Füzulini oxuyanda
Füzulini oxuyanda
Sözlər bir-bir çiçək açır.
Ulduz kimi parıldayıb,
Şimşək kimi işıq saçır.
Füzulini oxuyanda,
Hər sözün öz rəngi olur,
Sözün sözlə cəngi olur,
Sözün sözlə rəqsi olur.
Füzulini oxuyanda,
Füzuli çox nəhəng olur.
Füzulini oxuyanda,
Çox şairlər yazıq olur.
Bir qəzəli beş şairdən,
On kitabdan ağır olur,
Füzulini oxuyanda
Adam yaman fağır olur.
Ümidsiz ölmək də
istəmir adam
Bir ağlın budağından yapışıb,
Neçə-neçə ağlıdayaz yaşayır.
M.Araz
Ağlın budağı kəsilib, Məmməd!
Dəniz də boy vermir ağlıdayaza.
Biz öz əlimizlə gor qaza-qaza,
Ümid bağlamışıq olar-olmaza.
Yenə köhnə mərəz, köhnə vərdişlər,
Din-məzhəb hamısı itib ortada.
Yenə köhnə oyun, köhnə vərdişlər,
Təzə oyunçular bitib ortada.
Yenə cığır itib, yollar dolaşıb,
Yenə də qarışıb ağıllı başlar.
Yenə gədiklərdə qurdlar ulaşır,
Yenə iç davası salıb qardaşlar.
Oba bölük-bölük, el bölük-bölük,
Kimin kimə borcu qalıb bilmirəm.
İrsi xəstəlikdir üzüdönüklük,
Belə dərdin əlacını görmürəm.
Dərd çəkən çoxalıb, yaman çoxdu, çox,
Bu da xəstəlikdi, yoluxar adam.
Xəstə çoxdu, amma təbib yoxdu, yox,
Ümidsiz ölmək də istəmir adam.
Müharibə
Müharibə -
Tankın, topun, təyyarənin
İnsan üstə kişnəməsi.
Müharibə -
Siyasətin zor vasitəsi.
Torpaqların kobud əllə
Biçilməsi.
Bəzisinin böyüməsi,
Bəzisinin kiçilməsi.
Müharibə -
Böyük-böyük dövlətlərin
Çeşid-çeşid bazarlığı.
Hərəsinin öz şum yeri,
Məzarlığı.
Məzarlıqda yüz minlərlə,
Milyonlarla başdaşları.
Məzarların üzərində,
Tökülən göz yaşları.
Səbəbkarı -
Siyasətin quzğunları.
Onlar salır
Bu dəhşətli qırğınları.
Dünya nizamını
Pozan da onlar,
Məhkəmə hökmünü
Yazan da onlar.
İnsanlıqdan nəsibini
Almamışlar.
Siyasətçi olsalar da
Hələ insan olmamışlar .
Kim onların əlindən,
Ala bilsə sükanı.
O, da xilas edər,
Bu bəladan dünyanı.
Müharibə -
Gülən gözün qapanması.
Bir ürəyin
Bir patronla dayanması .
Müharibə,
Bundan artıq
De, nəsən, nə?!
Yerə baxıb
Hər şey torpaq altında,
O da ayaq altında.
Göydə nə axtarırsız?
Yerə baxıb tapın da.
Öz ata-anasına
Kim daş olmaq istəyir
Bu Vətən qalasına?
Qoy əvvəl oğul olsun
Öz ata-anasına.
Bilmədim
Aman Allah!
Aman, aman.
Xırdalandı dağlar yaman.
Güvəndiyim sal qayalar
Çınqıl-çınqıl ovuldular.
Darvazadan girməyənlər.
Qapılardan qovuldular.
Zirvələrdən enməyənlər
Bir tikəyə boğuldular.
Kaş öləydim,
Mən bunları görməyəydim!
Ağlım kəsdi,
Gözüm gördü,
İnam öldü,
Mən ölmədim.
Öləmmədim.
Bundan sonra
Yaşamağın mənası nə?
Anlamadım, billəmmədim?!
Vəfalı it
Sahibi gəlməmişdi,
İt hürürdü o ki var.
Qonşular görməmişdi
Onu belə davakar.
Biri dedi, acdı o,
Biri dedi, susuzdu o.
Biri dedi, xəstədi,
Bəlkə də quduzdu o.
Başladı ulamağa,
Zənciri yalamağa.
Onun gücü çatmırdı
Gedəni qaytarmağa.
Birdən zəncir qırıldı,
Yığılanlar dağıldı.
Vəfalı it son dəfə
Var səsiylə bağırdı.
© Müəllif hüquqları qorunur! Mətndən istifadə etdikdə istinad mütləqdir!
