EvdəQal kampaniyası çərçivəsində Bədii Tərcümə Mərkəzi və “Ədəbiyat qəzeti”nin Real TV-nin dəstəyi ilə təqdim etdiyi “Dünya şairləri Azərbaycan üçün şeir oxuyurlar!” layihəsi davam edir. Bu gün Özbəkistandan şair Fəxrəddin Nizam öz şeirini oxudu. Fəxrəddin Nizam yeni özbək şeirinin tanınmış simalarından, modernist özbək poeziyasının ən maraqlı imzalarındandır. Təqdim olunan şeiri Səlim Babullaoğlu tərcümə edib.
Fəxrəddin Nizamın müraciəti və şeiri.
Əziz azərbaycanlı dostlar!
Özbəkistanın paytaxtı Daşkənd şəhərindən sizə səmimi salamlarımı göndərirəm!
Sizə Azərbaycan telekanalları vasitəsi ilə müraciət etmək mənim üçün şərəfdir.
Dünyanın karantində olduğu bu günlərdə bütün azərbaycanlı qardaşlarıma möhkəm can sağlığı və səbr arzulayıram. Özünüzü və yaxınlarınızı qoruyun.
Bu çətin günlər keçəcək, inşAllah.
İndi icazənizlə baharla bağlı bir şeir oxuyum sizə.
Səmimiyyətlə, sizin Fəxrəddin Nizam.
Bahar
1.
Ağac-ağac çiçəklənir yenə boş bağlar,
Təpələrdə yaşıl axın, yamac səksənir.
Eşqlə sönür sinələrə çəkilən dağlar,
Son payızdan qalan dərdlər itir birbəbir.
Çəmənlərin yaşıl dişli otlu ağzında
Daşlara bax, əriyirlər nabat misalı,
Mismarları çıxarır bax, qanlı başından
Bahar həkim çarmıxdakı gözəl İsanın.
Yemliklərdir yenə əmir ana Günəşi,
İlan kimi qıvrılılırlar azca küləkdə.
Müflisləşib, amma durub mərdi-mərdanə
Ayaqyalın öz ətrini verən çiçək də.
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
