Naməlum qadına məktub
Fotoşəklini çəkən fotoqraf
Çox gözəl olduğunu demişdi.
Satıcı aldığın bozumtul gödəkçənin
Sənə çox yaraşdığını söyləmişdi...
Hər gün rastlaşdığın adamlar da
Xalaxətrin, üzünə gülmsəmişdi.
Və sən bunları səmimi qəbul etmişdin,
Ancaq bilməmişdin:
Qəlbindəki hərarət az
Gözlərindəki məna dayazdı.
Bağışla məni...
Bağışla ki, səndən
şeir düzəldə bilmədim...
Kredit
Səndən sonra inan ki,
qaydasındadır hər şey:
hərdən dua edir,
hərdən içirəm.
Bəzən ağlayır,
bəzən gülürəm...
Qaydasındadır hər şey,
narahat olma,
bircə ömürlük kreditim qalıb
Allaha...
Gözəllik dərsi
Müəlliməyə
Həyatın mənə verdiyi
bütün dərsləri unutmuşam...
Mənə hər şeyi öyrət təzədən.
Qoy ilk mövzu "gözəllik" olsun,
uzağa getmə, eləcə tanıt özünü,
danış özündən...
Mənə xoşbəxtliyin kitablarda yox,
reallıqda olduğunu göstər.
Göstər ki, onu səmada deyil,
Yerdə axtarım...
"Təbii intellekt"
Hərdən deyirlər ki, nə özünü
dağ başına qoymusan,
ayağının altını görmürsən?
Cavabım sadədi:
Mən ayaq altda qalmağı
seçmədim!
Məsləhət
Mənə yol göstərmək istəyən
Heç kəsə ironiyayla demirəm siz kimsiniz?
Çünki "Süni intellekt" kimisiniz...
Müasir düşüncə
"Ağıllı insan"lar
üstümə dəyənəklə gəlir
ilk "əmək aləti"ni
göstərmək üçün...
"Filosofcasına"
Hər kəsin eşitdiyi, ancaq
heç kəsin başa düşmədiyi
mənasız söz yığınına
"Fəlsəfə" deyilir...
Gənclik və Gələcək
Məhdudiyyət və məhrumiyyətlərin
məngənəsində əzilmiş gənclikdən
gözlənti və gələcək vədi
korlara gecə sayrışan ulduzlardan
sübh çağı doğan günəşdən
danışmaq kimidir!
Plakat
Meşə yanğınları planetin,
ürək yanğısından çıxan
hər qullab tüstü, insanın
ciyərlərini məhv edir...
***
Əvvəl heyvani hisslər,
sonra heyvan,
daha sonra insan yarandı...
Qanunlar isə heyvani instinktləri
insanlardan qorumaqçün yaradıldı...
***
Dünyayla dalaşmaq asanmış, demə,
Çətini qadınla barışmaq imiş...
***
Şeir yazmaqdan savayı
əlindən heç nə gəlməyən
gənc şair, cana doyub
sevgi romanlarını yandırdı;
bütün nakam eşqlərin acığını çıxdı...
***
Göy lazım deyil,
yer bəsimdir.
Dəniz lazım deyil,
göl bəsimdir.
Özgəsi lazım deyil,
elə sən də, elə sən də...
***
Boğazda düyünlənmiş
hər kəlmə sözdən
kəndirtək asılıyam:
Desəm, öldürərlər,
deməsəm, ölləm...
© Müəllif hüquqları qorunur! Mətndən istifadə etdikdə istinad mütləqdir!
