Qara-qara adamların
arasından keçib getməyə çalışıram.
Qara-qara gödəkçələrin,
Qara-qara ayaqqabıların,
Qara-qara çantaların
Qara-qara əlcəklərin...
Çətin...
Qara-qara adamların arasında
Ürəyimdə qalır ağ-ağ fikirlər,
Boğazıma tıxanır
Ağ-ağ sözlər...
Küçədə satılan nar qalağında
Qırmızı-qırmızı umid axtarır
Gözüm..
Üzüm
Hər axşam söykəli şüşələrin
bu üzündən küləkli şəhərə
Lampalarının sarı işığında
Qar dənəsi axtara-axtara
Anqappaq çıxa bilərik, deyirəm,
Anqappaq çıxa bilərik səhərə...
***
Ağ qağayılara hopur
səhra karvanlarının qoxusu
Dəniz sahillərində
Əllərim qoynumda üşüyə - üşüyə
Üzümü soyuq dalaya dalaya
Bir səhra yuxusu görürəm...
Görürəm ki, səslənir zınqrovlar
Görürəm ki xırçıldayır qum
Dum -
duru günəş üfüqə əyilib,
gözlərimi qamaşdırır
Görürəm ki üzü qüruba ölürəm...
Oyatmır məni qağayı qanadlarının səsi
Böyük əzablardan sonra toz kimidir bədənim
Uzaqlarda,
Çox uzaqlarda
Qumun istiliyini dərimdə hiss edə-edə
Günəşlə səhranın arasında əriyir bədənim...
***
Gözlərimin yaşı
Yarpaq-yarpaq qopub düşmür
Çiçək-çiçək çiçəkləmir
Mən göz yaşı - göz yaşı təklənirəm...
Göy göyərçinlərə bənzədirəm göz yaşlarını,
Hər axşam onlara qoşulub uçuram
Hər səhər qonşu evinin artırmasının damına
Göy göyərçinlər üçün dən səpirəm...
***
Hər gecə
Qollarımı yana açıb
Özümü buraxmaq istəyirəm boşluğa
Beşinci mərtəbədən...
Nə cır şabalıd ağacının budağına
qonmaq qorxudur məni
Nə nəm asfalta çaxılmaq,
Nə elektrik xəttinə toxunmaq qorxudur məni
Aşağıda
Bir birinə qısılıb yatan pişikləri
Qorxutmaq qorxudur məni...
***
harda intizar var,
harda səma var
harda buludların boz dərinliyi
harda bir qadının çiyinlərində
ən gizli sirlərin öz dərinliyi...
əllərin uzana bilmədiyi yer,
gözlərin boylana bilmədiyi yer,
kişi ürəyinin döyüntüsündən
sözlərin boylana bilmədiyi yer...
məhəbbət xəyaldır,
həqiqət boğuq
dənizin sinəsi ölüm daşıyır
bizə elə gəlir şəhərlər evdir,
şəhərlər qapıdır, karvan qapısı
qocalar köç edir, Allah yaşıyır...
dayanır, baxmayır kim keçib gedir,
dayanır, eşitmir duaları da
özü hər yerdədir
ruhu bax burda,
bax burda: çiçəklər içən sularda...
kiçik bir yarpağın saplağındakı
qopmaq qorxusudur Allahın ruhu
böyük bir qayanın çatlağındakı
qarmaq qorxusudur Allahın ruhu...
mən onu tutmuşam ovuclarımda
dünyadan keçmişəm övuclarımda
Allahın quşların uçuşundakı
ruhunu içmişəm ovuclarımdan...
harda intizar var,
harda səma var
bir vərəq yazı var, bir qara qələm
qadın çiynindəki sirr nöqtəsində
unut şəhərləri,
mən o nöqtəyəm...
Atama
Baxıram uzun-uzun
Baxıram sonsuzluğa.
Səs yox,
yol yox,
kölgə yox.
Ayağıma toxunur ləpələri dənizin
Özü susuz, yatağı boşluğun dərinliyi...
Nə deməkdir var olmaq
Nə deməkdir, bilmirəm.
Bəlkə mən unutmuşam,
bəlkə o heç olmayıb.
Elə gedib, əlinin istisi də qalmayıb
Elə yoxdur, elə bil heç zaman doğulmayıb...
Bir tərəfim, bir yanım yoxdur..
Çox uzaqlara
Məktub yollaya bilsəm,
gedib yerinə çatmaz
Kim deyir uçurumlar ayaq altında olur
Mən bir boşluq duyuram,
hamı keçib o yerdən
Getdiyi yerə gedər,
Bir də geri qayıtmaz...
Nədir məni dindirən,
Kimdir dilimi açan?
Mən ki
Elə baxıram, baxıram bu boşluğa
Dəli kimi susmuşam, dəli kimi ölmüşəm,
Kimsə dirilə bilməz qarışıb sonsuzluğa...
© Müəllif hüquqları qorunur! Mətndən istifadə etdikdə istinad mütləqdir!
