"Bircə ayağımın göz yaddaşı var..." - Şeirlər. Elvin İNTİQAMOĞLU

Anam bilmir

Uşaq vaxtı anam mənə

yemək yedizdirəndə

üstümə dağıdardım,

anam əsəbləşərdi...

İndi öz əllərimlə qəm yeyirəm,

yerə-göyə dağıdıram...

Anam bilmir!

Səkkiz martda

əlimdə gül

"Ana" şeiri oxuyardım...

İndi ona oxuduğum şeirləri

mən yazıram...

Anam bilmir!

Evə gec çıxardım, darıxdığından

qucaqlayıb qoxlayardı:

İndi üstümdən siqaret iyi gəlir...

Anam bilmir!

Yalan nəsə deyəndə mən

Allaha and içməyimi istəyərdi...

İndi anamın canına and içirəm...

Anam bilmir!

Müharibə olmasın

Olmasın müharibələr:

Şəhidlər xiyabanında

havaya yaylım atəşi

açılmasın...

Analar diz döyə-döyə

cansız oğullar gətirən

cənazənin qabağına

dizi üstə yıxılmasın...

Atalar ah çəkə-çəkə

Vətən sağ olsun deyərək

üçrəngli, aylı-ulduzlu

bayraqlara sarılmasın...

Kitablara, heykəllərə,

bulaqlara, şəkillərə

"Filankəs filan tarixdə

filan şəhərin uğrunda

Şəhid olub" yazılmasın...

Olmasın müharibələr:

Göyərçinin qanadları

qırılmasın...

Ölümümdən

bir gün qabaq...

Öləcəyim günü bilsəm,

ölümümdən bir gün qabaq

Allahın mənə verdiyi

illərə qurban kəsərəm -

Ömrümün qalan hissəsin

düz tən ortadan kəsərəm...

Elə özüm düzəldərəm

divardakı öz şəklimi:

qoymaram qızım şəklimin

tozun göz yaşıyla silə,

qoymaram oğlum şəklimin

çərçivəsin hazırlaya -

İstəmirəm qızım məni

toz izindən,

oğlum məni

çərçivədən xatırlaya...

Örtərəm kirpiklərimi,

gözüm öyrəşsin sabaha,

bəlkə də mən sabah bu vaxt

heç nə görməyəcəm daha...

Öləcəyim günü bilsəm,

ölümümdən bir gün qabaq

ölümdən şeir yazaram!

Atılan daşlar

Körpəliyin daşın atdım,

Daşa dəydi ayağım -

Onda bildim iməkləmək yaxşıdır yeriməkdən...

İstəməzdim böyüyüm -

Əgər anam bezməsəydi,

Körpəsinin arxasıyca oyuncaq sürüməkdən...

Uşaqlığın daşın atdım,

Getdi dəydi qonşu pəncərəsinə,

Şüşə oldu çilik-çilik...

Onda başa düşdüm kasıblıq nədi -

Atamın cibinin canı yox idi bir şüşəlik...

Daş atmağın daşın atdım,

Axır-əvvəl anladım ki, daşın düşən yeri var...

Hələ ki peşman deyiləm,

Allah bilir, subaylığın daşın atsam nə olar!?

Gəlmişəm

Nəfsimi boğmamış

boğulmuşam mən,

Dərd məni yormamış

yorulmuşam mən.

Fələk doğulmamış

doğulmuşam mən -

Ondan əvvəl saya-saya gəlmişəm...

Yer qatında

işıq saçan adamam,

Mən Günəşə

süfrə açan adamam -

Qışın soyuğundan

qaçan adamam,

Allah-Allah deyib yaya gəlmişəm...

Dünya daralmayıb,

yenə genişdi,

Həmin görkəm,

həmin o görünüşdü -

Çox tanış gəlir,

hə, yadıma düşdü,

Bir dəfə də doqquz aya gəlmişəm...

Kasıbın olanından

Dünən yazılanları

nöqtə, vergülünəcən

üzündən köçürürəm -

Bu gün də

Əlinin papağın Vəlinin başına,

Vəlinin papağın Əlinin başına

keçirirəm...

İşdən evə

bir tikə dərd aparıram

abrıma bükə-bükə -

Dar otaqda beş adamlıq ailə

dərd yeyir çəkə-çəkə...

Axşam qonaq gələcək:

anam plov dəmləyir

üç ay əvvəl aldığı düyünün qalanından;

nənəm mətbəxdən süfrəyə daşıyır

kasıbın olanından...

