"Bir igid tanıyıram, Ölməzlik qalasıdır..." - Şəhidlərə həsr olunmuş şeirlər - Elşad BARAT

Şəhid

Ənvərli Aqşinə

Bir igid tanıyıram,

Arzusu, kamı boyda.

Bir igid tanıyıram,

Özü vətən boydadır,

Məzarı hamı boyda.

Bir igid tanıyıram,

Ölməzlik qalasıdır.

Məqsədindən, yolundan

Dönməzlik qalasıdır.

Tanıyıram, o igid,

Dava leytenantıdı.

Yaralı əsgərlərin,

Müharibə həkimi,

Şəfa leytenantıdı.

Bir çiynində çantası,

Bir çiynində silahı,

Savaşda şəfa verən,

Müharibə allahı.

Səninlə fəxr edirik,

Ey müqəddəs ruh təbib.

Dağlardan uca təbib,

Çaylardan duru təbib.

Bizimləsən, dəyişmir

Şəhid dünyanı, qardaş.

Dayan, dayan, qoy baxım...

Barmağın hanı, qardaş?

Səndən öncə barmağın

Qarışıbdı vətənə.

Neçə güllə sığırmış,

Görəsən, bir bədənə?

Görəsən, kim böyükdü,

Zəfər axşamı boyda?

Özün vətən boydasan,

Məzarın hamı boyda.

Şəhid

Abakarov Nailə

O gecə, Günəşin də

Qəfil söndüyü gecə...

O gecə mələklərin

Yerə endiyi gecə.

O gecə yaddaşında,

Susub fəryad saxladı.

Küləklər uçdu getdi,

Quşlar qanad saxladı.

Bir xəbər bir atanın

Ürəyini geyinib,

Əynində aparırdı.

Bir ata ovucunda

Böyütdüyü balasın,

Çiynində aparırdı.

Aparırdı adamlar

Bir körpə beşiyini,

Bir ananın qəlbini,

Həyəti, bacasını,

Evini, eşiyini.

Bir qız boynunu büküb

Dayanmışdı kənarda.

Sevənlər ayrılanda

Alışar da, yanar da.

Yox, bu ayrılıq deyil,

Evinə dönməkdi bu...

Ana, vətən, qohumlar,

Dost, tanış, qardaş, bacı -

Hamını sevməkdir bu.

Şəhidlik əbədiyyət,

Sevilməkdi, sevməkdi.

Mələklərə qoşulmaq,

Günəşə can verməkdi.

Şəhid

Abasov Ağababaya

Yenə hava soyuqdu,

Külək adamı kəsir.

Axşamın xeyri, şəhid.

Haqqında oxuyuram,

Dilim, dodağım əsir.

Sən göylərdə mələksən,

Sən yerlərdə insansan?!

Sən beş ayın əsgəri,

Əbədi qəhrəmansan.

Anan da razı səndən,

Elin zəfər anası...

Tələbə anasıydı,

Sonra əsgər anası.

Sən sözünü tutmusan,

O ürəyi yanana,

İndi dediyin kimi,

Şəhid anası deyir,

Hamı sənin anana.

Yadındadır? Komandir

olanda sevinmişdin...

"Təşəkkürnamə"ni də

Alanda sevinmişdin.

Sevinəndə gördün ki,

Anan da şükür edir.

İndi bütün məmləkət

Qalxıb ayaq üstünə,

Sənə təşəkkür edir.

Sən də ki, yaşayırsan,

Özün dediyin kimi.

Məzarın da düzəlib

Sən istədiyin kimi.

Beləcə, arzuların,

Qoy, həmişə çin olsun.

Get, hava da soyuqdu,

Ananın yuxusunda

Yat, yuxun şirin olsun.

Şəhid

Abasov Ayaza

Şəhidlər harda olur,

Dünyanın harasında?

Məzarına baxıram

Məzarlar arasında.

Vətənin hər yerindən,

Şəhidliyin görünür.

Üzündə körpəliyin,

İgidliyin görünür.

Lap uzaqdan seçilir

Şəhidlərin başdaşı.

Məzarını bəzəyir

Bir atanın əl izi,

Bir ananın göz yaşı.

Göz yaşından məzarın

Çiçək açır, gül açır.

Elə bil şəhidlərin

Məzarı işıq saçır.

İşıq saçır şəhidlik

Zirvəsindən hər yana.

İşıq saçır Şuşadan

Bütün Azərbaycana.

Mən indi bilirəm ki,

Şəhidlərin məzarı

Ocağım, pirim imiş.

Vətən, millət, şəhidlik

Bir yazar kimi mənim,

Ən həssas yerim imiş.

Bəlkə yerim buradır,

Bu məzarın ayağı?

"Ruhum, yığış, gedirik"

İkimiz də aşağı.

Şəhid

Mayılov Bəxtiyara