Elə payız gələni
Payız gəlib, günəşdən
Borc alıb sarı donu.
Küləklər gətiriblər
Qolları üstə onu.
Yarpaqlardan rəngbərəng
Çələngi var başında.
Dəcəlliyindən qalmır
O, hələ bu yaşında.
Almalardan boynunda
Yaqut boyunbağı var.
Atını oynatdığı
Bağçası var, bağı var.
Qızıl sapla işlənib
Yaylığının yeləni.
Əl-ayaq çəkilibdir
Elə payız gələni.
Xəzərim
Günəş çimir sularında,
Yuyur onu ləpələri.
Səma deyir ulduzlara:
- Xəzərimə səpələnin.
Səpələnin, mavi sular
Yırğalasın sizi gecə.
Buruqları gen sinəyə
Yaraşıqdır görün necə.
Sahilləri yuyan mavi
Dalğaların qırçını ağ.
Xəzri əsir, varaqlayır
Xəzərimi varaq-varaq.
Qağayılar sular üstə
Aram-aram enir-qalxır.
Günəş batır odlu şartək
Xəzərim ardınca baxır.
Ana dili
Mən dilimi əsrlərin sınağından
qorumuşam,
Mən dilimi yad ellərin qınağından
qorumuşam.
Qarabağım bu dilimlə əzizlənib,
Qara bağrım bu dilimlə təmizlənib.
Mənə əziz ana olub, dar günümdə
Mən dərdimi, kədərimi
bölüşmüşəm.
Mən sevgimi, qədərimi
bölüşmüşəm.
Mən dilimi yad gözlərdən qorumuşam,
Mən dilimi yad sözlərdən qorumuşam.
Nənəm onu ağısında,
alqışında gizlədibdir
Babam onu alnındakı
qırışında gizlədibdir.
Əsrlərin küləyindən, yağışından
sinəmizdə daldalanıb.
Yağıların qəzəb yağan baxışından
yağmalanıb.
Bir ocağın odunda da, külündə də
yaşayıb o
Yurdun ən pis günündə də yaşayıb o.
Şəhidinə "rəhmət" deyib
Düşməninə "lənət" deyib
Ana yurda cənnət deyib
yaşayıb o.
Hər qatında bir el dərdi,
Bir yurd dərdi gizləyib o.
Dözüb min bir əzaba da, ağrıya da,
acıya da
Sədaqətlə xoş günləri gözləyib o.
Baldan şirin, dağdan ağır.
Qılıncdan sərt, ana dilim.
Dosta alqış, yara sevgi,
Düşmənə dərd, ana dilim.
Vətən
Hamının vətəni var
Qaranın da, ağın da.
Hamı üçün xoş olar
Gəzsə vətən bağında.
Hər vətənin oğlu var,
Qızı var neçə-neçə.
Heç bir torpaq istəməz
Qoynundan yağı keçə.
İstəməz səmasından
Mərmilər yol eləyə.
Keçdiyi hər cığırda
Dəhşəti bol eləyə.
İstəyər çöllərində
Kəhər atlar çapılsın.
Təndirləri qalansın
Tər çörəklər yapılsın.
Hamının vətəni var
Qaranın da, ağın da.
Hamı üçün xoş olar
Gəzsə vətən bağında.
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
