Teleqraf
Yolların soyuqluğuna dik gözünü
Gör,
görünməzliyə doğruyam...
Uzaqlıq bir zivədir yollara uzanan
Zivənin üstündə yellənen
köynəklərdir adamlar.
Pəncərənin o tayına birinci dəfə
"qürbət" - dedi atam.
Sürgün düşdülər...
Yabancı oldu adamlar...
Pəncərənin o tayına birinci dəfə
"gözyaşı" - dedi anam
Yağış oldular
Yaşardı adamlar
Pəncərənin əlindən tutub
Pəncərəyə "sevgi" - dedim
Buraxdılar...
Atdılar adımı
Getdilər adamlar.
Elə həmin yollarda
Uzun-uzadı bu teleqraf simləri
Bir sevgi məktubu simlərdə didərgin
Simlərə qonan quş nə bilər
simin darıxmasını!
Gör,
görünməzliyə doğruyam...
Mən o teleqraf simlərində yorulmuş
üçcə kəlmə söz
Mən həmin o yollarda
Bir işıq dirəyiyəm, ey yolçu...
Uzun uzadı bu gözləm
Geri qaytar ayaqlarımı!!
aldığın ayaqlarımla rəsm çəkirəm
yolların uzunluğunu
Uzun-uzadı bu özləm
Bu ciyər deyil içimdə havanı soran
Ciyərimdə bir ev var kimsəsiz
Ciyərimdə ağrı var, ey havam!
Ey suyum,
Susuzam səsinə...
İki kəlməlik dol boğazıma!
Uzun-uzadı bu zivə
Zivənin üstündə yellənen
köynəklərdir adamlar.
Adamların hər biri mən!
adamları atır külək
Adamları aparır yel
.jpg)
Yaxın uzağım
Adını bilmədiyim bir kəs
qonşuluğumda nəfəs çəkməkdədir...
Ayaq səsini duyaram gözlərimi yumarkən.
...Hər gün bir az yox olmaqdadı,
hər gün uzaqlaşmaqda.
Özünə bir çiçək alar evə qayıdanda,
bir də qəzet...
Dediyim o bir kəs
qonşuluğumda televizora baxmaz,
hind kinolarını da bəyənməz,
Hannanı düşünüb kitablarda nəsə axtarar.
Hərdən Qrenoyun xətrinə
ətir vurar üstünə
Yanyanayıq...
Divarımız bir,
dünyamız ayrı...
Elə uzağıq ki,
heç vaxt girə bilmərəm onun otağına -
evinin qapısı yox,
pəncərəsizdi otağı.
Elə yaxınıq ki,
nəbzinin səsini duyaram
gözlərimi yumarkən...
Adını bilmədiyim bir kəs
dincəlmək istədiyim vaxt
beynimin kamerasında
xatirə şəkili asmaq üçun
mismar vurar divarlara...
Şən nəğmələr oxuyar
gözümün yaşı axanda,
ürəkdən qəhqəhə çəkib gülən
zamanımda.
Hönkürüb ağlayar qonşuluğumda
adını bilmədiyim bir kəs.
...Qonşuluğumda bir səs yaşayır -
adını bilmədiyim bir səs!
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
