Gözlərimin son sözü - Telman Nəzərli

ŞEİRLƏR

Gözlərimin son sözü

Sizin küçənizə yağan yağışlar

Mənim gözlərimin qohumlarıdı;

O yağışların gəldiyi yol

sənin tənha günlərinin

quraqlığına sarıdı...

Gözlərimin son sözüdür

qapınıza çırpılan külək -

illər ötəcək,

onu nə sənin ürəyin duyacaq,

nə də qulaqların eşidəcək...

Qapınıza söykənən adam

Sənin taleyinin qəm karvanının

Kimsəsiz sarvanıdı...

Bir azdan ilk xoruz banıdı...

Bir azdan...

uzaqlarda karvan zınqırovu,

sarvan zümzüməsi...

Bir zaman məni də

sevərdi bir qız

Bir zaman məni də sevərdi bir qız...

Lovğa yerişimdən, qəmli səsimdən

xoşu gələrdi,

Hikkəmdən-hirsimdən xoşu gələrdi,

Düzümdən-tərsimdən xoşu gələrdi,

Biz zaman məni də sevərdi bir qız...

Yoluma çıxanda üzü gülərdi,

gözü gülərdi.

Salamı gülərdi, sözü gülərdi,

gözündə sevincin yaşı gülərdi...

Gedərdim dalınca küçələrinə

Getdiyim küçənin tozu sevinər,

Ayağıma dəyən daşı gülərdi.

Bir zaman məni də sevərdi bir qız -

Beşi bilməsə də, beşi bilərdi...

Bir zaman, eh, məni sevsə də bir qız-

Nə bir əl uzadıb əlindən tutdum,

Nə bir dilə tutub dilindən tutdum...

Nə küləyə dönüb saçından öpdüm,

Nə göz -gözə durub belindən tutdum...

Sevərdi, məni də sevərdi bir qız...

İndi saç-saqqalın bu çal vaxtında

Sağımdan-solumdan ötən gözəllər

Görən bilirlərmi? -

Bir zaman məni də sevərdi bir qız,

Lovğa yerişimdən, qəmli səsimdən

xoşu gələrdi...

Beşi bilməsə də, beşi bilərdi...

Ağrı

Payız ağrıları, qış arğıları,

Ürək arğıları, baş arğıları,

Gündüz topladığım iş ağrıları

Hər gecə gecəmi əlimdən alır.

Gündüzlər küçədə, işdə, iclasda,

Toyda, qonaqlıqda, nişanda, yasda

Ağrılar yığılır dəstəbədəstə

Ağrılar yığılır gecəmə doğru...

Gecələr gecəmi əlimdən alır

gündüz bir yaltağın, bir riyakarın

çirkinə, əyriyə gözəl deməyi,

ya bir kəmfürsətin mavi ekrandan

"şer" söyləməyi, "qəzəl" deməyi...

Ya da bir ruhsuzun yaşıl yarpağa

xəzəl deməyi

ağrıya dönüb

gecələr gecəmi əlimdən alır...

(...Yaşımın üstünə yenə yaş gəlir,

Yenə payız gedir, yenə qış gəlir,

Hayana dönsəm də yenə tuş gəlir

Payız ağrıları, qış ağrıları

Ömür ağrıları, yaş ağrıları...)

...Bir də görürəm ki, gecəm qurtardı -

Bir də görürəm ki, səhər açıldı -

Bir də görürəm ki, səhərə çıxdım...

Bir də görürəm ki, ayaq üstəyəm,

Bir də görürəm ki, şəhərə çıxdım -

Gedirəm yenə də gecəmdən ötrü

Ağrı toplamağa, ağrı yığmağa...

Dəniz həmən dəniz...

Dalğalar qoynunda "yuva"mız vardı

Ləpələr üstündə "dava"mız vardı...

Eh, onda bir özgə havamız vardı...

Qumlu sahillərə nə deyim sənsiz!..

Elə bil dünəndi, elə bil dünən

Dalğada köksümə sığınardın sən...

Eh, elə gülərdin, uğunardın sən...

Ağarmış tellərə nə deyim sənsiz!..

Sən yoxsan, dəniz də solub-saralıb

Ləpələr, dalğalar sanki qocalıb...

Dənizin üstündə gülüşün qalıb -

Qağayı dillərə nə deyim sənsiz!...

Dəniz həmən dəniz, dalğalar həmən

Yayın son günləri... seyrəlib çimən...

Daha nə mən varam, eh nə də ki sən...

Aylara, illərə nə deyim sənsiz!..

Şəmmədoğlu Şahismayıla məktub

Salam de qoca Tiflisə,

Çatmaya, Qarayazıya,

Yağlıcaya salam söylə!

Orda keçən hər fəsilə,

Günə, aya salam söylə!

Tiflisi öp, Şəmmədoğlu,

Tiflisin küçəsi gözəl -

Küçəsində izim qalıb.

Gündüzündə arzularım,

Gecəsində sözüm qalıb.

Qara gözlü gözəllərin

Neçəsində gözüm qalıb...

