***
De, nəyin təsəllisidir
Dağların, təpələrin yamacına
döşədiyin çiçəklər,
Tanrım?
İnsanlar da sevdiklərinin qəlbini qıranda
Çiçək bağışlamağı öyrəniblər səndən
Nə qədər çox incidilmisənsə
O qədər böyük olur gül dəstən.
***
Tikinti gedir,
Müvəqqəti narahatlığa görə üzr istəyir
Qurub-yaradan kişilər.
Çıxardıqları səslər,
Toz-tozanaq məni əsla narahat eləmir,
Hüzur verir, bilmirlər...
Kaş dünyanın hər yerində yol çəksin,
Tunel qazsın,
Evlər, körpülər tiksin kişilər.
Bombalar yağmasın,
Minalar partlamasın.
Dağların bağrını dələn təzə yollar çəksinlər,
Üzr istəməsinlər buna görə
Üzrə gərək yoxdur heç də.
Uçurmasınlar qadınların,
Uşaqların dünyalarını başlarına,
Qoparmasınlar ahılların ürəklərini.
Şəhərləri dağıdıb
Viran qoyaraq
Yenidən inşa eləməsinlər bircə,
Onda o üzrü bağışlamaq olmur.
***
Köçəri quş olasan,
İki vətənin ola,
Vizasız, sənədsiz köçəsən
Birindən o birinə.
Və bahar ola, yaz ola həmişə
Getdiyin yerdə.
Payızı, qışı, yağışı arxanda buraxasan,
Ürəyində nəşə.
***
Az əvvəl yazdığım uzun şeiri sildim,
Deyingənlikdən başqa bir şey deyildi
Adamlar deyinirlər
Və sonra buna şeir deyirlər.
Çox deyingən kişilərdir,
Qadınlardır bu şairlər.
"Bu günün işini sabaha qoyma!"
Günəş doğub,
Gözlərimi açmışam.
Hələ də dünənki günü düşünürəm,
Dünəndən qalan qayğıları,
Mətbəxdə yığılıb qalan qabları,
Ödənməmiş borcları,
Qapıma qoyulan qəbzləri,
Uşaqlarıma verdiyim vədləri,
Ürəyimi sıxan dərdləri...
Kaş sıfırlanaydı hər növbəti gün,
Hamı hər şeyi unudaydı.
Həyat hər gün yenidən başlayaydı,
Kütləvi amneziyaya yoluxaydıq,
Kim olduğumuzu unudaydıq.
Dünən atılan silahlar bu gün susaydı,
Hamımızın yeganə adı insan olaydı.
Günəş kimi başlayaydıq hər yeni günə,
Dünəndən qalan tək işimiz yaşamaq,
İşıq saçmaq olaydı.
Eh, mənə tez-tez deyərdi nənəm:
"Bu günün işini sabaha qoyma, bala!"
Tələb edərdi amiranə səslə:
- "Bağı sula, döşəməni yu,
elə olsun ki, yağ tök, yala!"
Gərək o, mənə başqa məsləhət edəydi:
"Bu günü özünlə sabaha aparma, bala!
Günəş ol, yenidən doğ,
Hər gün özünü yenidən doğ!"
***
Yağış gölməçələrindən keçərkən
Üstünə lilli su sıçrayacağından
Ehtiyatlanan adamla
Fərqlənir minalı sahədə
irəliləyən adamın qorxusu.
Yağış gölməçələriylə əylənə də bilərsən,
Qanın qara deyilsə...
Nə çətir tutaq başımız üstündə,
Nə ayağımızın altını görsün gözümüz.
Bu qızıl payız
Dadını çıxaraq gölməçələrin,
Nadinc, çılğın uşaqlar kimi
Baxmayaraq,
həyat elə başdan-başa
Minalı bir sahədi.
***
Yeni şeirlərini dostuna oxuyan şair
Dostunun kədərdən üzünün
əyildiyini gördükcə
Gizlədə bilmir sevincini,
Şeirlərinin alındığına sevinir,
Masadan biri sevinclə qalxır,
O biri ürəyində qəm.
Halbuki əksini hiss eləyirdilər
Görüşə can atarkən.
Maneki-neko
Pəncərənin ağzından,
Pərdənin dalından
Səsi gəlir qızımın hədiyyəsi
Maneki-nekonun.
Ana dilimdə "Çağıran pişik"in
Bu səsi əvvəllər də eşitdiyimi xatırlayıram.
Dəmiryolunun o tayında,
Nənəmlə babamın evində
Günorta yuxusuna məcbur ediləndə
Aynabənddən yataq otağına gələn
Saatın səsinin eynisi.
Uzanmışam yataqda,
Heç kim məcbur etmir yuxulamağa.
Yuxulamaq arzusundayam,
Unutmaq,
Dinclik tapmaq həsrətində,
Özüm özümü məcbur edirəm bu dəfə.
Susmur beynimin içindəki səslər,
Uşaqlığımdakı kimi
Kaş yenə üstümə təpinəydilər:
"gözünü yum, yat!" - deyə...
Birdən xəyala gedirəm,
Gözlərim yumulur,
Otağa girir nənəm
Barmaqlarının ucunda;
Yoxlayır - yatmışam,
yatmamışammı?
Üstümü açmışam,
açmamışammı?
Həqiqətlər toqquşanda
Quşları yemləyən qoca kişi
Deyişir pişiklərin qayğısına qalan
Yaşlı qadınla.
Zibilliyin yanında.
Zibillikdən yem toplayıb
Sevimli canlara verirlər.
Özləri nə tapır,
Necə dolanır,
Nə yeyirlər,
Fikrim yox...
Kişi qadının pişiklərini ittiham edir:
Yırtıcılıqda,
Çöl göyərçinlərini tutub
Didir-parçalayır onlar.
Əyilib ağac qapır;
tolazlayır pişiklərə.
Qadın özünü verir
Pişiklərin önünə
Ağac ona dəyib düşür yerə.
Necə ayırasan onları?
Necə kəsəsən bu mübahisəni?
O da haqlıdır,
Bu da haqlı,
Haqsızlıq kimdədir bəs?
Nədədir bəs?
Bəlkə ulu təbiətdir
Elə ən böyük nakəs?!
Ana məsləhəti
Çaydanın içini yuyuram,
Xəbərdarlıq edir anam:
"Çatlaq var ağzında çaydanın,
Birdən əlini kəsərsən ha!"
Dediyi kimi
Dediyi yerdən yaralayıram əlimi.
Xatırlayaraq acıyla
Bütün məsləhətlərinə
Elə bu cür
Əməl elədiyimi.
Özümdən,
Ancaq özümdən
Küsüm mən daha!
© Müəllif hüquqları qorunur! Mətndən istifadə etdikdə istinad mütləqdir!
