.jpg)
Akif Səməd, başımızın
Daşı hardadı, hardadı?
Gözümüzün Allah deyən
Yaşı hardadı, hardadı?
Uçsun göylər üstümüzə,
Yetişməyin tüstümüzə!..
Hamı bilir, könlü təzə
Naşı hardadı, hardadı?..
Mənəm, odu o sən deyən -
Tamahından daşı yeyən...
Tanrının bizdən gəlməyən
Xoşu hardadı, hardadı?
Dilimə gəlin, dağ basın,
Əlimə gəlin, dağ basın,
Gətirin, ruhum ağlasın,
Nəşim hardadı, hardadı?!
Qərib Mehdiyə
Dağ kimi durub Gəncədə
Sözə həyan Qərib Mehdi...
Köhnə kişidi, qamətin
Düz saxlayan Qərib Mehdi...
Üzündən axan nura bax,
Dönür başına kürə - bax!
Heç görmədim qaraqabaq,
Gülən, deyən Qərib Mehdi!
Əlindədi sözün canı,
Könüldü, ruhdu ünvanı,
Qocaldıb qoca dünyanı
Qocalmayan Qərib Mehdi...
Barat Vüsala məktub
Sənin yerin ayrı, göyün ayrıdı,
Sənin ilin ayrı, ayın ayrıdı,
Sənin havan ayrı, suyun ayrıdı,
Belə havan, belə suyun mübarək!
Bülbül könül bircə dəfə gül demir,
Oda yanır, qor söyləmir, kül demir,
Sən deyəni ürək deyir, dil demir,
Möhkəm oxun, dəli yayın mübarək!
Yol gedirəm, mən yolları haçayam,
Əzəl gündən bir hikmətin acıyam...
Saçların hayqırır - dərviş saçıyam,
Dərviş adam, dərvişliyin mübarək!
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
