Tapmacalı şeirlər... - Sevda BƏXTİYAR

Uşaq poeziyası

***

Zolaqlı, qara, boz, ağ -

Bu, onların rəngidir.

O hansı heyvandır ki,

Evlərin pələngidir? (Pişik)

***

Yayda, qışda, payızda

Soyunmayır kürkünü.

Deyin görək o nədir

Çox sevir yerkökünü? (Dovşan)

***

Yoxdur əli, ayağı,

Vahiməlidir yaman.

Dişində zəhəri var,

Sancır adamı o an.

Qışda görünmür gözə,

Yay gəlsə çıxır üzə.

Sürünərək gəzir o,

Elə bil tələsir o. (İlan)

***

Torpaq altda yuvası,

Boyu da lap balaca.

Gah divara dırmaşır,

Gah gülə, gah ağaca.

Çəkisi bircə damcı,

Qaldırır ağır yükü.

Yaz gəlincə başlayır

Qış üçün tədarükü. (Qarışqa)

***

Yaz gələndə bitərəm

Çöldə, düzdə,çəməndə.

Çəhrayı ləçəklərim,

Gözəl ətrim var həm də.

İlkin çiçəkləyirəm

Yaz gələndə hər dəfə.

Dostlar məni toplayıb,

Dərib aparır evə. (Bənövşə)

***

Göydən asılıb qalıb,

İşıq saçıb, dayanır.

O nədir ki, el-aləm,

O işıqla oyanır? (Günəş)

***

Gecə düşəntək gəlir,

Gecəyə qonaq olur.

Elə bil göy üzündə

Göylərə çıraq olur.

Gah yumrudur, gah para,

Yoldaşdır ulduzlara. (Ay)

***

Təndirdə yapılanda

Ətri göyə yüksəlir.

Şah məclisi də olsa

Süfrəyə əvvəl gəlir. (Çörək)

***

Dünyanın hər sirrini

Toplayıb sinəsinə.

Elm, bilik və savad

Öyrənsən ondan, yenə

Qurtarmaz bildikləri.

Hər səhifəsi sehr,

Hər cümləsi bir hikmət.

Nədən danışdığımı

Yəqin anladın, əlbət?! (Kitab)