Gələn payız
Bağışla məni, ana, bağışla,
Yenə payız küçəmizi salamladı yağışla.
Yenə mən sənə çətir ala bilmədim,
Bağışla məni, ana, bağışla.
Gec gəlib, tez gedən fəsilə payız deyilir,
Çətir ala bilənlər çölündə,
Ala bilməyənlər hər yağış damcısında içində əyilir
Hər əyildikcə inşallah gələn payız, gələn payız deyir.
Mən bitdim, bu payızlarsa bitmədi...
Hər gələn payız, gələn payız dedim.
Bu payız birtəhər keçir, ana,
Gələn payız çətir alaram dedim.
Ovuc boyda otaqda
Özümə də, sənə də dünya boyda ümüd verdim.
Yenə yenildim, yenə evə çətirsiz gəldim.
Bağışla məni, ana, bağışla.
Sürətim yox qaçıb keçəm,
Qanadım yox uçub keçəm,
Nə olardı bir səfərində,
Payızların birini keçəm?!
Anama yaraşan, anamı qoruyan bir çətir seçəm.
Tutacağı anamın əlləri kimi yumuşaq,
Dirəyi, qüruru kimi möhkəm,
Örpəyi, üzü kimi ağ olsun.
Və nəhayət, anam çətirli anaların sırasında dursun.
İnşallah, gələn payız, anam, gələn payız.
İlahi
İlahi, məni quş elə,
Seçim yenə sənin olsun.
Ya qaranquş, ya bayquş elə
Təki uçmağı bacaran quş olum
Fərq etməz
Qanadlar böyük olsun, balaca olsun
Təki o qanadlar məni uçursun.
Uçum, uçum,uçum...
Dayanmadan gecə gündüz
Nə astar görüm , nə bir üz,
Nə əyri görüm, nə bir düz.
Uçum, uçum...
Dostun xainliyindən,
Segilinin xəyanətindən
Kinimdən, nifrətimdən
Həyatın boğduğu nəfəsimdən
Gedənin arxasınca su səpən gözlərimdən
Sonda ölən ümidlərimdən,
Mürəkkəblə bulanmış öz əlimin içindən
Uçum, uçum, uçum...
Dörd fəslin dördündə də
Dərd bitirən yer üzündən,
Başıma günəşinin şəfəqiylə
Yağışının rəngsizliyilə
Qarının soyuğuyla
Ah yağdıran yer üzündən
Uçum, uçum, uçum...
© Müəllif hüquqları qorunur! Mətndən istifadə etdikdə istinad mütləqdir!
