İçimdəki qadın
İçimdəki qadın!
Hər gün sənə görə davadı evimizdə
evimdəki qadın qısqanır səni.
Bəs necə gizlənmisən içimdə
hər dəfə özünü ələ verirsən.
Artıq anasan qızını ərə verirsən,
amma mən hələ də səni sevirəm.
Evimdəki qadına tutuluram
adını dodaqlarımda pıçıldayanda,
filmə baxıb ağlayanda,
sənin istədiyini ona almayanda
evimdə davadı.
Axı o da qadındı
geyinirəm, yeyirəm
məni sevir,
mən də evimdəki qadını sevirəm
içimdəki qadın!
Mürgüləyən uşağın yuxusu
Səninçün nigaran olmaq
torpaq altda qalan
anam üçün darıxmaq kimidir.
Başını çiynimə qoyub
çiçək qoxlamağına bənzəyir
indi çiynimdə barmağını somurub
mürgüləyən uşağın yuxusu.
Axı əllərimin qaşınmasına görə
daha çox darıxıram
öpüb alnıma qoyanda
elə bilirlər ki, pul qazanacam.
Mənsə elə bilirəm ki,
sən gələcəksən...
Şəklinə baxmaq
köhnə qəbri ziyarət etmək kimidi.
Şəklinin üzü soyuqdu
torpağın üzü kimi...
.jpg)
Əlimin yeri sağalsa
Mən elə ölsəm yaxşıdı
demə fürsət düşüb əlinə.
Mən olmasam, kim yollanar
axı ölümün yerinə.
Səni işdi vuran olsa, ağlama
çalış ki, çox getməyək dərinə.
Gəl bir müddət yas saxla
əlimin yerinə.
Əlimin yeri sağalsa, sevinmə
ürəyinin yara yerində
iş-gücün ara yerində
çağırsam səni
acıla məni, qadın,
acıla zülmün yerinə...
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
