Qıymayın uşaqlara
Ay-Günəş istəyirlər,
Nur ələnsin cahana.
Şeh, yağış diləyirlər,
Təbiət gəlsin cana.
İstəyirlər gül, çiçək
Ətri çöksün hər yana.
Raketləri, topları
Tuşlamayın onlara.
Tanrıdan gələn səsdi:
- Qıymayın uşaqlara!
Uşaqları gül üstə
Kəpənəklər gözləyir.
Səkilərdə gəzişən
Göyərçinlər səsləyir.
Bülbüllər, qaranquşlar
Şux nəğmələr bəsləyir.
Bu rəngarəng dünyanı,
Boyamayın siz qara.
Ey faşist-terrorçular,
- Qıymayın uşaqlara!
Arzuları tumurcuq,
İstəkləri qönçədi.
Yaşamaq həvəsləri
Hər istəkdən öncədi.
Baxışları ovsunlu,
Gülüşləri incədi.
Dünyanın sinəsinə
Vurmayın ağır yara.
Ey faşist-terrorçular,
- Qıymayın uşaqlara!
Əl boyda uşaqların
Ömrünü söndürdünüz.
Gecə şirin yuxuda,
Yataqda öldürdünüz.
Neçə məsum körpəni
Ölümə güldürdünüz.
Bu vəhşi əməllərdən
Dünya gəlibdi zara.
Daha yetər, son qoyun,
Son qoyun terrorlara.
Bu, Tanrının səsidi:
- Qıymayın uşaqlara!
Cır tut
Budağa yapışıbdı,
Nə suyu var, nə dadı.
Xoşlamırlar uşaqlar,
Cır tutdur onun adı.
Ağ tut
Yaxına gəl, çəkinmə,
Ağ tutdan ye birini.
Çox xoşuna gələcək,
Bal kimi şipşirindi.
Xar tut
Köməyə çat, babacan,
Barmaqlarım oldu qan.
Dəcəllik etməmişəm,
Dərib yedim xar tutdan!
Nar
Babanın narı vardı,
Ortadan narı yardı.
Uşaqlar daddı nardan
Çoxlu giləsi vardı.
Akvariumda balıqlar
Akvariumda
Balıqlar üzür.
Asəf onları
Heyrətlə süzür.
Rəngarəngdilər
Burda balıqlar.
Qara, qırmızı
Göy, narıncı var.
Fere balıqlar
Şux dəcəldillər.
Dəniz meləykə,
Kəpənəyilər
Çox gözəldilər.
Hələ bir baxın
Qara neona.
Üzüb çatammır
Astronaot ona.
Asəf deyinir:
- Balıqlar suda
Nədən boğulmur?
Suda onlara
Bəs, soyuq olmur?
Yeməyi necə
Suda yeyirlər?
Hələ şənlənib
Nəğmə deyirlər.
Baxmaqla doymur
O özəlliyə
Asəf vurulur
Bu gözəlliyə.
Dovşan bərəsi
Şabranda örüşü,
Çəpərə alıbdılar.
Dovşalara çox geniş
Bir bərə salıbdılar.
Dovşanların rəngləri
Ağ, qaradı, boz, sarı.
Hər cürə yaşdadılar,
Bərənin dovşanları.
Qaldıqları yuvalar
Dayaz deyil, dərindir.
Qış çağları istidir,
Yay günlər sərindir.
Bərədə cərgə-cərgə
Ot tayası qurublar.
Yorğun düşmüş dovşanlar,
Burda mürgü vurublar.
Bəziləri dəcəldi.
Yerli-yersiz dalaşır.
Dinclik nədir bilməzlər
Bərə boyu dolaşır.
Çox incə olsalar da,
Dovşanların dişləri,
Kələm, kök, ağac şiri,
Çeynəməkdir işləri.
Yolunuz düşsə əgər,
Ay uşaqlar, gələrsiz
Bu dovşan bələsini
Heyranlıqla süzərsiz.
© Müəllif hüquqları qorunur! Mətndən istifadə etdikdə istinad mütləqdir!
