Şükür Əli (Əliyev) 1998-ci il oktyabrın 10-da Bakıda anadan olub. Əslən Cəbrayılın Balyand kəndindəndir. 2016-cı ildə Əsgər Veysəlov adına Sirik kənd tam orta məktəbini bitirib, elə həmin il Sumqayıt Dövlət Universitetinin İqtisadiyyat və idarəetmə fakültəsinin İqtisadiyyat ixtisasına qəbul olub. 2020-ci ildə isə magistratura pilləsi üzrə Sumqayıt Dövlət Universitetinin İqtisadiyyat və idarəetmə fakültəsinin Turizmin iqtisadiyyatı ixtisasına qəbul olub. Dünya Gənc Türk Yazarlar Birliyinin üzvüdür.
Paralel sevgi
Sənin öz dünyan var,
Öz zamanın.
Sən heç vaxt bu dünyada doğulmadın ki,
Heç vaxt zamanın bu tayında olmadın ki.
Görmədim heç vaxt səni,
Eşitmədim səsini,
Düşünə bilmədim düşündüklərini.
Varlığın hələ də isbat olunmayıb,
Adın yoxdu.
Hələ də fərziyyəsən,
Riyazi tənliksən, fizikasan, fəlsəfəsən
Hər nəsən
İsə
Sübut eləmək istəyirəm səni,
Sonra özümü.
***
Səhər-səhər adamlar
küçəyə çıxmamışdan qabaq
Ağaclar dünəndən yağan yağışın
yaratdığı gölməçələrə baxaraq
Sığal çəkir yarpaqlarına.
Həm də bu gün hava günəşlidi.
***
Nə yalandan başını qatım,
Boş-boş sevgi şeirləri ilə,
Bəzəkli sözlərlə?!
Sən də ki, bir dəfə oxuyub keçəsən.
Elə-belə yazmaq lazımdı,
Dağınıq filan.
Heç bilmirəm nə etmək lazımdı,
İlin-günün bu ayında.
Adam 22 yaşında nə etməlidi ki,
Allaha da, bəndəyə də xoş getsin?!
İlk dəfədi ki, 22 yaşım var,
Bəlkə də təcrübəsizəm,
Kimdən soruşuramsa, heç nə demir.
Yoxsa həqiqətən də bu yaş dövrü
Beləcə boş keçir?!
Əslində, elə də faciə deyil
İlin-günün bu ayında boş yaşamaq,
Mənim üçün hava xoşdu.
Amma ki, Allahdan ayıbdı, bəndədən ayıbdı.
***
Sular boğuldu, nəfəsi kəsildi havanın,
Keçən günlərin birində itirdim,
Ən yaxın dostumu, ən yaxın adamı.
Anasının ağ saçlarına büküldü cəsədi,
Uşaqlıqda qırdığımız budaqlardan
düzəltdik tabutunu.
Sağ olsun, yuvasını dağıtdığımız
qarışqalar gəldi köməyə.
Ən axırıncı şəkildə
necə də gülürdük ürəkdən,
İnsan nə ət parçasıymış, nə də torpaq,
İnsan kağız parçasıymış, əslində.
***
Tarix kitablarını vərəqlədim ötən gün,
Saç tellərini tapdım
Soyuq müharibənin dövrləri arasında.
***
Mənim ibtidai sevgilim!
Sənin daş ürəyində hələ də
ocaq kəşf olunmayıb,
Hələ də buz dövrüdü baxışlarında.
***
Bir gün dünya da
qabığını qırıb harasa gedəcək,
Bəlkə də içindən bir kəpənək çıxacaq
Bütün adamları qanadına yığıb harasa gedəcək,
Bəlkə də xoşbəxtliyə...
***
Göy üzündə bulud topası üzür,
Göyərtəsi ümid dolu.
Ulduzlara çatmaq üçün
Şimşəkləri avar kimi
İrəli-geri çəkir.
***
Mağaraya düşən işıq kimi,
Sükutuma düşdü səsin.
Yığdım bütün demədiklərimi,
Hördüm zəncir kimi,
Qalxıram qulaqlarına.
Balıq və balıqçı
Ömrümün hansısa günü itib elə bil,
Düşüb... düşüb yaddaşımdan haradasa.
Bəlkə də başım səni sevməyə qarışmışdı onda,
Ya da Bayıl üçün darıxanda
Bəlkə də avtobusda, metroda
Hara isə tələsəndə,
Çayxanaların birində,
Çəkiblər düşüncəmdən..
Bəlkə də dostlarımın biri,
Oğurlayıb gizlincə.
İtib hansısa gün... bilirəm
Yoxluğunu hiss edirəm həmin günün,
Nə oldusa ondan sonra oldu
Yoxsa bu qədər qaranlıq deyildi göy üzü
Və bir o qədər buludlu.
Mən də tək deyildim bu qədər.
Çox da olmasam bir azca ümidli,
Azca dərdli idim.
Hələ düşüncəmdə qara dəliklər
doğulmamışdı,
Gözlərim boşluğa bənzəmirdi.
Ömrümün hansısa günü,
Bəlkə də dəniz sahilində
Qumların içinə,
Ulduzlara baxanda,
Düşüb yaddaşımdan.
Bilmirəm ki,
Çoxdan onu küləklər qapıb,
Dalğalar dənizin altına çırpıb,
Bir balıq udub onu,
Sonra yad bir sahildə
Bir balıqçı tapıb o balığı,
Bircə gün uzun yaşamaq üçün,
Arzu tutub.
Sonra yaşayıb və unudub.
Dondurma şeiri
Bir az sən var idin
Zamanın tərkibində,
Bir az da mən.
Bir az sevgi,
Bir az da ayrılıq.
Ona görə dadı damağımda qalıb,
Uşaqlıqda yediyim dondurma kimidi,
- İndi ələ düşmür əvvəlki zamanın dadı.
***
Böyüdük boyumuz keçdi,
Atamızın boyunu.
Qırışdı əllərimiz,
Anamızın əli kimi.
Tapşırdıq uşaqlığımızı,
Qonşuluqdakı xalaya.
Çıxıb getdik
həkimə getmək adıyla.
Uzaqlara...
Böyüdük, böyüdük,
Ulduzlardan
Qara dəliklərə döndük.
***
İtirəm, yoxa çıxıram,
Yığan yoxdu sapa məni.
İtirəm, yoxa çıxıram,
Kim özündə tapar məni?
Dərd də, sevinc də eynidi,
Hər nə varsa tərəzidi.
Mənim alın yazılarım,
Tanrının barmaq izidi.
Ən qorxaq adam da mənəm,
Qaçıram, səndən qaçıram.
Ovcumu yerə buraxıb,
Mən öz əlimdən qaçıram.
Susuram daş-divar kimi,
Sarmaşıqların dil açır.
Əslində, yoxam, var kimi,
Bu sualları kim açır?
***
O uşağın arzusu,
Elə süd dişi boydadı,
Sevinci gündəlikdəki
Aldığı beşi boydadı.
Hələ bu vaxtın harası,
Qabaqdadır dərd sırası,
O uşağın diz yarası
Haqq dirənişi boydadı.
Yaşamaq öyrənir hələ
Sevincdir gözlərindəki,
Hə... hə bir də ki, bir də ki,
Sənin verdiyin o ümid
Onun günəşi boydadı.
Qırma uşağın ümidin,
Ağrısı hər şeydən iti,
Elə batar ürəyinə
Allahın işi boydadı.
© Müəllif hüquqları qorunur! Mətndən istifadə etdikdə istinad mütləqdir!
