.jpg)
Yağış yağır
nur kimi,
bir payız gecəsində...
Yadıma
mavi göylərin
qərib ulduzları düşür,
bir ucqar dağ kəndində.
İnsanları görürəm,
hərəsi bir biçimdə -
hərəsi bir rəngdə.
Onsuz da insanların
Taleyi də özləritək
müxtəlifdi əzəldən,
biri bahar rəngində -
biri payız rəngində.
Kaş bircə
istəyim odur,
soyuqqanlı
daşa dönməsin insanlar.
Xatirəsi yaşasın
hər insanın
bu dünyada,
başdaşı üstündə deyil,
xoş bir söhbət şəklində.
Bir dənizdir ürəyin,
dalğaları
duyğuların - hisslərin.
Sərhədində durmusan,
bir sevgi dənizinin.
Danışırsan
dalğalarla səhər-axşam,
Məhəbbət dilində -
Sevgi dilində.
Ancaq bircə bilmədiyin,
quşların dilidi sənin.
O dili təkcə dünyada,
Körpələr bilir, sanki,
böyüyüncə unudurlar
Mələklərin dilini.
Kaş öyrənə biləydik,
O dili öyrənə-öyrənə
həm məhəbbət dilini -
həm sevgi dilini.
Onda bəlkə, biryolluq,
tapa bilərdik dünyada
Könüllərin dilini -
ürəklərin dilini.
Həqiqətin dilini.
Dünyam
Səhər-axşam yol gedirəm,
Yol üstəyəm, anam dünyam.
Ot üstündə, kol üstəyəm,
Leyləyimsən, sonam dünyam.
Solan deyil yaraşığın,
Məskənisən hər aşığın.
Tükənməyəcək işığın,
Sərvətindi inam, dünyam.
Söz yazanın çox olubdu,
Hər sözü bir ox olubdu.
Dərdin mənə yoluxubdu,
Zirvələri duman dünyam.
***
Gözəl olursan bəzən,
bitirə bilmədiyin
cümlələr kimi.
Yazıq olursan hərdən,
havayı atılan
güllələr kimi.
Bənzərsiz olursan,
əvəzsiz olursan
bağçamızda ətir saçan
güllər kimi.
Ancaq heyif ki,
qədrini
bilən yoxdu hər dəm də.
Qədrini bilən olsa,
fəth edərsən cahanı
ey təmiz ürəkli,
bənzərsiz və
bilinməz insan...
Yeddi göy qatındakı
bakirə mələklər kimi.
***
Deyirlər zəmanə
dəyişib yenə.
Bu söz əzbər olub
hey dilimizdə.
Bəlkə, heç zəmanə
deyil, a qardaş,
özümüz dəyişkən
olmuşuq belə.
Gəlin axtarmayaq,
hər bir günahı
ağlımız ucundan
biz zəmanədə.
Zəmanə
dəyişə bilər həmişə,
Allahın əmriylə
Xoş gün eşqinə.
Dəyişən elə biz
özümüzük yenə,
Gəzməyək hər günahı
biz zəmanədə.
Günahlar hər anda
izləyir bizi,
izləyir qaranlıq
kölgələr kimi.
Nəfsimiz ucundan
düşürük dərdə,
Günahı gəzməyək,
biz zəmanədə.
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
