Şeirlər
Səni gözləmək...
Səni gözləmək qiyaməti gözləmək kimidir.
Ya həyat verəcək,
Ya ömür alacaqsan.
Səni sevmək odla oynamaq kimidir.
Ya gəlib isidəcək,
Ya gəlməyib yandıracaqsan.
Sənə toxunmaq ilğıma toxunmaq kimidir.
Ya toxunmayıb öləcəm,
Ya sən toxunub yox olacaqsan.
Sənə yar olmaq bütün dünyanı
gözündə öldürmək kimidir.
Ya mən sənə yar olacam,
ya sən mənə yar olacaqsan...
And olsun
And olsun sübhün
dan yeri sökülən çağına
"O"nun
altı günün içində yaratdıqlarına
Min illər boyu
yaşatdıqlarına
Və and olsun səcdəyə
alın qoyulan torpaqlarına
Dodağımda sübh duamsan,
Tanrımla pıçıltımsan...
Sən...
Darıxdım...
Gözümdə böyüyən saatda
Əqrəbləri nəfəsimlə
sən gələn vaxta çəkirəm yenə.
Nə vaxt gedir, nə sən gəlirsən,
Nə də insafa gəlirsən.
Nə tapıram bir aram
Nə də sən...
Eehhh... Darıxıram...
Gözümü yolda qoymaqdan
usanmırsan, yorulmursan...
Kaş vaxtı qırıb-dağıdam
Əqrəbləri özüm sancam
Əqrəb kimi
Boynu bükülü qalsın
Mənim kimi
Mənim gücüm sənə çatmır,
Yazıq əqrəblərə çatır...
Susdum
"Səndən ötrü burnumun ucu göynədi" -
deyəcəkdim, demədim.
Nə ölçüdə, nə həddə darıxmışam -
heç özüm də bilmədim...
Susdum -
Ən doğrusu susmaq idi.
Dodaqlarımı,
Kirpiklərimi -
Bir-birinə möhkəm sıxdım -
Ağlamadım...
Danışmadım...
Sözümü də, hissimi də
Ən doğrusu udmaq idi...
Günəşi ovsunlamış kəsəm...
Günəşi ovsunlamış kəsəm!
Ey bəni-adəm...
De, fikirlərinlə nəsən?
Sənə yüz il də bəsəm.
Bilirsən ki, möcüzəyəm.
Bir çıxış yolun varsa,
Əlbət, o da elə mən özüməm...
Səni sevirəm...
Səni sevirəm...
Minarədən buludlara qanadlanan azan haqqı...
Taleyimi yazan haqqı.
Bu dünyanın ədalətin
Ölçüb-biçən mizan haqqı.
Göy üzündə mələk varsa,
Yer üzündə fələk varsa
İki aləm arasında
O sərhədi cızan haqqı...
Səni sevirəm...
Minarədən buludlara qanadlanan azan haqqı...
Susarsan...
Birdən möhkəm darıxarsan
Gücün heç nəyə çatmaz.
Qışqırarsan,
Dəlidir deyərlər.
Ağlayarsan,
Kədərlidir deyərlər.
Susarsan,
Qərəzlidir deyərlər.
Anlamazlar...
Unudarsan,
Bax, bunu bacarmazsan,
Unutmarsan,
Udqunarsan...
Qoxusu, istisi yadına düşər
Susarsan
Susarsan
Susarsan...
Sən keçmiş kimisən...
Sən keçmiş kimisən
Əlçatmazsan, ünyetməzsən.
Bir az gələcək kimisən
Gəlib çıxa bilmirsən.
Gerçək ola bilmirsən.
Bir az yuxu kimisən
Oyanınca itirsən.
Mən də...
Mən də ki, zamanlar arasında
Yersiz-göysüz boşluqda
məhv olub gedən kəsəm...
Bat sevgimin dərininə
Bat sevgimin dərininə
Gözüyumulu,
Üzüqoyulu!
Eşq qoxulu -
Sevdaya bat.
Qorxma,
Mən ki varam.
Əllərini mənə uzat,
Burulğana ruhunu at.
Buruq-buruq saçlarıma -
Dolan, mənə ruhunu sat...
© Müəllif hüquqları qorunur! Mətndən istifadə etdikdə istinad mütləqdir!
