Sevginin rəngi - QIRMIZI - Xəyal Rzanın şeirləri

XƏYALDI

Solmuş üzün, ey nazlı pərim, de, bu nə haldı?

Çəkdin əlini, sevdiyin öz başına qaldı.

Üzdü səni min tənələr həsrət qucağında,

Bu dərd ilə ağlar saçına lövbəri saldı.

Güldü sənə göz yaşların, axdıqca gözündən,

Gözlər bu kədərlə qəm içində yenə daldı.

Hicrin nə cəfalar ilə pişvazıma çıxsa,

Hər dəm səni vəsf eyləyəcək bil ki, Xəyaldı.

QIRMIZI

Həsrət - qara rəngdədir,

Kədər - boz rəngdə...

Ümid - mavi rəng,

Nə qəribə ahəng?!

Sarı - qəribəlikdir...

Ağ - xoşbəxtlik...

Yaşıl - inamdır,

Qalx bir süfrə aç,

Şam yandır.

Sevginin rəngi - QIRMIZI,

darıxma,

Döyər qapımızı...

Mənim dƏrdim təkcə sənsən...

Sənin çəkdiyin dərd mənəm,

Çək sürü, başına dönüm.

Nə çəkim var, çətin gələm,

Tək sürü, başına dönüm!

Evin yolun itirmişəm,

Yolum haradı bimirəm...

Sağımda itlər ulaşır,

Solum haradı, bilmirəm.

Ürəyimdə "at yarışı",

Yuxum üzümə dirənib.

Varım yoxa çıxıb, vallah,

Yoxum üzümə dirənib.

Sınıq-sökük xatirələr,

İnan, ağladıb anamı.

Ana, sənə qurban olum,

Niyə doğdun bu adamı?!

Mənim dərdim təkcə sənsən?

Çəkərəm, başına dönüm!

İşimin adı nədi ki...

Bekaram, başına dönüm!

Təzə gəlin

Təzə gəlin, dünyanı

Vecinə alma belə.

Götür xəyallarını

Göz yaşınla ilmələ!

Ümidlər sınıq - sınıq,

Yapışdırmaq asanmı?

Taleyə qarşı çıxmaq

Söylə, yeni fasonmu?

Üşüyən vüsalının

Üstünü ört - isinsin.

Qabına xatirə çək,

Duyğuların sevinsin.

Axı sən də bilirsən,

Sevgi qəmlə doğulub.

Bir qəlbdə cücərəndə,

Başqa qəlbdə boğulub.

Sənə bir şeir yazdım,

Tut ucundan göyə çıx!

Yerə girmə sözümdən

Yer qaranlıq, göy açıq!

Susub

Gözümdə bir arzu susur,

Yanıb-alışmaq istəmir...

Dilimdə bir sevgi susur,

Dinib-danışmaq istəmir...

Əlimdə bir salam susur,

Küsüb... barışmaq istəmir...

Ürəyimdə ümid sönür...

Susub! Qarışmaq istəmir.

Qoy ölüm sevinsin

Qoy başını kədərin

Dizləri üstə...

Bir az mərhəmət istə,

bir az sevgi...

Çalış söz vermə ona,

Çalış dərdini açmasın.

De ki, yolunu ölçsün,

Boyunu ölçməsin.

Söylə ki, ürəyin dolu olsa da,

Dünya cibin kimi boşdu!

Çalış kədərləndirmə kədəri...

De ki, sənə elə onunla da xoşdu.

Bir az üzünü güldür...

Gülümsə kədərinə.

Guya ağlaşma qursan,

Nə gələcək əlinə?!

Bir layiqli ölüm istə...

Rastına çıxsa,

Düz-qoş etsin.

Sən sevinə bilmədin,

Qoy ölüm sevinsin!

Amma ucuz olsun!

Alınası çox şeyin var,

Hələ qisas da almalısan.

Satmağa heç nəyin olmasa da...

Heç vaxtın belə!

Neyləyək...

Baxtın belə!

Ümid oğruları

Əsəcək insafsız payız küləyi,

Səni budağımdan qoparacaqdır...

Sürüyüb ardınca ümidlərimi,

Qaranlıq dünyaya aparacaqdır!

Sənə oxşayacaq səndən olanlar,

Qoşulub küləyə, qaçacaq hamı...

Kimsəsiz görənlər, tənha görənlər

Yada salmayacaq bu bəxti kəmi..

İstidə kölgəmə sığınanlarım

Soyuqda qolumu sındıracaqlar...

Donacam, onlarsa qızınmaq üçün,

Məni acımadan yandıracaqlar..

Qocalıb düşəcəm əldən-ayaqdan,

Beləcə bir ömür ötüb keçəcək...

Yeni bir ümidim cücərən kimi,

Ümid oğruları onu biçəcək..

İTİRDİM

Bir qırıq sevinci tapıb,

Qəmi itirdim, itirdim.

Qəmimlə yükü bol olan,

Gəmi itirdim... itirdim.

Bəlkə də bir az zor idi,

Sığmırdım, dünya dar idi,

Yaxşıca dəmi var idi,

Dəmi itirdim, itirdim...

Qəlbimi qıran çox oldu,

Tost deyib, vuran, çox oldu,

Başımı yoran çox oldu,

Cəmi itirdim, itirdim.

Qəm daha yaxşıdı, yaxşı,

Budur dünyanın axışı,

Kimdi ömrümün naxışı,

Kimi itirdim?.. itirdim!

Eşqlə yağır

Bu payız yağan yağış

Sanki bir başqa yağır.

Süzülür göy üzündən

Bir qıza eşqlə yağır.

Qapını, pəncərəni

Döyəcləyir damcılar

Ürək də sözə baxmır -

Ara vermir sancılar.

Yağan sevgidir, nədir,

Yağan kədərdir, nədir?

Gözlərim çəpik çalır,

Ürəyimi titrədir

Buludlar qucaqlaşıb

Nəğmə deyir yağışla.

Kimi sevir buludlar,

Kimi sevir yağışlar?

Bu payız yağan yağış

Sanki bir başqa yağır.

Süzülür göy üzündən

Gör necə eşqlə yağır

Ay qapımı döyən qız

Ayaqlarım yerimir,

Səsə qaça bilmirəm.

Ay qapımı döyən qız,

Qapı aça bilmirəm.

Dayanmadan döyürsən,

Sanırsan ki, karam, kar.

Son gedən bərk bağlayıb,

Vallah odur günahkar.

Bu qapı taxta deyil,

Necəsə sındırasan.

Bu qapı qanan deyil,

Söz ilə qandırasan.

Könül qapısıdı bu,

Açılmaz hər döyənə.

İnan ki, bel bağlamır

Hər sevirəm deyənə.

Ayaqlarım yerimir,

Səsə qaça bilmirəm.

Daha döymə qapımı,

Gəlib, aça bilmirəm.

Xəyal RZA