Vaxt
Günəş vaxtında doğur,
Öz vaxtında çıxır Ay.
Öz vaxtında oyanıb,
Öz yoluyla axır çay.
Vaxtında çiçəkləyir
Yaz həsrətli yasəmən.
Vaxtdan çox gileyliyəm,
Vaxt tələsir, yoxsa mən?!
Hamı vaxtın möhtacı,
Vaxtın baxtına bir bax.
Bir ölümə yaraşır
Vaxtdan ucada durmaq.
Dünya bir dar otaqdı;
dardan sıxılanlara
dar otaq da qılıqçı.
Vaxt hamının hakimi,
Hamı vaxta qılıqçı.
Ömrümü isindirir
Ocağım da, közüm də,
Vətən, əsgərə döndü
Öz vaxtında sözüm də.
Küləklər ürəyimdən,
Ay Vətən, əsər indi;
öz vaxtında Rəşidin
özü əsgəriniydi,
İllər keçsə də şeiri
yenə də əsgərindi!..
Salam de
Məni Laçın dağlarından salamlayan şair-publisist dostum Abdulla Qurbaniyə
Getdin... Gördün...
Ürəyinin oduyla
Od saldığın ocaqlara salam de.
Ruhun əsgər nəfəsiylə isindi,
Yaxınlara, uzaqlara salam de.
Qəzəbiylə qara üstə ağ çəkən,
Bağsızlığın əl-qoluna bağ çəkən,
İşığıyla qaranlığa dağ çəkən
Haqdan gələn çıraqlara salam de.
Yaranışdan yüyrək dilli ozandı,
Gördüyünü xeyirliyə yozandı,
Zəfər gördü, əbədilik qazandı,
Şirin dilli bulaqlara salam de.
Sellər sığmır dərələrə, yol gəlib,
Ərənliyi görə-görə yol gəlib,
Döyüşlərdən Zəfərə yol gəlib,
Dalğalanan bayraqlara salam de.
Zirvəsində əzizləyir qar daşı,
Əsən yellər tərpədəmməz qar daşı...
Hər birinin Faxralıdı qardaşı,
A Qurbani, o dağlara salam de!
Murovda əsgər gileyi
Yağan yağış, gözucu
bax ovcumun içinə.
Göylərin şəbnəmini
sağ ovcumun içinə.
Ruh sapına düzül, gəl,
Süzüm-süzüm süzül, gəl...
Göy üzündən üzül, gəl,
ax ovcumun içinə.
Düşmə qınağa, bəsdi,
Düşmə yanağa, bəsdi,
Yağdın torpağa, bəsdi,
Yağ ovcumun içinə...
Kəlbəcərdə əsgər sevinci
Həsrətli çiçəklərin
gürşad gözləməsinə
ümid kimi yağ, yağış!..
Ağ həsrəttək cücərib
ağaran çiçəklərin
ağca ləçəklərinə
narın-narın yağ, yağış,
Ağ yağış, dümağ yağış!..
O daş mənə tanış gəlir...
İşğaldan azad edilmiş Ağdam ərazisində ermənilərin nə vaxtsa tank üçün daldalanacaq hördüyü divarda gördüyüm daşlar qəlbimi qanatdı...
O torpaqda gördüyüm gül,
Həsrətini hördüyüm gül,
Göz yaşını sildiyim gül,
Qardaş, mənə tanış gəlir.
Yağa-yağa heydən düşən,
Günün ətəyindən düşən,
Göz suyutək göydən düşən
yağış mənə tanış gəlir.
Dilsiz qəhərin yaşıdı
ovucumda göz yaşıdı...
Hansı divarın daşıdı,
o daş,
mənə tanış gəlir...
Döyüş qardaşı oldular
Göylər uğur diləyirdi
Ürəyi təmiz oğula.
Uğur duaçısı oldu
Hər cığır, hər iz oğula.
Hər yaş ərənlik yaşıydı.
Səngərə uğur daşıdı...
Qaraca Çoban daşıydı
Dava günü Kirs oğula.
Yolun qar daşı oldular,
Elin Sur daşı oldular...
Döyüş qardaşı oldular
O oğullar siz oğula...
Döyüş bayrağı
Əsgər olub döyüşdən
keçən bayrağım mənim.
Səngərdən ürəklərə
köçən bayrağım mənim.
Göyləri sürmələdi
duman, döyüş bayrağı.
Sənə beyət gətirib
zaman, döyüş bayrağı!
Döyüş yolun deyir ki,
Qönçə gülün deyir ki,
Göyçə gölün deyir ki,
Qələbəyə aparar
hər an döyüş bayrağı!..
