Mənasız ömrümə məna gəldi, bax,
Eşqimi səninlə böləndən bəri.
Tanıdım eşqi mən, bildim o nədir
Səninçün yüz yol mən öləndən bəri.
Dünyanın halından lap bixəbərəm,
Ağlıma gəlməzdi belə sevərəm.
İntizar olsa da, çox bəxtəvərəm
Mən eşqin dadını biləndən bəri.
Dinləyib qəlbimin soraqlarını,
Yazıram eşqimin varaqlarını,
Vişnə çiçəyitək dodaqlarını
Büzüb, şirin-şirin güləndən bəri.
Lətifəm, könlümdə vardır birisi,
Mən onu sevəndən oldum dəlisi,
Dünyaya gözəlin gəlməz beləsi,
Məcnunam, səni mən sevəndən bəri.
© Müəllif hüquqları qorunur! Mətndən istifadə etdikdə istinad mütləqdir!
