Anlamırdıq
Ağlımızın azlığından ayılıb,
Anlamırdıq ataların ağrısın.
Alınmayan arzulardan ayrılıb,
Acgözlüklə axtarırdıq ayrısın.
Anlamırdıq axıracan açıqca,
Ailədə azuqənin azlığın.
Axşamacan aralarda acdıqca,
Atam aşkar anlatmazdı aclığın.
Ayırardı atam alan aylıqdan
Azuqəyə, anam ayın axırı.
Artırmağı alınmazdı azlıqdan,
Aydınlıqdı arzuların axarı.
Aldadanda avamlıqla atanı,
Anlayaraq atmacalar atardı.
Asanlıqla açmayırdı aranı,
Aldığını arifanə alardı.
Ailəni alovlardan adladar,
Aydınlığa aparandı atalar.
Addımların axırını anladar,
Atalarla ağrı-acı azalar.
Azğınlaşıb adamlığı aşanda,
Ağır-ağır anladardı adamı.
Adamlığa ayıb addım atanda,
Axtarıram axirətlik atamı.
Könlümüzün kəsişdiyi küçədə
Könlümüzün kəsişdiyi küçədən,
Kədərimin karvanıyla keçirəm.
Kin-küdurət kəlmələri kəsəndən,
Kainatdan küsə-küsə köçürəm.
Küçəmizin koma-koma kirinin,
Kənarından köməkləşib keçmişik.
Köksümdəki "könlüqırıq" kirimir,
Köləsiyəm kökləndiyim keçmişin.
Kübarlığın keyfiyyəti kafidir,
Kobud kübar kasıbyana kecinir.
Köşədəki kababçının kefidir,
Keyfiyyətsiz kabablarla keçinir.
Keçidlərdən keçənlərin köməyi,
Körpə-körpə küçükləri kökəldir.
Keçidlərin küskün, kefsiz köpəyi,
Kefli-kefli keçənləri kövrəldir.
Bağışla
Bəla birdən buxovladı, bağladı,
Biləyini bükəmmədim, bağışla.
Bəxtəvərlik bir baxışa bağlıdı,
Baxışına bürünmədim, bağışla.
Bağlanmağın başlanğıcı başqadır,
Bəhrəsiylə bəxtiyarlıq başladı.
Bəstə boyun buludlardan başdadır,
Böyütmədim, bəzəmədim, bağışla.
Boynu bükük bu bəndəyə baxmadın,
Baxışların bəlalıdı, batmandı.
Bu beynimə bir başqası batmadı,
Bəhanədən, bezəmmədim, bağışla!..
Bəxt badəsi baxmaz başa, biliyə,
Bir balatək büküb basar bələyə.
Bilə-bilə batdı başım bəlaya,
Biganəyə bənzəmədim, bağışla.
Hardasan?
Həyatımın hilalı,
Hədiyyəsi, halalı,
Həqiqətlim, həyalım,
Hardasan?
Həmfikirəm hüznünə,
Heyrətamiz hissinə,
Həsrətliyəm hüsnünə,
Hardasan?
Hökmdarım, hakimim,
Havadarım, həkimim,
Hirslənənim, həlimim,
Hardasan?
Hekayətim, hikmətim,
Hərtərəfli hörmətim,
Hayladığım həsrətim,
Hardasan?
Hüdudsuzum, havalım,
Həm həmdəmim, həyanım,
Həmsöhbətim, həyatım,
Hardasan?
Sahillərin sevgisi
Səhər-səhər sahildə
Sular səni soruşdu.
Sular salan sehrdə,
Söhbət sakit sovuşdu.
Söyləmədim sirrimi,
Sahil sevən sulara.
Səpələdim səbrimi
Sən soruşan suala.
Sevgisiylə sarılır,
Sular satmır sahili.
Sanki sular sayılır
Sahillərin sahibi.
Sevgilərdən səninlə,
Söyləyərdik sitatlar.
Saniyəydi səninlə,
Sahildəki saatlar.
Sevgimin sarı simi,
Sızıldayır sonadək.
Sazlayıram səsimi,
Sulardakı sonatək.
Sən sərvəti sevəndən,
Sirdaşımdır siqara.
Söhbəti söyləmədim
Sahildəki sulara.
Sualları susdurub,
Söyləmədim sirrimtək.
Sandım suyun saflığı
Saxtalaşar sənintək.
© Müəllif hüquqları qorunur! Mətndən istifadə etdikdə istinad mütləqdir!
