Yıxılmaq adamın işidi - Fikrət Qocanın yeni şeirləri

"Edebiyyatqazeti.az" xalq şairi Fikrət Qocanın yeni şeirlərini təqdim edir

Yıxılmaq adamın işidi

Kim ki sağlam kişidi,

Yıxmaq - yıxılmaq da

Onun işidi.

Kim deyirsə yıxılmaq ayıbdı,

Dünyada yıxılmayan adam olmayıbdı.

Yıxılıb qalxmayan,

Yıxılıb özünə yenidən baxmayan,

Yıxıldığını faciə sayan

İnsan qoymasın adın.

Ondan nə kişi olar, nə də qadın,

O hələ ağıla dolmamış uşaqdı,

Ya da Banan ölkəsində Padişahdı.

16.03.2017

Bahardı

İsti bahar yağışı yağır,

Elə yaxşı yağır,

Dərdim böyükdü,

Özümü saxlıya bilmirəm,

Amma ağlaya bilmirəm, -

Yağış peşman olar.

Zərif çiçəklər açır,

Gün altında güllər

Az qala kəpənək olub uçur.

Dərdim kirpiyimdə yağış olar,

Amma ağlaya bilmirəm

Çiçəklərin rəngi solar.

Yurdumda ən gözəl bayramdı,

İnsanlar hərəsi

Bir müqəddəs bayraqdı.

Allahım, ölüm haqdı,

Mənə dözüm ver, dərdim

Üzümdə bilinməsin.

Məni görüb heç kəsin üzündən

Təbəssüm silinməsin.

19.03.2017

Mələklər

Hərəmiz bir arzudan, diləkdən doğulduq,

Hərəmiz ağ qanadlı bir mələk olduq.

Kainatda ən müqəddəs musiqi

İnsan səsi idi.

Yürüyümüz ulduzlardan asılmış

Yer kürəsi idi.

Bildiyimiz iki söz vardı -

Ağlamaq, gülmək.

Mələk idik, ağ qanadlı mələk.

Atamız, anamız

qırdı qanadımızı.

Dəyişdirdi adımızı.

Kürəyimizə möhür vurdu.

Dedi: Mənimsən!

Dedim: Allah yaradan insanam.

Mənimsən - dedi - atam, anam:

- adın Fikrətdi, İvandı, Condu.

Dedim: - Hamımız Yer kürəsininik,

Həm də səninik.

Hamını bir Allah yaradıb

Hamı bir candı...

Hərəni bir ünvana bağladılar,

Hərəni bir zamana bağladılar.

Yığdılar millət-millət,

Mərtəbə-mərtəbə,

Təbə-təbə.

Dedilər, Allah birdi,

Amma hər kəsin ayrı dini olmalıdı,

Hər kəsin ayrı dili olmalıdı.

Bunu anlamaq üçün

Adam bir az dəli olmalıdı.

Ayrı-ayrı dinlərdə, dillərdə,

Günlərdə, illərdə, minillərdə,

Allahdan haqq, ədalət mərhəmət,

Məhəbbət diləyirik.

İnsandan insana

Mərhəmət dilənirik.

Hamı hər şeyi qanır,

Bəziləri hələ mələk olduğuna inanır.

Qananlar bir-birinin

Üzünə baxmağa utanır.

Hamımıza günəş yanır.

Yer kürəsi hələ ki,

Fırlanır, dolanır,

Dolandırır bizi,

Bizi, Yaradan özünə oxşadıb.

Hamı öz içində tənhadı, təkdi,

Hər kəs elə bilir hələ Mələkdi...

Sorğuya tut öz əllərini,

Araşdır əməllərini.

Unutma şeytan da bir mələkdi.

20.03.2017

Cavabsız suallar

Bu dünya belədi,

Hamını ələdi,

Kəpəyini kəpək elədi,

Ununu un.

Nəyə gərəkmiş bu oyun?

İçimdə bir yetim quzu mələdi:

"Bu dünya niyə belədi? Mən nə edim?"

Mən də baş açmadım,

Nə də baş götürüb qaçmadım,

Sənə nə öyrədim -

- dedim -

İcazə ver yolumu gedim.

24.03.2017

Güldü, güldü, gülünc oldu

Gülə bilməyənləri güldürür şərab,

Özünə gəlir, deyir-gülür.

O qədər güldürür gətirməyir tab,

Gülə-gülə girinc olur.

Axırda el içində gülünc olur.

25.03.2017

İnsana bu yaraşır

İtən, oğurlanan

Əlindən zorla alınan,

Hər şey

Adamı yandırır ey!

Dəyərindən çox yandırır!

Hərdən adamı yolundan dayandırır.

Güclülər özünü

Bu qorxunc yuxudan oyandırır.

Yolunu gedir,

Yaşamağa davam edir;

Dağlı-dərəli yolunu aşır.

İnsana da bu yaraşır,

Yaşa, canım, yaşa!

26.03.2017

İnsan

İnsanın başı bilikdi.

Ən yaxşı yol yoldaşı bilikdi -

- Amma yaxşı bilikdi.

İnsanın başı

Ömür yolunun işığıdı.

İnsanın ürəyi

Üzünün nuru, yaraşığıdı.

İnsanın qanadları əlləri,

Gözəl əməlləri.

Bütün yaranmışlar insan aşiqidi.

İnsan da aşiqdi öz yarına,

Fərqi yoxdu tox qarına,

Ya ac qarına.

Qarın adamı aparır qul bazarına.

27.03.2017

Məni üz-üzə qoyma

Oğlum dünyaya gələndən

Taleyim,

Sən məni apardığın

yolla gedirdim.

Özümü nə vaxtsa

Ondan ayrılmağa öyrədirdim.

Yoluma çıxan hər şeyə

şükür edirdim.

Taleyim, nə oldu sənə?

hər şey döndü tərsinə,

Birdən dönüb

ayrı hava çaldın.

O getdi, mən qaldım.

Həmişə deyərdin darıxma

dünya gəldi-gedərdi...

Niyə məni qoca vaxtımda

yoldan saxladın?

Boynuma yüklədin bu boyda dərdi?

Doğru deyirlər:

"Həmişə çəkən öküzü döyərlər".

Üstümə gəlir yer, göy...

Yaxşı döyürsən, döy!..

Amma sonuncu qırmancda,

damlada əl saxla!

Məni üz-üzə qoyma

Yaradanla, haqla, Allahla.

29.03.2017

Allah işidi

Haqsızlıqlar

Susanı dindirmək üçündür,

Dilini açmaq, deyindirmək üçündür.

İnsanı cin atına mindirmək üçündür.

Alçaqları qaldırmaq,

Yüksəkləri endirmək üçündür.

Həyata fərqli don

geyindirmək üçündür.

Hərdən lap çaşırsan

kim ağıllıdı, kim dəlidi.

Bu işə də gərək qarışmayaq

Bu da yaradanın

Bizə dərsidi,

öz əməlidi,

Bütün bu düzənləri pozan,

Pozulanları düzən

Onun görünməz əlidi.

O varlığı idarə edir...

Sən öz yolunu get.

Heç olmasa özünü idarə et!

Ümidim var

Metiorit də yolundan dönə bilər,

Yolda dayana bilər.

Adam Venesiyada da

Susuzluqdan yana bilər.

Adam öləndən sonra da

Yuxudan oyana bilər.

Yaşayıramsa, hələ ümidim var.

Ümidin bitən yerində

Sən həddini aşma.

Orda yalnız Allah var,

Sən danışma.

31.03.2017