Ruha dönən haray oldu Azərbaycan!..
Çanaqqalada mehmetçiklərin sırasında yüzlərlə azərbaycanlı döyüşçü də vardı...
Azərbaycan uğurladı
Türkiyəyə
döyüşlərə gedənləri
Ruh türklüyə üzərlikdi;
Uğurladı
ömürü ruh edənləri...
"...nə olsun ki, dünya - gidi?!
Ruhumuzla açacağıq
bu kilidi...", -
dedi Türkiyəyə
nəfəs kimi yetirənlər,
Mehmetçiyə
döyüş ruhu yetirənlər:
Sən - vuran əlsən,
Sənə çiyinik,
Azərbaycandan
döyüşə gəlmiş
mehmetçiyinik,
Salam, Türkiyəm!
Düşmənlərinin
gedər gözünün
yağı da qalmaz,
Döyüşümüzlə
torpaqlarında
yağı da qalmaz,
Salam, Türkiyəm!
Necə sarılıb
burda qar daşa,
Bir sovruq əsdir
Qarda qar daşa...
Nəfəsi ilə
arxa, dayaqdı
qardaş qardaşa,
Salam, Türkiyəm!..
Döyüşdü,
türk oğlu türk döyüşdü,
Tarix yazmış bir millətin
Yağılığa
görk oğlu görk döyüşdü...
Ruh döyüşündə
daş səngər oldu,
səngər daş oldu,
əsgər ruhumla
mehmetçiyinə
səngərdaş oldum...
Salam, Türkiyəm!
Hər döyüş bizə
Türkçülük andı,
Döyüşlər üçün
erkən oyandıq,
Mehmetçiyinlə
qoşa dayandıq,
Anam Türkiyəm!
O illərdə
Silahıyla, yarağıyla,
Tətik sıxan oğuluyla
Türkiyənin yanındaydı Azərbaycan!
Türkün türklük döyüşündə
Ruha dönən bir haraydı Azərbaycan!..
Şəhidlər Zəfərə yol göstərirdi
Boylanıb baxmadı gün yaxa-yaxda
Daşlara çırpılan güllə səsinə.
Yerə əyilirdi göylər elə bil,
Sığınıb əsgərin son nəfəsinə.
Daşlığa çəkirdi yollar əsgəri,
Başının üstündə meh dolaşırdı.
Vətəndən halallıq alırdı sanki,
Sanki Vətən ilə vidalaşırdı.
Düşmənin gözünü qamaşdırmağa
Duman olacağam, çən olacağam.
Qisas döyüşüdü döyüşüm, Vətən,
Üç şəhid əsgərin qisası üçün
Dördüncü şəhidin mən olacağam!
Şəhidlərin istəyini döyüş ruhu tək
Avtomatın tətiyinə yığdı barmağı.
"Bu, Əlinin əvəzinə!"
"Bu, Rahimin əvəzinə!"
"Bu, Məmmədin əvəzinə!" -
Avtomatın tətiyini sıxdı barmağı...
Güllələrin istisindən əridi daşlar,
Mərmilərin tüstüsündən boğuldu səngər,
Qumbaranın qəlpələri canına doldu,
Ayaq üstə durammadı, yıxıldı səngər.
Qapısı-bacası bağılı səngər,
Tifaqı əzəldən dağılı səngər
Göz açıb-yumunca bir məzar oldu
Neçə erməninin son nəfəsinə.
Göylər şahid oldu son döyüşündə
O gün ölməzliyin təntənəsinə...
Şəhidlik
İgidlər yad izini
silir, nəfəs dərmədən.
Döyüşə Zəfər kimi
gəlir, nəfəs dərmədən.
Səngər olur bənd-bərə
Döyüşə gələnlərə...
Yağını iki yerə
bölür, nəfəs dərmədən.
Zirvədi bayraq üçün,
Közdü hər ocaq üçün...
Döyüşdə torpaq üçün
ölür, nəfəs dərmədən...
Şəhidlik şərqisi
Harayın haqq harayıdı,
Gələrik, dağlar, gələrik.
Qəhərini qardaş kimi
bölərik, dağlar, bölərik.
Duruldarıq kəhrizini,
Şər əyə bilməz dizini...
Yollarından yad izini
silərik, dağlar, silərik.
Döyüş yolu düşməz düyün,
Qüdrət nurudu gördüyün...
Döyüşərik, Vətən üçün
ölərik, dağlar, ölərik...
© Müəllif hüquqları qorunur! Mətndən istifadə etdikdə istinad mütləqdir!
