Ol da
Aqşin Evrənə
Gəl geyək köhnəni,
köhnə çəkməni,
gəl gedək xoşbaxt olaq...
Bakının "Kofe-mofe" antikafesində
bu mümkündü
Əgər
özümüzdən, kölgəmizdən, ölkəmizdən,
Bütün öyrəndiklərimizdən
bir masa uzaqda otursaq.
Bu mümkündü,
Əgər yağışda çətirini açmayan əcaib adam
Ətrafına yığılsa,
sıx kütləvi izdiham.
Yaysa bu görüşün fotolarını
Sosial şəbəkələrdə
İnstagram.
Və sən bu axşam
taksidən düşsən payıza...
Xoşbəxtliyə gedən bu ən qısa
Yolda
Kimsə olmayacaq
qırmızı yanan işıqforda
nə sağda, nə solda.
Hamı futbolda olacaq o vaxt,
Futbolda.
Qarşı səkidəki Fast-footda
Bir gözəlçə ancaq üzümüzə qiymət oxuyacaq
orda
Dollarda.
Gözlərin ulduz istəyəcək,
Köynəyi, qolsuz istəyəcək,
Musiqim tam yeni, daha geniş əhatəli,
Blutuz istəyəcək,
Orda.
Allah bunu göstərməsin
Geniş ekranlı monitorda!
Ol da, xoşbəxt orda.
Ol da.
Orda xoşbəxt olaq,
Orda.
Antişeir: bu axşam ölürüm
Bu axşam ölürüm, məni kimsə tutamaz,
Sən məni tutamazsan, ulduzlar tutamaz...
Səninçün ağlamaz,
Qılmaz namaz, yerə atmaz canamaz,
Parisdəki Monparnas!
Gecikəcəkmi bu dəfə də
Hamletin dostu Fortinbras?
Sussaz,
bir az,
dodaqlarım üzərinə son sözlərim,
Qan kimi sıçramaz!
Gör nə günlərə qaldın, öz bəlandır,
Çək, Balaş.
Bu axşam ölürüm,
kimsə məni tutamaz.
Hətta uşaqlıqda gördüyüm
Kinoqəhrəman Fantomaz
məni sabaha saxlamaz.
Bu kimyavi parçalanmadan
ayrılan qaz,
Hətta Qazprom qaz ambarlarına belə sığmaz!!!
Öz bəlandır, çək, Balaş!
Bu axşam ölürüm, kimsə məni tutamaz.
Polislərin gözyaşardıcı qazı olmasa
bu insanlar heç ağlamaz!
Gör nə günlərə qaldın, öz bəlandır,
Çək, Balaş!
Boynumu bir iti ülgüc imzalayar-imzalamaz,
Əfv fərmanımı oxuyacaq
Stiven Kinq kimi, Jül Vern kimi
bir başqa yazıçı fantast!
Bu axşam ölürüm,
kimsə məni tutamaz...
Bu kimyavi parçalanmalardan ayrılan yüngül qaz
Mənim balonumu doldursa
Şarım havaya qalxmaz!
Bu axşam ölürüm,
kimsə məni tutamaz.
TRT-Avaz
məni tirajlamaz.
Məni sizlər kopyalamaz.
Gecikəcək bu dəfə də
Hamletin dostu Fortinbras...
Qoqolsayağı
Gürcüstandaydım.
Özümü, velisopedimi küləyin tam ixtiyarına
buraxdım...
Bir xarabalığa catdım...
Cibimdə silah axtardım.
"Xortdanın cəhənnəm məktubları"
Yazılan bu evdə
Gördüm Haqverdiyev də
Danışır mənimlə!
Elə bil Azneftdə!
Sonra əbədiləşir
Bürünc barelyefdə!
Qəpiklərimi saydım.
Xortdanın evinə
İndi də bilmirəm
Necə gəlib çıxmışdım.
Bilirəm,
Axtarmamışdım.
Bütün gecə qanımı sovuran ağcaqanaddan
səhərin ilk nurunda
intiqamımı aldım.
Divarı al qana boyadım.
Dərhal geriyə adladım.
Nəsə anladım.
Anladım.
Qorxdum baxam həyətdəki itə,
Bilirdim çevrilib olacaq yırtıcı ifritə!
Girmişdim çox qəliz qorxulu süjetə...
Qoqolun yazdığı vəsiyyətə.
Qəfil peyda olan bir dəli Afət də
Çəkirdi məni ağır cinayətə.
Qan sıçrayırdı bu mifdən.
Heç nə məni qoruya bilməzdi
Qoqol kimi müəllifdən!
"Viy" romanın tam mətnini oxumalıydım
Bu apokrifdən!
Səhər məsləhətlər alırdım
Psixoterapevtdən!
"X Lady"
Striptiz klubdamı?
Youtubdamı?
Səni lüm-lüt gördüm?
Başqasıyla cüt gördüm,
Həyat süjetini çox şit gördüm
Lap axırda...
Bizim nağılda?
Uşaqlıqda gördüyün
hər köhnə, unudulmaz film,
naxışları itmiş hər əziz kilim
öz axırını, öz son naxışını
mütləq sənə yazdıracaq.
Bəlkə hələ pozduracaq...
Həyat bir gün mütləq öz süjetindən
kənara sıçrayacaq
Bahalı qolf kluba gedib burulan yolda
Bankomatlardan azca solda.
Niyə, qara eynəyin gözündən sürüşdü?
Niyə, qəfil baxışlarımız görüşdü
Bu filmə, bu qədim kilimə,
Qiymətlərdəki endirimə
Baxdığımız zaman?
