Şeirlər
***
Bir də o balaca damlar var e
O damlarda içi xəfif…
Zərrə-zərrə, xəyal-xəyal adamlar
yaşayır.
Evləri də, küçələri də balacadı...
O damlarda ilin-günün bu vaxtı
pəncərədə damlalar da
lal-dinməzdi- danışmır.
Tavana ha yağış yağsa da
bir soba yandırırsan, alışmır
Canın yanıb, kül olsa da...
...Bir də zərrə-zərrə,
xəyal-xəyal adamlar var e
Baxırsan, sübh şəfəqidi...
Əlləri bulud-bulud uçan,
gözlərində göy üzü açan
dalğın dalğalar kimidi...
Bir də günəşi görməyəndə
ruhunda günəş dəmləyər onlar.
Sevdiyi rəngə günəş deyər uşaqlar...
Yəni kimisinin günəşi mavi,
dənizi sarı...
Şşş... Susun! Əksini söyləməyin!
Belə xoşbəxt olurlar o damın adamları...
Açın pəncərələri yaşıl yarpağa sarı...
Görün!
Bir-birində can bulan o ürkək budaqları,
bir-birini sükutla sevən qar dənələri...
Daha heç nə demirəm,
bağlayın pərdələri!
Nə gözəl dərd çəkirəm...
Mən indi qara gecələrin
divanə Leylalarından...
Mən indi həsrəti atam kimi,
anam kimi bağrıma basıram.
Sağ olsun, heç getmir qapımdan,
Sağ olsun, çəkilmir dumanlar başımdan.
Bilmirlər əynimə
don biçmişəm göz yaşımdan...
Mən indi anamın buludlanan gözlərində
ağrı çəkirəm,
xəbəri yoxdu.
İndi anamdan, atamdan çox
xatirələrə bənzəyirəm...
İndi əllərim bulud,
saçlarım hüzn...
Nə gözəl dərd çəkirəm,
nə gözəl sevir məni göy üzü...
Qışlar çöküb təqvimimə...
Təki qırışlar çökməsin
sevdiyim ana üzünə,
sevgili göy üzünə...
İndi hamı məktub yazar göz yaşına...
Sonra göndərər gözlərimin göylərinə.
Gözlərim də heç qocalmayan,
üzü qırış götürməyən o
"Ana damlaların" dolanar başına...
Və... Ana damlalar bir gün anamla
köçərlər ürəyimə.
Öpərəm əllərindən...
Anama müjdə verərəm:
- Bax, göz yaşım ana oldu, ana!
Yolçu...
Küləklər... anam küləklər,
külümdə yanan küləklər...
Gözlərimdə çiçəklənən,
saçımda solan küləklər...
Nədi? Nə haray salmısız?
Yad qapıda qocalmısız...
Nə olsun ki, qayıtmısız
Virandı o dam, küləklər.
...atam öldü... torpaq, üşü!
...gülün soldu... yarpaq, üşü!
...ahım oldu Allah... üşü!
Fərmanım edam, küləklər.
Eyy, uçurum! Bu nə qədər?...
...çölü yalın, içi kədər.
Qərib yolçum, bir nəfəs dər!
Əridi son "şam küləklər..."
Bax, evimin ömrü qərib...
Hamı ondan üz döndərib.
Tanrı göyə günəş sərib...
Sübh nədən axşam, küləklər?..
...ağac adam, toxun mənə
Budağınam... oxun mənə.
Burax gəlsin qoxun mənə...
Çəkil yolundan, küləklər!
Ömür-səhra, ölümsə - qum...
Göyə üfür, gözünü yum.
Ocaq-ocaq külünü soyun...
Yuxuydu... oyan, küləklər.
© Müəllif hüquqları qorunur! Mətndən istifadə etdikdə istinad mütləqdir!
