Vətəndən uzaqlaşdıqca Vətənə daha çox bağlanırmış adam…
YAŞIL, YA BƏYAZ ADA
Təyyarədən baxıram,
Hava soyuq, ayazdı…
Adı yaşıl olsa da,
Bu ada bəmbəyazdı…
Bura Qrinlandiyadı,
"Qrin" yaşıl, "lənd" ada…
Qarlı dağlar, dərələr
Nələri salmır yada?
Şaxta coşqun suların
Dilinə kilid vurub.
Qış dənizdə elə bil
Qardan tayalar qurub.
Günəş əridə bilmir
Bu yerdə buzu, qarı.
Yuxularında görür
Yaşıl ada baharı.
Günəş şəfəq saçsa da,
Ada sazaqdan əsir…
Soyuqluğu artırır
Təyyarənin kölgəsi…
Yaz yaşıl libasına
Bürünüb, burdan köçüb.
Qış buranı özünə
Əbədi məskən seçib…
Günəşin gücü çatmır
Gətirməyə baharı…
Bəlkə insan nəfəsi
Əridə burda qarı…
MƏNİM ÜÇÜN
Mənim üçün insan rolda yox,
həyatda daha mənalı,
daha gözəl, daha qüdrətlidir.
Mənim üçün
Hollivudun səs-küylü,
yerə ulduzlar döşənmiş,
işıqları bərq vuran küçələrindən çox,
üstünə Hollivud sözü yazılmış dağ
daha mənalı və əzəmətlidir…
VƏTƏNDƏN UZAQLAŞDIQCA
İstəməzdim ki,
qürbətin ləzzətini dadam,
Hər addımbaşı dərk eləyirəm ki,
burda ögeyəm, yadam…
Sən demə dünyanın mərkəzi
insanın doğulduğu yer imiş -
Vətəndən uzaqlaşdıqca,
Vətənə daha çox bağlanırmış adam…
SAHİLDƏ DÜŞÜNCƏLƏR
Adının sakit olmağına baxmayın,
sakitcə-sakitcə işini görür
Sakit okean…
Elə bil özündən kiçiklərə
yandıq verir Sakit okean…
Əlində imkanı olsa dağı-daşı
qoynunda qərq eləyərdi…
Əlində imkanı olsa,
Yer üzünü suya bələyərdi…
Dağın yarğanlarını uçursa da,
Cövhərini, mayasını apara bilməyib.
Torpağını, qumunu yuyub aparsa da,
daşını, qayasını apara bilməyib…
Külək əsrlərdən bəridi
sahilə hücüm çəkən su alayına
bələdçilik eləyir…
Ancaq nəhəng-nəhəng qayalar
nəhəng-nəhəng dalğaları
çilik-çilik eləyir…
Sakit okeanın
adının sakitliyinə baxmayın,
Qarşısını kəsən uca-uca dağlara
hücüm çəkib əsrlərcə,
çalışıb onların dibini yumağa…
Ancaq ulu Yaradanın
iradəsi qarşısında
o boyda nəhəng okean sakitləşib,
dönüb yumağa…
***
Bilirəm ki,
bu həvəs, bu istək
bir neçə günlükdü -
qoynuna girəndə
düşsən də haldan-hala,
boynuma qol dolayanda
düşsəm də haldan-hala…
Sakit okean, sənin mənə məhəbbətin
sevgi deyil, köpükdü…
Elə mən də öz Xəzərimi,
öz bulaqlarımızı,
öz çaylarımızı düşünürəm
sənin yanında ola-ola…
DÜNYA MƏNİM EVİMDİ
Qoyma söz bərədən ötə,
Söz ovdu, şair ovçudu…
İlahi verən qələmin
Səngəri şair ovcudu…
Elə ki, həsrətli kimi
Ovcuma qələm sığınır,
Mənim sevdalı könülümə
Elə bil aləm sığınır…
Sevgi həyat cövhəridi,
Sevgi süstlüyə qənimdi!
Ürəyimdə eşq nuru var,
Sanıram dünya mənimdi…
Şükür, bu günə min şükür,
Necə gözəl imiş həyat!
Qələmin evi əlimdi,
Mənim evimsə kainat…
ÜRƏYİM BULAQ İSTƏYİR
Elə bil nəsə çatışmır
bu boyda gözəllik içində…
Sakit okean da deyilmiş
məni sakitləşdirmək gücündə…
Alnımdan tər süzülə-süzülə
üzü dağlara sarı qalxıram,
ürəyimdə ağrı, nisgil
sıldırımlı yamaclara baxıram…
Dağlarımıza bənzər dağ axtarıram,
qayaların döşündən çağlayan
bulaq axtarıram…
Gözəlliyə əsir olan gözlərim
dünyadan nəsə qeyri-adi bir
pay istəyir…
Bu boyda okean mənə bəs eləmir,
ürəyim bulaq, çay istəyir…
DAHA YAXŞI BİLİRƏM
Dünyanı gözəlləşdirən
şairin sevən qəlbidir;
Gözlərim həmişə kimisə,
nəyisə axtarır -
Gözəllikdən ötrü ölürəm…
Məni cəmiyyətdən çox
təbiət özünə cəlb edir,
çünki təbiətin dilini
cəmiyyətin dilindən
daha yaxşı bilirəm…
HASAR VƏ KÖRPÜ
Gözəllik alova döndərib
sevdalı ürəyimin qorunu.
