Darıxanım yox
Ahım bir sevginin məzar yeridi,
Ah çəkdim, üstümə məzar yeridi!
Son görüş yerim də həmin yer idi,
Mənim bu dünyada darıxanım yox!
Sən adda nəyim var, yıxıb gedirəm,
Həsrətin əlini sıxıb gedirəm.
Daha bu ömürdən çıxıb gedirəm,
Mənim bu dünyada darıxanım yox!
Dərd sinəm üstədi, deyir oxşama,
Baxan yox qəlbimdə alışan şama.
Ümüd yollarımın üzü axşama,
Mənim bu dünyada darıxanım yox!
Qanayan yarama demədim duz at,
Yanan ömrüm üstə bir əlçim buz at.
Uzat əllərini, bir misra uzat,
Mənim bu dünyada darıxanım yox!
Sənə sevmək öyrədəcəyəm
Qonub saçlarına, əlim oxuyar,
Kövrək pıçıltılar sevgi qoxuyar.
Gecələr dərdimi verib yuxuya,
Mən sənə sevməyi öyrədəcəyəm!
Unudub fələyin qarğışlarını,
İsidib taleyin naxışlarını,
Öpüb çiçək-çiçək baxışlarını,
Mən sənə sevməyi öyrədəcəyəm!
Yüz yol söylədim, ürək, ağrıma,
Bu ömrü gəl yola verək, ağrıma,
Səni arzum kimi basıb bağrıma,
Mən sənə sevməyi öyrədəcəyəm!
Çox gəzmə könlümün qəm dağlarında,
Qəmdən havalanır qəm dağlarımda.
Adın çiçəkləyər dodaqlarımda,
Mən sənə sevməyi öyrədəcəyəm!
Gəlmərəm
Qayıdıb ötən günlərə,
Xəyallara qapılmaram.
Boşuna yorma özünü,
İtmişəmsə, tapılmaram.
Yalanların sənin olsun,
Daha yaxına gəlmərəm.
Yıxıldı arzu, istəyim,
Daha yuxuna gəlmərəm.
Göy üzünə çəkilmişəm,
Daha yerlərə gəlmərəm.
Yaxın nədir, sən yaşayan
Şəhərə belə gəlmərəm.
Üşüyən sevgi
Əlacsız sığınmışam
göz yaşı qoxulu
xatirələrə...
Ana,
Ömrümə bulud-bulud
çöküb intizarın.
Titrəyən bədənim
bəyaz kəfən kimi bükülmüş
köynəyimin yaxasını
ağrılar açır.
Ana,
Səndən sonra saçı ağarmış
Ümidimin gözü önündə
bəxtimin boynuna
qolunu salmış ayrılığın
dodağı qaçır.
Ana,
Mən Vətən sevgisinin
atəşinə yandım.
Mən yandıqca
ruhumda "sən" də yanırsan.
Ana,
Heç görmüsənmi,
yanan ocağın
necə üşüdüyünü?
Ana!
Xəbərin yox
Keçib karvan yanımızdan,
Bir ah qopub canımızdan
Qərənfilə qanımızdan
İçirmişik, xəbərin yox!
Yaşıl çöllər, şiş təpələr,
Dəniz susar, gah ləpələr.
Sinəmiz üstə qəlpələr
Bitirmişik, xəbərin yox!
Bulud alar göy üzünü,
Gün itirib gündüzünü.
Axtarırıq yer üzünü, -
İtirmişik, xəbərin yox!
Üşüyürəm sözə sarı
Gözlərimə payız gəlir,
Bulanır ömrün suları.
Batıram dərya gözünə,
Üşüyürəm sözə sarı.
Yola çıxdım fəsil-fəsil,
Bu yol bir payız nağılı.
Bir ah imiş ömrün səsi,
Alıb başımdan ağılı.
Ömrümə xəzan dağılıb,
Günüm sarı, gecəm sarı.
Ustad, sən dəsmal əvəzi
Gözlərimə sözü sarı.
Sahil küçəsi
Alar məni qoynuna
Mavi Bakı gecəsi.
Sahildə məni gözlər
tənha Sahil küçəsi.
Bu küçədə nə qədər
xatirələr dolaşır.
Bu küçədə insantək
boz küləklər dolaşar.
Yağan yağışlar yuyar
cığırımı, izimi.
Bu küçədə gəzirəm
indi özüm özümü.
Sənin sahilin
İçimdə bir dəniz ölüb,
Duzlu suların yuxusu
ləpələnir xatirələrimdə...
Yaşıl-yaşıl
yosun qoxusu gəlir
kirpiklərimdən...
Üzür göz yaşlarımda
ölü balıqların səsi.
Bu ölü dənizin sahilində
səbrim
havalı-havalı gəzir.
...İçimdə ölən dəniz,
Əvvəlimi, sonramı
ölmək-ölməkdir.
Ölmək -Tanrı səbrinin
sahilinə gəlməkdir...
Mən sənin sahilinəm,
İçimdə ölən dəniz.
Xatirə
Xəbərin varmı?
könlümün xatirə
mövsümüdür...
Barmaqlarım səni soruşur
Ovcuma tökülən göz
yaşlarımdan.
Dilimin ucunda
Uzaqlarda üşüyür
boynumu qucaqlamaq
həsrətilə
düyün düşən qolların...
Gözləri doluxsunub
sənə gələn yolların...
Əllərimin həniri
yaralı göyərçintək
hələ də çırpınır ovcunda.
Adın qəzaya düşdü
Dilimin ucunda.
Xəfif-xəfif
Baharda kol dibində
Xəfif-xəfif
Gülümsəyən bənövşə kimi
Sevdim səni...
Səni elə sevdim,
"Sevgi"sözünün dodağı
çatladı...
Səni elə sevdim,
Həsrət utandı
özündən...
Sonuncu misra
Yazdığım şeirlər
məndən əvvəl doğulub...
Mən alın yazımdan əvvəl,
çox əvvəl doğulmuşam.
Alın yazıma çatanacan
bulud-bulud dolmuşam,
sular kimi
axıb-axıb durulmuşam...
İndi ömrümün yollarını
toz basmış xalça kimi
çırpıram varaqlar üstə;
tökülür bir misra ümid,
bir misra sevgi,
bir misra qəm...
beləcə varaqlar üstə
yaralı quş kimi
çırpınır sinəm...
beləcə varaqlar üstə
üşüyür bir misra mən...
Bu misranın sirrini
deməyəcəyəm heç kimə.
Bu sonuncu misra
qara qəlpə kimi
sancılıb içimə...
Şeirlərim məndən əvvəl doğulub.
Heyif, Tanrı qoymadı
Şeirlərimdən əvvəl doğulum.
İndi mən
taleyimdən əvvəl doğulan
şeirlərimin
sonuncu misrasıyam
səkkizinci
səhifədə...
© Müəllif hüquqları qorunur! Mətndən istifadə etdikdə istinad mütləqdir!
