.jpg)
Qalib olacaqsan
"Atını" yəhərləyib,
Cilovunu taxıbdı.
Qalxanını qaldırıb,
Qılıncına baxıbdı.
Hazırlaşıb döyüşə
Bizim balaca Firus.
Deyir ki, nə istəyir
Bizdən koronavirus?
Babamı buraxmayır
Çıxsın elə-obaya.
Atam gedə bilməyir
Nə şənliyə, nə toya.
Novruz günü heç yanda
Tonqallar çatılmadı.
Nəmər üçün qapıdan
Heybələr atılmadı.
Nənəmin nağılında
Cindən, divdən deyilmir.
Nağıl bitir, almalar
Göydən düşüb yeyilmir.
Bağça, məktəb bağlıdır
Bu virusun üzündən.
Evdə qalıb çıxmırıq
Böyüklərin sözündən.
Baba deyir: - Ay Firus,
Gəl söz dinlə arada.
De, koronavirusla
Savaşassan harada?
O ki, gözlə görünmür,
Nə əjdaha, nə atdı.
Çox gizlicə yayılan
Bədheybət həşəratdı.
Əllərini sabunla
İlıq suda yuyarsan.
Salfet kağızlarıyla
Yaxşı qurulayarsan.
Sonra spirt məhlulla
Əllərini ovxala.
Otağının havasın
Həmişə təmiz saxla.
Həm bunları edəssən,
Həm evdə qalacaqsan.
Bu virusla döyüşdə
Sən qalib olacaqsan!
Araba
Yoldan çıxın:
- ba-ba-ba,
Yola çıxıb
araba.
Sürəti
at sürəti,
Sükanısa
cilovdu.
Cilovdan
bərk-bərk tutan
Od parçası
Bilovdu.
Bilov çəkir
yüyəni,
Boylanır
sağ-soluna.
Arabanı
döndərir
Bir an bostan
yoluna.
Bu yolla
gedə bilməz
Nə "Mersedes",
nə də "CİP".
Ancaq bizim
araba
Öz yolunu
düz seçib.
Neçə çuxur
gölməçə,
Qarşısına
çıxsa da,
Asanlıqla
adlayır,
Bu yollardan
araba.
Təkərlərin
Tak-tuku,
Səs salsa da
dörd yana,
Arabamız
yetişir,
Gözoxşayan
bostana.
Siqnal verir:
- ba-ba-ba
- Ay uşaqlar,
tez dərin,
Qovun, qarpız,
şamama.
Qovunlar
əzilər ha...
Bircə-bircə
bələyin
Arabada
samana.
...Tutan kimi
yükünü,
Yola çıxır
araba.
Siqnal verır:
- ba-ba-ba.
- Aparırıq
sovqatı,
Bağçada
uşaqlara!
Ulu dağların
Şiş qayaları
Göyləri qucar.
Zirvələrində
Qartallar uçar -
Sərt, əzəmətli
Ulu dağların
***
Gədiklərində
Dənər qar saxlar
Ətəklərində
Bulaqlar çağlar -
Dupduru, bumbuz
Sulu dağların
***
Öz donlarını
Buluddan seçər.
Qorxunc keçiddən,
Aşırımdan keçər -
Cığırı, izi,
Yolu dağların
***
Dağ laləsini
Külək qoxlayar.
Bal, armud dadın,
Ayı yoxlayar -
Barla, bəhərlə
Dolu dağların
***
Pələng nərəsi
Qəlblər dağlar.
Ceyranlar hürkər,
Cüyürlər ağlar -
Səngərə dönər
Kolu dağların.
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