Heç...Mən indi
"X men" brendi reklamçısıyam, sən "X lady"
Mən indi Dartanyanam, sən Miledi.
Gəl dəyişək bütün romanların,
yalanların
Şit süjetini...
Maqnit qasırğası
Deyirdim, bu nə başağrısıdı?
Deyirdin, səbəb
maqnit qasırğasıdı.
Deyirdim, baxdığımız filmlərdən o hansıdı?
Deyirdin, qurtar, gecənin yarısıdı...
Deyirdim,
Mənlə öpüşsən,
özü də, vəhşi-vəhşi...
Görəcəksən necə əriyəcək
Dağların,
dodaqların dəmir filizi...
Dəyişəcək həyatının ən azı
otuz-qırx faizi...
Deyirdin, fəqət həyatımıza
maqnit qasırğalarının təsiri
Edib bizi
tərs talenin əsiri...
Deyirdim, etsən bunun tərsini, əksini
Palçıq gölməçələrdən bir başqa cür
görünəcək o gün
bizim şəhərin əksi...
Deyirdim ki,
Görəcəksən taksi gözləyir bizi orda,
Qırmızı taksi.
Fəqət telefonuna bu vaxt
bir mesaj gələrdi
çox şəxsi.
Ancaq bunun tam əksi, tərsi
baş verirdi həmişə,
Səni dəvət edirdilər axmaq bir televerilişə
Deyirdin,
uzaq planetlərdəki maqnit qasırğalarının təsiridi -
əsir saxlayır bizi...
Dirilmə
Mövludu diriltdim -
şeirin cadusuyla
"Qoy, bura tökdüyün zibil
Ölənlərinin ehsanı olsun!
Qoy, təzə taxma dişlərim
Çənəmdə yaxşıca bir oturuşsun!
Lənətlərim lap öldürücu olacaq!"
Kimdi?
Hansı yerimdi?
Hansı dissertasiyasız alimdı,
Radio FM-di,
Hansı ölümdü, hansı itimdi,
Hansı filmdi,
Kor mexanizmdi,
Məxfi, gizli daxilimdi,
Bu lənət dolu qraffitini köhnə Bakı divarına yazan?
Sonra azca fərqli incə hüsn-xətlə,
Azca ləzzətlə
öz diş həkiminin telefonunu
Bu lənətinə reklam kimi artıran?
Kimdi o?
Deyirsiz, müasir Dədəm Qorquddu?
Yox eyyy...
Yetim Mövluddu.
Bir də gördün yediyi xəngəl qurutu
Unutdu!
Çayını tam soyutdu.
Son tikəni diri uddu...
Sonra hamını qorxutdu
Öz yalançı ani ölümüylə.
Qəfil dirilib, qara kömürlə
Lənətlərini həkk etdi kirli divarlara.
Bir gün tiryəki artıq düşdü, necə deyərlər,
Doğrudan öldü.
Öləndə siqareti hələ də tüstülüydü.
Restorandaydıq.
Sahibi, cümlələrinin axırını yedi,
dedi, kəkələdi
qorxa-qorxa,
Görəndə qapıya necə yaxınlaşır
Qara "Volqa:"
"Aparın meyidini, burda qalmasın sizin sovxa!"
Müşahidə videokameralarını aldatmaqdan ötrü
Bildirmədik Mövlud ölüdü.
Əlləri çiynimizdə,
göz vura-vura bir-birimizə
Mövludu da qoşub yalançı söhbətimizə,
Çıxdıq restorandan.
Qəfil Mövludu tanıyanlardan
Bıri salam verdi Mövluda...
Aktyor dramatizmi lazımdı burda,
Nəsə dedim burnumda.
Tər vardı ey, vücudumda,
Day ilişmədik itə-qurda.
Güvənib Mövludun cibindəki xırda-mırdaya,
Mindik qara taksiyə.
Getdik bütün yolların əksinə, tam tərsinə.
Axır, çiynini silkələdim.
Mövludu, tək onun
eşidə biləcək ahənglə səslədim:
"Ay yetim,
Dirildin?
Taksi pulunu indi necə, mənmi ödəyim?
Depresyondayım
Depresyondayım,
Düşdüm "black out"a,
Xəbər sızdı sarı mətbuata!
Bil, bu xarabada
elə bir foto çəkməlisən ki,
zibil vedrəsi düşməsin fotokadra!
Əks nəticəlidir burda
Reklam çarxlarındakı
"Sağlam qida!"
Çexovun yazdığı "6-cı palata" da,
Qollarımız mütləq
Çevrilməliydi ya qanada,
Yaxud paslı qandala!
Bu əlkimyanı rejissor
Əlisəttar Atakişiyev yaxşı göstərib,
elə bil rəngləyib,
Rəndələyib
"Sehrli xalat" da!
Depresyondayım,
Depresyonda!
Futbolçularla cərimə skamyasını bölüşürəm
Alt şüurumda!
Bank soymaq girir hərdən ağlıma,
nələrsə yazılır alnıma...
Amma, amma...
depresyondayım, depresyonda,
unutuldum, aldatıldım...
Çox yalnızım.
Ancaq yenə də sən tərəfə
daranır mənim sevgim, mənim saçım!
Daxili duyğularım!
Depresyondayım,
Depresyondayım...
Unuduldum, aldatıldım!
Çox yalnızım.
Ancaq yenə də sən tərəfə
daranır mənim sevgim, mənim saçım!
Daxili duyğularım!
© Müəllif hüquqları qorunur! Mətndən istifadə etdikdə istinad mütləqdir!
