Göylər şairi
Yüz xəta-bəladan Tanrı qorusun
ilhamı göylərdən gələn şairi.
Şeirində özünü gah "qara fəhlə",
gah "külli-ixtiyar" bilən şairi.
Sevək dil-dil ötüb sözdən bac alan,
aləmə səs salan, şahdan tac alan.
bir güclü misrayla ərşə ucalan,
bir zəif bəndində ölən şairi.
O da mücahiddir, millətə örnək,
duraq, salamına elliklə gedək.
Biz də Vaqif bilək, Nəsimi bilək
ölümün üzünə gülən şairi.
Hərdən güzəranı keçəndə acı
olur, lap, bir loxma çörək möhtacı.
Dolur ürəyinə yüz ağrı-acı,
tapır vaxtsız kədər, ələm şairi.
Təki tükənməsin, sözü bitməsin,
dərddən uzaq düşsün, qəmli ötməsin.
Qərəzli düşünüb əyri getməsin
tanıtsın düz yazan qələm şairi.*
* - Müqəddəs Quranımızın şairlər surəsinin (26) 224-226-cı ayələrinə işarədir
Hamınız qəhrəmansınız
44 günlük Vətən Müharibəsi zamanı
olmazın qəhrəmanlıqlar göstərmiş xüsusi
Təyinatlı Qüvvələrin bütün şəxsi heyətinə
Siz ey qorxu bilməz qurd ürəklilər,
qartal baxışları, şir biləklilər.
qaya kürəklilər, xoş diləklilər
bu yurda, bu elə şərəf-şansınız,
hamınız, hamınız qəhrəmansınız.
Sizin hər biriniz cəsur, hünərli,
zabitli, cavuşlu, adi əskərli.
Sözünüz imzanız qədər dəyərli,*
mərhəba, mükəmməl bir insansınız,
hamınız, hamınız qəhrəmansınız.
Qəzanız mübarək, ər oğlu ərlər,
Vətən çağırışına olduz səfərbər.
Düşmən daha çətin duruş gətirər,
çünki siz ona qan udduransınız,
hamınız, hamınız qəhrəmansınız.
Səngərlər dağıdıb qıran igidlər,
Rəqibi alnından vuran igidlər,
"Ohanyan səddini" yaran igidlər,
İndi bu yerlərə siz ad-sansınız,
hamınız, hamınız qəhrəmansınız.
Səninlə ucadır daim başımız
bu günün Həzisi - Hikmət paşamız.
sayəndə qürurlu günlər yaşadıq
qələbə müjdəli komandanımız,
hamınız, hamınız qəhrəmansınız.
* - İfadə möhtərəm Prezidentimiz
İlham Əliyevə məxsusdur.
İstəyimin qolları
İstəyimin qolları
ölçüsüzdür binadan,
duyğulu anlarımda
dörd tərəfə uzanır.
İstəyimin qolları
mənim güc simvolumdur,
neçə-neçə müşkülü
təmənnasız ram edir.
çətində dost qazanır.
İstəyimin qolları
gizli ilham pərimdir.
bir gülün qayğısıyla
meracadək ucalır.
İstəyimin qolları
narahatdır hər işdə,
yoluranda Tanrının
dərgahında dincəlir.
İstəyimin qolları
xoş arzu carçısıdır,
qoy heç zaman, heç yerdə
müjdəli arzuların
bağlanmasın yolları.
Kaş mənim də bircə yol
həsrətimə qovuşsun
istəyimin qolları.
Doğma ocaq
Qızım anasına deyir ki,
nə yaxşı, ata evimiz var,
biz də ürəklə gəlib-gedirik.
Bundan doğma, bundan məhrəm
heç bir yer ola bilməz.
Oğlum anasına deyir ki,
nə yaxşı, siz varsınız, ana,
sizsiz belə rahatlıq, bu cür istirahət
heç adamın ağlına da gəlməz.
Doğrudan da nə dərin
məna daşıyır bu sözlər:
ata ocağı, ana qucağı.
Atalı-analı evdən daha isti ocaq,
daha rahat məkan harda ola bilər?
Bu ocaq insanı həmişə,
anbaan səslər, gözlər.
Lap uzaqdan da gəlsən,
çox çətinliklə də olsa.
Ata evinə gələndə
İnsanın canına yeni güc-qüvvət,
sevgi dolu ruh dolar.
Şükr, nə yaxşı ki, bu günlər var.
nə yaxşı ki, ata ocağı adında
yerlər var.
İnsanı bu ocağa təkcə ayaqları yox,
həm də beyni, ürəyi aparar.
Biz də haçansa bu hissi yaşamışıq,
İndi isə...
Bizi heç bunun yarısıcan
gözləyən yerimiz yox,
Odur ki, heç xəyalımızdan da keçmir
bu cür istəklə harasa getməyimiz.
İndi bizim də sevincimiz,
dil-dil ötməyimiz
sizin gəlişinizlə bağlı.
İndi bizim də xoş ovqatımız
sizin şən çöhrənizlə,
gülüşünüzlə bağlı.
Yoxsa ki, bundan da gözəl
günmü görəcəyik?
Daha biz bundan sonra
kimi gözləyəcəyik,
hara gedəcəyik?
Ya da gedib kimi xoşhal
edəcəyik?
İndi bizim də xoş istirahətimiz
elə budur, bala.
Bizə də sizli günlər
bal dadır, bala.
© Müəllif hüquqları qorunur! Mətndən istifadə etdikdə istinad mütləqdir!