Nə vaxtdı gələ bilmirəm,

izimi yığ göndər mənə,

sözümü yığ göndər mənə,

gözümü yığ göndər mənə,

Şəmmədoğlu,

Elə möhtacam onlara...

Guya işim başdan aşır

Nə vaxtdı gələ bilmirəm...

Tay-tuşlarım şair oldu,

Mən kiməm-hələ bilmirəm...

inan, hərdən, Şəmmədoğlu,

Gedən günün yaxasından

gürcücə tutmağım gəlir.

Gürcücə sərxoş olmağım,

gürcücə yatmağım gəlir.

Gürcücə yatan Tiflisi

"Durum dolanım başına" -

deyib oyatmağım gəlir ...

Guya Tiflis uzaqdadır,

Guya dünyanın o başı ...

Mən hələ gələ bilmirəm,

Xeyirdə-şərdə sən canın,

Sən ovut qohum-qardaşı ...

Bu il gələ bilməsəm də

Gələn il ordayam, qardaş!..

Belə cavan(!) ölməsəm də

Ölən il ordayam, qardaş...

Astana işıqları

Torpağı torpaq kimi duymamış,

ata ocağının hənirindən doymamış,

beş-altı hərflik adımızdan savayı,

nəyimiz vardısa,

götürüb çıxdıq evlərdən...

Taleyimizin düyünçəsində

ata -ana intizarından səfər payı,

çıxdıq yurdlardan...

içimizdə ac pələng arzusu,

alnımızda qürbət yazısı,

üz tutduq böyük şəhərlərə sarı.

Gözlərimizi çəkib apardı

böyük şəhərlərin astana işıqları...

...Və bir gün anladıq ki,

isidə bilməz ürəyimizi,

qızdıra bilmir çörəyimizi

böyük şəhərlərin astana işıqları.

Köhnə araba çarxı kimi

içərimiz cırıldaya-cırıldaya,

xəyallarımızı yalvarmağa göndərdik

torpağa, ota, suya...

Anladıq ki, torpağın

öncə ayağımız dəyən yeri -

gözlərimizin son intizarı...

Gənc şair

Başında əsən külək,

Köksündə əsən ürək

az qalırdı yıxsın onu.

Birtəhər özünü dartıb aparırdı

gül mağazasına sarı.

intizar-intizar baxırdı

şəhərin evlərinə,

ağaclarına, işıqlarına,

qocalarına,

cavanlarına, uşaqlarına...

Elə bilirdi ki, bu axşam çağı

hamı gül axtarır, hamı gül gəzir.

El bilirdi ki,

bu şəhərin də içində

soyuq bir əl gəzir...

Sağa-sola itələyib

fikrindəki biganə adamları,

başını uzatdı gül dükanının

açıq pəncərəsinə sarı...

Pul verdi-puldan utandı,

gül aldı-güldən utandı.

Qanrıldı yoluna sarı,

getdiyi yoldan utandı...

...Əlində bir dəstə çiçək,

Fikrində bayaqki şer gecəsi,

gecədəki oxucu-dinləyici biganəliyi...

fikrində taleyinin ittihamı...

Birtəhər özünü dartıb aparırdı

evinə sarı...

Yolunun sonunda bir bulud saçlının

nigaran baxışları,

bir də bu dünyanın yalan-palan işləri...

Sevgi ucalığı

Qınayan çox,

Sınayan çox

Səni də, məni də...

Ömrün sonuna doğru

Bir uca sevdanın qəsdi ilə gedirik

Qınaqların, qarğışların

üstü ilə gedirik,

Bütün pisliklər aşağılard...

Küləklərin, yağışların

Üstü ilə gedirik -

bütün pisliklər

bizdən çox-çox aşağılarda...

... Çox-çox ucalıqlardayıq

Ucalıqlar hərdən gözlərini nəmlədir

Sükutu çək gözlərinin üstünə...

Gözlərimin ahı paltarını tərpədir

Buludu çək dizlərinin üstünə -

Məni dəli eləmə

Bu ucalıqda,

Bu sevginin yeddinci qatında...

Bizdən gileylənənlər,

Bizi qınayanlar,

Bizi ayrılıqla

Hədələyib sınayanlar

Bizdən çox -çox aşağılarda...

Gəl onlara bir ağız

Xoş söz ataq

Daraşsınlar o xoş sözə -

Sərçələr

Bir ovuc dənə daraşan kimi

Bəlkə bundan sonra

dəyişsinlər

qarışsınlar o xoş sözə...

Bəlkə bundan sonra

pisliklərdən çıxa bilsinlər...

Bəlkə bundan sonra

bu sevginin arxasınca

dualı ağızla baxa bilsinlər...

bu sevgi, bu ucalıq elə gözəl ...

Gedək bu ömrü

əl-ələ, göz-gözə,

söz-sözə...

Dinəndə bir dinək,

dönəndə bir dönək...

Enəndə bir enək

bu ucalıqlardan -

Amma torpaqdan başqa

nə endirər bizi?!