Burda dağlar, dərələr,
göllər, çaylar, meşələr, ağaclar,
çiçəklər, böcəklər hasarla yox,
sevgi ilə qorunur…
Burda heç kəsə,
heç nəyə biganə qalmırlar.
Burda gözəlliyi bülbül kimi
hasar qəfəsə salmırlar…
Hamı sadədi,
bir-birinə mehribandı,
üzlərdə təbəssüm çiçək-çiçəkdi…
Hasar çəkib insanları
bir-birindən ayırmaq yox,
körpü salıb ayrı düşənləri
qovuşdurmaq gərəkdi…
MALİBU DAĞLARINDA
Qəlbimdə ağrı, nisgil
Malibu dağlarında gəzirəm.
Elə bil əlim çatmayan,
ünüm yetməyən yurdumun
yay mənzərələrini
görməyə tələsirəm…
Kəndimizi yada salır
kölgəsinə sürü sığan ağaclar.
Kəndimizi yada salır
Vələmirli yamaclar…
Ancaq nə bu ağaclar,
nə qurşağa çıxan vələmir,
mənim könül yarama
məlhəm eləmir…
MALİBUDAN BAXARKƏN
Okeanın böyüklüyünü
görmək üçün dağdan,
Dağın böyüklüyünü
görmək üçün isə
Okeandan baxmaq lazımdı…
O böyda okeanın
qarşısını saxlaya bilmək üçün
bu boyda dağ lazımdı…
Bizə isə
Yaradanın böyüklüyünü
dərk eləyə-eləyə
insan kimi yaşamaq lazımdı…
MƏLƏKLƏR ŞƏHƏRİ
Bura mələklər şəhəridi,
Havası məlhəmdi…
Suyu elə bil
Abü-Zəmzəmdi…
Allah bu şəhərin taleyini
Bilə-bilə belə yazdı:
Burda ağaclar xəzan,
torpaq qar üzünə həsrətdi,
Burda həmişə yazdı…
Dağlar kəsib qarşısını,
Bura qışı buraxmır…
Okean kəsib qarşısını,
Bura yayı buraxmır…
Burda adam istidən bişmir,
Burda adam soyuqdan üşümür,
Burda adam tənhalıqdan darıxmır…
RƏNGLİ DALĞALAR
Bu gün qəribə bir gündü -
Sakit okeanın qoynunda da,
sahilində də dalğa var!
Elə bil ağ dalğalara meydan oxuyur,
sahildəki rəngli dalğalar…
Sakit okeanın sahilində
dünya ölkələrinin bayraqları
əzəmətlə yellənir…
Bayraqlar arasında dalğalanan
üçrəngli bayrağımı görəndə
gözlərimdə sevinc yaşları sellənir…
Içimə xoşbəxtlik duyğuları çökür,
Şükür, bu günə min şükür!
Uçmağa bircə qanadım yoxdu,
elə bil alıcı bir quşam…
Qürbətdə bir parça vətənə dönüb
Azərbaycan bayrağı,
qaçıb ona sığınmışam…
Mənə də qismət imiş
Santa Monikaya gəlmək
ölkələrin, xalqların
bu həmrəylik günündə.
Elə bil Sakit okean ağ bayraq qaldırıb
"rəngli dalğalar"ın önündə…
KATALİNA ADASI
Dünyanın çox
möcüzələrinin səbəbini
hələ də kimsə bilmir,
görəsən bu nə sirdi?! -
Min illərdi Sakit okean
Katalina adasını
alsa da mühasirəyə,
onu əsir edə bilmir ki, bilmir,
özü isə balaca bir
adanın önündə əsir-yesirdi…
Katalina gəmilərə yol göstərən
mayaka bənzəyir,
gecələr çırağbana dönür,
gur işıq verir…
Sakit okeana təslim olmayan bu ada
ona yandıq vermir, yaraşıq verir…
Sular QOVUŞAN YERDƏ...
Yayın bu cırhacırında
həsrət sazağında üşüyürəm.
Ballona çayının sahilindəki
qayalıqda əyləşib,
Ağa çayını,
Bərgüşadı,
Həkərini düşünürəm…
Ballona çayının
Sakit okeana qovuşduğu yerə
baxa-baxa,
içimə həsrət yağışları yağa-yağa,
qulaq verirəm şimşək şaqqıltısına -
qəlbimin harayına:
Bəs mən nə vaxt qovuşacam
Həkəriyə, Bərgüşada, Ağa çayına?!
BİR AZDAN...
Hər şeydan, hamıdan
yuxarıda Allah,
Allahdan aşağıda
kainat, göy, səyyarələr…
Göydən aşağıda
içi insan dolu təyyarələr…
Təyyarədən aşağı buludlar,
Buludlardan aşağı yer, dəniz…
Bir azdan vətənə enəcəyik,
İlahi, necə xoşbəxtik biz!
***
Gözlərim dikilibdir
Üzü vətənə sarı.
Ondan doğma kimin var,
Şair, Vətənə sarıl!
***
Qürbətdə çox darıxmışam,
çox şükür, indi vətəndəyəm…
Gərək indən belə
"Sənsiz bir günüm olmasın,
Vətən!" - deyəm…
© Müəllif hüquqları qorunur! Mətndən istifadə etdikdə istinad mütləqdir!
