Ləkə
Düz yolda
Əyri atılan addım.
Nöqsanlı adam,
İçini paxır yeyən,
həmişə böhtan deyən.
Qan ləkəsi də olur,
vicdan ləkəsi də.
Labüddür təhlükəsi də!
Uçuruma aparan yol,
əzabı bol, kədəri bol.
Paxılın qardaşı,
hədiyyəsi göz yaşı.
İnsanın bəlalı başı...
Səsin kökdən düşməsi
Səsim kökdən düşəndə,
itirirəm özümü,
itirirəm
dağa dırmaşdıran sözümü.
Duman bürüyüb üzümü,
Səsin kökdən düşməsi,
torpaq sürüşməsidi,
dilin kəkələməsidi.
insanın kədərlə yüklənməsidi,
danışıq havasının
ləkələnməsidi.
Səsin kökdən düşməsi
itirməkdi yönü.
Səs kökdən düşəndə,
deşilmir bəzisinin
qalın gönü.
Səs kökdən düşəndə,
nizamlana bilmir söhbət,
zirvəsini tapa bilmir,
sevgi, məhəbbət.
Səs kökdən düşəndə,
cəsarətin boynu bükülür,
düşmən gülür.
Bağlar viran olur,
meydanda görünür əsarət,
zirvəyə qalxa bilmir,
qayaları lərzəyə salan
od nəfəsli cəsarət!
Səsin kökdən düşməsi
insanın kökdən düşməsidi,
torpaq sürüşməsidi.
Düşünə bilsəydik
İkimiz də gileyliyik -
Sən məndən,
mən səndən.
Səbəb nədən?
Gileyin də heç birimizə
bu basabasda çatmır əli.
Sözünü deyir giley,
özünü deyir giley.
Məgər ikimizdə haqlıyıq?
Düzünü deyirik?
Biz ancaq
giley sözünü deyirik
hər ikimiz haqlıyıqsa,
bəs günahkar kimdir?
Heç kimdən almadan
güvə vurmuş narazılığı
gileylənirik bir-birimizdən,
razıyıq özümüzdən.
Nə qazana bilərik
bu gileydən?
Sən də narazı,
mən də gileyli.
Haqlı kimdi bəs?
fikirləşməyə dəyməz?!
Kitab tutdu əlimdən
Qaranlığa düşmüşdüm,
kitab tutdu əlimdən.
Kəkələnib dururdum,
titrəyirdi dodağım -
kitab tutdu əlimdən.
Kəsəkliydi yollarım,
qanadlarım yox idi.
Gücsüz idi qollarım,
Küləklər itələyir,
Günəş də ütüləyir,
itirmişdim özümü.
itirmişdim sözümü -
Kitab tutdu əlimdən.
Kitab tutdu əlimdən,
Günəş doğdu baxtıma
Kitabla yaşa doldum,
kitabla yaşıd oldum
həyatın şərbətini
kitab mənə içirtdi.
uçurum dərələrdən,
qorxulu zirvələrdən
kitab məni keçirtdi.
Mənə doğmadır kitab,
atam, anamdır kitab.
Qaranlıqlar önündə
ürək onsuz etməz tab.
Kitabdır həyatımız,
kitabdır kompasımız.
Böyük həyat yolları
kiçik kitabdan keçir.
Kitabdan qanad taxıb,
İnsanlar belə uçur.
Arxayın ol, çətində
kitab tutar əlindən...
Mənim dualarım
Allaha dualarım
xilas kəmərimdir.
Dələduz fikirlərimin,
ləçər nəfsimin,
dumanlı xəyallarımın,
qiybətə sürüşən dilimin,
halallığı poza biləcək
iştahlı əlimin,
qollarını bağlamışam,
biclik yollarını laxlatmışam.
Sıxmışam, axırına çıxmışam
fikrimin əyri baxan gözünü,
Dilimin dinc durmayan
böhtan dolu sözünü
susdurmuşam bu kəmərlə.
Dualarımla əl-ələ verib
çarpışıram
düzlük yolunda kədərlə.
Bu kəmərdir günahlarıma qarşı
silahım.
Vuruşuram qərəzlə,
məni yoldan çıxara biləcək
sağalmayan mərəzlə.
Bu kəmərin işığıdır
yollarıma boylanan sabahım.
Dua kəmərimlə
məhv edəcəyəm.
© Müəllif hüquqları qorunur! Mətndən istifadə etdikdə istinad mütləqdir!
