Sözün gözlərində
Sözün gözlərində
yaş donub.
Ayrılıq qar kimi yağır,
dilimdən
qərib-qərib üşüyən adına
Gəl-gəl barı, ay insafsız,
unutmağı öyrət,
unutduğun qadına...
Dilimin ucunda
Uzaqlarda üşüyür
boynumu qucaqlamaq
həsrətilə
düyün düşən qolların...
Gözləri doluxsunub
sənə gələn yolların...
Əllərimin həniri
yaralı göyərçintək
hələ də çırpınır ovcunda.
Adın qəzaya düşdü
Dilimin ucunda.
Xəfif-xəfif
Baharda kol dibində
Xəfif-xəfif
Gülümsəyən bənövşə kimi
Sevdim səni...
Səni elə sevdim,
"Sevgi" sözünün dodağı
çatladı...
Səni elə sevdim,
Həsrət utandı
özündən...
Xatirə
Xəbərin varmı?
Könlümün xatirə
mövsümüdür...
Barmaqlarım səni soruşur
Ovcuma tökülən göz
yaşlarımdan.
Sahil küçəsi
Alar məni qoynuna
Mavi Bakı gecəsi.
Sahildə məni gözlər
tənha Sahil küçəsi.
Bu küçədə nə qədər
xatirələr dolaşır.
Bu küçədə insantək
boz küləklər dolaşar.
Yağan yağışlar yuyar
cığırımı, izimi.
Bu küçədə gəzirəm
indi özüm özümü.
Üşüyürəm sözə sarı
Gözlərimə payız gəlir,
Bulanır ömrün suları.
Batıram dərya gözünə,
Üşüyürəm sözə sarı.
Yola çıxdım fəsil-fəsil,
Bu yol bir payız nağılı.
Bir ah imiş ömrün səsi,
Alıb başımdan ağılı.
Ömrümə xəzan dağılıb,
Günüm sarı, gecəm sarı.
Ustad, sən dəsmal əvəzi
Gözlərimə sözü sarı.
Xəbərin yox
Keçib karvan yanımızdan,
Bir ah qopub canımızdan.
Qərənfilə qanımızdan
İçirmişik, xəbərin yox!
Yaşıl çöllər, şiş təpələr,
Dəniz susar, gah ləpələr.
Sinəmiz üstə qəlpələr,
Bitirmişik, xəbərin yox!
Bulud alıb göy üzünü,
Gün itirib gündüzünü.
Axtarırıq yer üzünü, -
İtirmişik, xəbərin yox!
Gəlmərəm
Qayıdıb ötən günlərə,
Xəyallara qapılmaram.
Boşuna yorma özünü,
İtmişəmsə, tapılmaram.
Yalanların sənin olsun,
Daha yaxına gəlmərəm.
Yıxıldı arzu, istəyim,
Daha yuxuna gəlmərəm.
Göy üzünə çəkilmişəm,
Daha yerlərə gəlmərəm.
Yaxın nədir, sən yaşayan
Şəhərə belə gəlmərəm.
Qağayılar
Qağayılar
qırçın-qırçın dalğalar kimi
səpələnir dənizə.
Bir qız dayanıb sahildə
qayalarla göz-gözə.
Bir gəmi ayrılır
uzaq limandan.
Bir ürək qopmaq istəyir
küləkdən, yağışdan, tufandan.
Bu mənəm, sahildə tək.
Gələcək o gəmi,
o yağış, o külək,
bir də...
Şəhidlər
Bir sehirli qaranlığın,
Köynəyindən keçib gəldik.
Alnımızın yazısını,
Boyumuza biçib gəldik.
Ömrü güllə darağı tək,
Boşaltdıq vaxtın köksünə.
Son nəfəsi güzgü kimi,
Tutduq dünyanın üzünə.
Yoxmuş cavabsız bir sual,
Ölüm də bir cavab imiş.
Ölüm sevməzlər içində,
Ölmək də bir savab imiş.
© Müəllif hüquqları qorunur! Mətndən istifadə etdikdə istinad mütləqdir!
