyib,
Şəkəri də qənd eləyib,
Sözü sözə bənd eləyib
Səs oluruq sözdən sonra.
Ay yaşayıb ömür sürən,
Bağlanacaq bəndin, bərən.
Xoş əməldən özgə, görən,
Nə qalacaq bizdən sonra?
Elnur, bir az danış kəsə,
Gəlmir ilham, təb həvəsə.
Dünya dönür dar məhbəsə,
Yaşadınsa yüzdən sonra.
Nə gəzir
Günahı bol olanlara
Cənnət adlı yer nə gəzir?
Bu dünyadan o dünyaya
Aparmağa sirr nə gəzir?
Naşı baxıb həvəs eylər,
Qarğa bülbülü pəs eylər.
Boş qazan kimi səs eylər,
Yekə başda sər nə gəzir?
Hədəfik - gülləyə tuşuq,
Qanadı qırılmış quşuq.
Dənizləri qurutmuşuq,
Onda inci, dürr nə gəzir?
Dünya qədim mağaradır
Aran kəsibdir aranı,
Görünməyir, dağ haradır.
Köhnə şəkil kimi həyat
Elə bil ki ağ-qaradır.
At başını, torpaqda yat,
Ya da uçub göylərə çat.
İnsan canlı bir eksponat,
Dünya qədim mağaradır.
Qara günlər qaralıb bax,
Üzümüzə olubdur ağ.
Dünyaya gəlib yaşamaq
Toydan sonra nağaradır.
© Müəllif hüquqları qorunur! Mətndən istifadə etdikdə istinad mütləqdir!