Üç parça

Kağız parçasında şeirlər gəzir,

Şeir sətir-sətir əsrlər gəzir -

Dilimdə bitməmiş sətirlər gəzir,

içimdə söz parçası var...

Qapqaradı ağıl dişi dərdimin,

Gözündən yaş gəlir kişi dərdimin -

Yavaş-yavaş yatır şişi dərdimin,

üstündə buz parçası var...

Bəxtimdən toz-duman çəkilmir hələ:

Yağış da yağmır, su da gəlmir hələ -

Küçəmizə gələn yar bilmir hələ

qolunda toz parçası var...

Xoş bəxt

Bəd bəxtlər yazan xoş bəxtə çatmayıb,

Nəzərində xoşbəxt adam tutmayıb -

Xoşbəxtlik evdən çıxıb qayıtmayıb:

Axtarırıq hər tərəfi,

tapılmır...

Bəxtimin üstünə atın qərənfil,

Ölümü qismətdi, cinayət deyil -

Lənətləyib kimsə məni elə bil:

Bəxtimin bəxti bağlanıb,

açılmır...

Qolumda qandal var, ürəyimdə yar,

Gözlərim kor olur, qulaqlarım kar,

Bircə ayağımın göz yaddaşı var:

Daşları üzdən tanıyır,

yıxılmır...

Məğlub ayrılmışam mübarizədən,

Çarxı fırla, təzə şans ver bizə də -

Fələk, götür zəri, başla təzədən:

Bayaq bəxtim gətirmədi,

sayılmır...

Qara günəş

(8+7)

Səhər qara pişik keçib

Günəşin qabağından -

Əlləşir, çıxa bilmir

ümidsizlik zolağından...

Yer qaradı, göy qaradı,

göz gözü görə bilmir -

İşıq dirəkləri də

ürək-dirək verə bilmir...

Günəşə həsrətlə baxır

Ömrümün cavanlığı -

İşığın yerin tapın,

söndürün bu qaranlığı...

Asılqan

Zəhər şirinləşib, ilan dəyişib,

saat soldan gedir, zaman dəyişib.

Aman Allah, dünya yaman dəyişib,

söyüd ağacından bəhər asılıb...

Dünyanı ovcunda sıxıb əyəsən,

səhvini üzünə bir-bir deyəsən.

Göydən yerə dərd tökülür, deyəsən,

ekvator xəttindən kədər asılıb...

Qürursuz çoxunun qürurun əzib,

arif olan ondan aralı gəzib.

Dünyanın axırıdır, dünyadan bezib

boğazından milyon nəfər asılıb...

Dünyanı alan alıb, satan satıb,

ona tabe olan arzuya çatıb.

Dünya çoxdan intihara əl atıb,

göyün dirəyindən kəmər asılıb...

Deyən yoxdu

Söz var qılınc gücündə də,

yanılmışıq seçimdə də -

Şairlərin içində də

düzü düzgün deyən yoxdu...

Tanrı, hanı qərar günü?

kölgəni sal, apar günü...

Hamı deyir "bazar günü" -

yeddinci gün deyən yoxdu...

Haqqa tutsan tay özünü,

göstərəcək sərt üzünü...

Yer qatının son sözünü

Göydən üstün deyən yoxdu!

Qadınsız şərab

İlk dəfə içdiyim şərab

ilk dəfə sevdiyim qadın qədər qalıb yadımda...

Xəyalımda üzbəüz durub əvvəlki qadınla,

indiki sərxoşluğum -

İçəndə doldururam

həyatımda olmayanın boşluğun...

Qadın sevgisinin mükəmməlliyin

gülüşündən anladım,

gözlərindən oxudum -

Bir qədəh də süzün mənə,

istəmirəm unudum...

Məndən sənə

aldığım qızılgülün solan ləçəyi qaldı,

Səndən mənə

bir şüşəlik xatirə -

O da qızılgülün ətri azaldıqca azaldı...

Nişanlı qız

Yolunu gözləməkdən

göz yorulub, bilirəm.

Yolun tən ortasına

daş qoyulub, bilirəm...

Üç il keçib aradan,

istəmədi Yaradan.

Mənim bəxtim anadan

gec doğulub, bilirəm...

Məni salma yadına,

getdin üzük badına.

Artıq gecdi, adına

ad qoşulub, bilirəm...

Bizdən başqa, sevənlər

xoşbəxt olub, bilirəm.

On dördüncü qızılgül

çoxdan solub bilirəm...