1. Ən gözəl qəmləri geyir -
Ürək də dəb xəstəsidi...
2. İçinə bir gül budağı düşmüşdü -
Bahar gəlmişdi suya.
3. Hərdən oxuyuram məktublarını -
Yolunu tapmışam diri qalmağın.
4. Ürəyini qalın geyin -
Çöldə ayrılıq əsir.
5. Həyat, nə yaxşı varsan
Lap mənim olmasan da.
6. Gül əkmişəm əllərinin ətrinə...
7. Ay girib dənizə ləpələnirdi...
8. Hardasa, uzaqda kaman ağlayır -
Bəlkə bir nəğməni güllələyirlər?..
9. Quşlar göy üzünə uçmaq öyrədir -
Bir azdan göylər də qanadlanacaq...
10. Çox adam itirdim bu təklik üçün...
11. Diksinər yanağın göz yaşlarından - ağlama ana.
12. Kimin günahıdı görən bu dünya?
13. Yuxusunda azadlığını görürdü
Çərçivəyə salınmış şəkil.
14. Dodaqlarının izi qalmışdı
Su içdiyin bulaqda.
Öpdüm suyu -
Öpdüm dodaqlarının
Suda qalan izini...
15. Bənövşə boynunu elə büküb ki,
Elə bil onun da atası yoxdu.
16. Sənin ad gününə baharı dərdim...
17. Bir gül yarpağından boylanar mənə,
Məni yoldan edər alagöz şeir.
18. Bəlkə də bir qızın təbəssümüymüş,
Sonradan böyüdüb günəş ediblər?!
19. Ömür hesab dərsi imiş -
İndi çıxma fəslindəyəm...
20. Hər qönçə bir gülün uşaqlığıdı.
21. Mən elə təşbehəm, elə təşbehəm,
Hər şeirin içinə girən deyiləm.
22. Yüz il yaşasan belə
Ömür yarımçıq qalır.
23. Yer - göyün altında bir zirzəmidi.
24. Nə qədər ki, qara rəng var,
Sənin gözlərini unutmayacam.
25. İnsan qızıl tozu kimidi -
Əyarı gec bilinər.
26. Ölümdən qorunmaq üçün
Hamı öz həyatında gizlənib...
27. Elə istəyirəm gün işığından
O yetim uşağa bir libas tikim.
28. Adını dilimin ucunda tutub...
Sonra da ömürlük susub qalardım.
29. Asta-asta yeriyirdi -
Qorxurdu ki, yer kürəsi qurtara.
30. Hərdən yada sal məni -
Məni unutmaq üçün.
31. Qaranlıq otaqda şam da günəşdi.
32. Nə gözəl əyləncə olar:
Bütün günü oturub,
Bir gülün açmasına tamaşa etmək...
33. Daş atdım, suların xətrinə dəydi -
Daha daş atmağın daşını atdım.
34. Tanrı bu dünyanı sənə həsr edib...
35. Sənin şəklini çəkəcəm, Vətən -
Başını dik tutarsan!
36. Adını gülə qoydular -
Gülü bəxtəvər etdilər.
37. Sən mənim sevgi sonbeşiyimsən.
38. Mən səni bu axan çaydan
Bir damla sutək götürdüm...
39. Kədər, gündüz gəl bizə
Gecə yolu azarsan.
40. Ürəyimi açdım sənə,
elə yüngülləşdim ki,
sən demə, bütün gücüm
deyəcəyim söz imiş...
41. Şəkildə ağlayan o uşağın
göz yaşını silə bilsəm...
42. Bir azdan bir payız öldürəcəklər.
43. Nəsimi asıldı dar ağacından -
Tarix Nəsimidən asıldı qaldı...
44. Sənə bir sirr açım, Allah
Ancaq aramızda qalsın.
45. Payızı kim qorxudub -
Heyva-heyva saralıb?
46. Yağış nə biləydi ki,
Çölün çətiri yoxdu...
47. Korun gözündə də açılır səhər.
48. Günəş - göy üzünün çəkdiyi ahdı...
49. Üzündə ay doğan qız
o ayın neçəsidi?
50. Şeir olmaq istəyirdim,
Şair oldum.
51. Elə böləsən ki, dəni quşlara,
Quşlar da danışa ədalətindən.
52. Hər gün bir əsgər kimidi -
"Vurulub" qoşundan çıxır...
53. Hamı qonaqdı dünyada,
Hamı qonaqlıqda deyil.
54. Dünya, eşidirsənmi
O yetimin göz yaşının səsini?!
55. Uşaq say öyrənmək istəmirdi -
Deyirdi ki,
Allah birsə, bir sayılmaz!
56. Allah danışmasa belə
Ən yaxşı həmsöhbətdi.
57. İstəyin bu ola tək:
Səhər günəşi görmək üçün
Axşam yuxuya getmək...
58. Qanadlarında
göy üzü gətirmişdi o quş.
59. Nə olsun ki, karam? -
milyon səsin içindən də
Sənin səsini tanıyıram...
60. Odu söndürəndə su özü yandı.
61. Sənin pəncərəndən baxdım dünyaya -
İlahi, bu dünya nə gözəl imiş!
62. Dünyanın siyasi xəritəsində
Sizin evi küçə-küçə gəzirəm...
63. Gülün üstündə şeh
o qədər gözəl idi,
gülü qoyub şehi dərmək istədim.
64. Məzar üstə gül kimisən -
Qoxlaya bilmirəm səni.
65. Balası sularda batan ana
qəbir kimi qucaqlamışdı dənizi.
66. Mənimlə yol getdin, yola getmədin...
67. Ah, bu qədər güzgülərin
Birində əksin qalmayıb.
68. Şəhid məzarıyla bərkitmişik ki,
bu torpaq yıxılmasın.
69. Bir damla götürsən, azalar dəniz.
70. Xoşbəxtlik də göy üzütək
Uzaqdan baxmaq üçünmüş...
71. Həyat - müvəqqəti çətinlikdi
Bir azdan çıxıb gedəcək.
72. Qumru quşu elə oxuyurdu
elə bil ağlayırdı.
Qumru nənəm elə ağlayırdı ki,
elə bil oxuyurdu...
73. Ayrı-ayrı söz olsaq da,
Biz eyni cinasdayıq.
74. Bir qədəh xatirədən
Sərxoş olmaq olurmuş.
75. Bu kədər - kol dibidi
Ürəyim bənövşədi.
76. Bəlkə elə göy üzü də
nə vaxtsa, dəniz imiş -
çəkilib sonradan göy üzü olub?!
77. Günəş sən tərəfdən doğduğu üçün
Adını qoymuşam: "gündoğar qadın".
78. Suyu elə çoxalıb ki,
boğulur dəniz.
79. Məni barı bir dəfə də
Həqiqətlə aldadın.
80. Bir ağ göl kimidi göy üzündə ay.
81. Baxdıq uca dağlara
Boyumuz da böyüdü.
82. Belə bölgü apardım:
Dünyanı sənə verdim,
Səni də mən götürdüm...
83. Ölüm, heç insafdan deyil ha,
bütün ömür boyu oturub
səni gözləmək.
84. Dəlixananın divarında
səliqəsiz yazı:
"ağlın varsa, bura düşmə".
85. Bəlkə biz nağılları da
göydən düşən üç almaya görə sevdik?
86. Bir adamlıq yeri boşdu ömrümün...
87. On beşindən sonra
bütün qızlar oddu,
on beşindən sonra
bütün oğlanlar oda həssas.
88. Hər il - elə bil bir ata evidi,
İçində on iki övlad oturub.
89. Quşa atılan güllə
həm də göy üzünə dəyir.
90. Başın üstə göy üzü var -
Başından arxayın ol.
91. Bu tərəflərdə ağıllı adamları
sevmirlər -
mən də dəli deyiləm ki, ağıllı olum?!
92. Durub haqq gəzirəm mən bu dünyada,
Heç ayın günləri bərabər deyil.
93. Sənsiz dünya nədir ki? -
təkadamlıq çarpayı.
94. Əgər qoxlamasan, solar o çiçək...
95. Sənsiz ömür keçirmək,
güldana qoyulmuş gül ilə
bahar yaşamaq kimidi.
96. Əlifbadakı "A" hərfi kimisən -
hər şey səndən sonra gəlir.
97. Göyqurşağı Tanrının
həm də rəssam olmağına
bir işarədir.
98. Elə yaşayasan: - üzr istəmədən...
99. Mən bir "kənar şəxs" imişəm -
sənin qapından içəri girmək
qadağanmış mənə, sevinc.
100. Həyat mane olur həyat sürməyə...
101. Bircə çiçək qalıbsa,
demək, hələ bahar var.
102. Bir misra yağışda neçə heca var?
103. Dünya adlı qatardan
Sərnişinlərə xəbərdarlıq:
"İtən ömürlərə görə,
dünya cavabdeh deyil".
104. Gözünün üstündə yeri olana
"gözaltı" demə.
105. Bu gün də məni ötüb keçdin -
bu gün də mənə çata bilmədin.
106. Qızmar günəşin istisindən
tez əridi yay...
107. Özünü qarış-qarış,
Üzünü qırış-qırış gəzdim, Vətən.
108. İş budur, bax -
Günəş kimi təmənnasız olmaq!
109. Qılınc doğuldum ki,
batım bir yana.
110. Sən yaşayan küçəni
Oğurladım şəhərdən...
111. Ağac dincəlirdi öz kölgəsində...
112. Axşam ulduzları yığar başına -
Ay da ürək etməz çölə tək çıxa...
113. Tək sudakı çiçəyin yox,
Suyun da öz qoxusu var...
114. Mən səni o qədər böyütdüm, Vətən
Gördüm ki, dünya da sığışar sənə...
115. O ay işığından bir şüşə salın -
Şüşəsi qırılmış bir bacayam mən...
116. Zər oldun ki, bilim zərin qədrini?!
117. Əlim aşağıdı, olsun, nə olsun,
Başımı yuxarı tutub gəzirəm...
118. Milyon il əvvəl də doğulsaydım
Oturub mən səni gözləyəcəkdim...
119. Gördüm ki, yanımda kağız tapılmır,
Bir gül ləçəyinə yazdım şeirimi.
120. Bu yağan yağışdı, ya göy üzündən
Yerə damla-damla payız tökülür?!
121. ...İlahi, at yoluma
Bir parça ay işığı...
© Müəllif hüquqları qorunur! Mətndən istifadə etdikdə istinad mütləqdir!
