Ey uzaqda dizini qucaqlayıb ağlayan, qadın, Bir dəfə tanımadın pəncərəmı, qapımı. Sən öyrətdin mənə sevməyi, sevilməyi, Sən xoşbəxt elədin evimdəki qadını.
Özgə qadın
Hər kişi,
Özgə qadından yüyürür evindəki qadına
Yüyürür, döşənir ayaqlarına.
Özgə qadından öyrənir necə
sevmək olar qadını,
O qadından öyrənir hətta çiçək almağı.
Ana olur, yar olur özgə qadın adama,
Üst-başında gəzdirir əlinin tumarını.
Soruşur çarpayını, de, hansı otaqdadı,
Pəncərə önündədir, ya qaranlıqdadı?
Qayğı kimi ələyir başına sualları:
De, neçədə yatırsan, de, neçədə durursan?
Mən verdiyim ətri harada saxlayırsan?
Köynəyinin yaxası niyə qırış-qırışdı?
Saçında ağaran tel mənə necə tanışdı…
Təzə şeir yazmısan? Ver üzünü köçürüm?
Bu gün sənə çayı da qoy mən özüm içirim.
Başdan-ayağa süzür səni bir ana kimi,
İlıq baxışlarıyla çəkir sənin şəklini.
İşıq verir gözünə,
Sevgi axır qanına,
Baxışları nur kimi çiçəklənir üzündə,
Bir qız heykəli doğur sənin düymə gözündə,
Ilahi baxışların altında sən süzürsən.
Uça-uça , qaça-qaça öz evinə gəlirsən,
Arvadın baxıb deyir:
- nə gözəl görünürsən?
Amma bilmir ki, səni belə gözəl eyləyən,
Ömür boyu axtardığı qadındı.
Sevgi şeirlərini, köhnə məktublarını
Tonqal kimi yandırdığı qadındı.
O günü qayçı ilə sənin şəkillərindən
Qadınları
Kəsib, kəsib doğradığı qadındı.
Ey uzaqda dizini qucaqlayıb ağlayan, qadın,
Bir dəfə tanımadın pəncərəmı, qapımı.
Sən öyrətdin mənə sevməyi, sevilməyi,
Sən xoşbəxt elədin evimdəki qadını.
Özgə qadın, içində ağlayarsan sən məni,
Gör neçə illərdi səni çöldə qoymuşam.
Heç bilmirəm yasıma necə durub gələrsən?
Ağrılar uyuyanda, göz yaşı soyuyanda,
Gecə ilə gələrsən, gecə ilə gedərsən.
Atlar
Televiziyada at saxlayan dedi ki, atları saxlamaq çətindi, böyük xərc tələb edir, kəsib ətini xarici ölkələrə ixrac edəcəyik.
Buraxın atı getsin atın yanında ölsün,
Buraxın atı getsin otun yanında ölsün,
Buraxın atı getsin itin yanında ölsün.
Amma kəsməyin qanadlı atları,
Oxşama, bayatı atları.
Buraxın meşəyə, dağa,
Azsın, gəlməsin,
Elə azdırın onu amma özü bilməsin,
Qoy atı şir yesin, şir parçalasın,
Göydə qartal qıy çəksin,
Yerdə çaqqal ulasın,
Amma qəssab əlində ölməsin kəhər atlar.
Axşam tək sinər atlar, açılar səhər atlar.
Atları kəsdinizmi qanadı yerə enməz,
Otlar at qanı görsə, bir də örüş göyərməz.
Dəryadan at çıxmaz, bir də at bizə gəlməz,
Kəsməyin, nə olar kəsməyin atları,
Qaşqa atları, səkil atları,
Qır atları, dür atları,
Göy otları, göy atları,
Qanadları, buludları,
Kəsməyin, nə olar, kəsməyin.
Atları vurun çaya, çayda boğulub ölsün,
Ucu şiş qayalardan uçub yıxılıb ölsün.
Üzəngisi qırılsın,
Yəhər dağılıb ölsün,
Yüyürüb qaranəfəs suyu içəndə ölsün,
İlxı içində ölsün, oba köçəndə ölsün.
Qəssab əlində ölməsin göy, kəhər atlar,
Ağ, kürən, atlar, qırmızı, çil, boztəhər atlar.
Əzizim, tər içində atlar çırpınar, ölləm,
Bədənimdən ağ qaçar, qara çırpınar, ölləm.
Gözlərimin qarası at kimi çapar, ölləm,
Huş kimi torpağa düşəndə yəhər, ölləm,
Tutar boğazımı yüyən tək qəhər, ölləm.
Kəsməyin, atları, kəsməyin,
Kəsməyin, muradları, kəsməyin.
Atlar kəsiləndə hey daylar, dayçalar ağlar,
İçində su saxlayan kasa çalalar ağlar.
Qarnında, sinəsində duman alalar ağlar,
Kənd atlar, qoşma atlar, nağıl, gəraylı atlar,
Tapqırlı, quşqunlu, qırmızı yallı atlar.
Ay əzizim, gözlərimə qan çilənib
Bu çəkdiyim naladan.
Qoy gözlərim görməsin
Kəhər atlar
yıxılanda havadan.
Göydə quşlar, yerdə uşaqlar
Gəlin düşək səngərdən çəkilək bir az geri,
Qaldıraq səngərlərə balaca uşaqları.
Nə qədər uşaq var qoy onlar da gətirsin
Dayansınlar üz-üzə, açılsın dodaqları.
Düşmən kəlməsi yoxdur uşaqların dilində,
Olsa-olsa əllərini bir-birinə vurarlar.
Səngərlərin içində, səngərlərin çölündə,
Lay-lay deyib kuklaya qəşəng evcik qurarlar.
O əsgər çəkməsinin izinə bax torpaqda,
Beş uşağın ayağı sığar onun içinə.
Dünən həmin ləpiri gilizlər doldururdu,
Bu gün uşaq səsləri yağır onun içinə.
İnsan bayraqlarıdı göydə oynayan əllər,
Öpürlər gülə -gülə bir - birinin əlini.
Biz öyrənə bilmədik dostluq dilini heç vaxt,
Gəlin gedək öyrənək körpələrin dilini.
Uşağa bax, əyilib boş patronu götürür,
Bələyir körpə kimi laylay deyir gör necə?
O güllənin dəydiyi o əsgərin anası
Necə ki bələyirdi öz oğlunu beləcə.
Ehey, sən kimsən, qaranlıqda gizlənən,
"Düşmən" sözünü atma uşaqların içinə.
Silahını yığışdır, rədd ol bizim dünyadan,
Qarışma, sən qarışma, uşaqların işinə.
Uşaqların ayağı torpağı bölə bilmir,
Necə ki, eyni yağır yer üzünə yağışlar.
Sülh haqqında yazılmış iki gözəl misradı:
Bir göy üzündə quşlar,
Bir də yerdə uşaqlar.
Zəng eləyirsən
Həyat yoldaşım xəstəxanadan hər gün zəng eləyirdi...
Qurban olum sənin televizoruna,
Hər gün izlədiyin xəbərlərinə.
Kəklik təşvişinə, qorxularına,
Gəlməyən göyərçin yuxularına,
Bitib-tükənməyən həsrətlərinə,
Təbbəssüm geyimli həkimlərinə,
Təzə bir xəbəri eşidən kimi,
Tələsik-tələsik zəng etməyinə.
Sən ki, televizora baxan deyildin,
Nədən televezora yoldaş olmusan?
Evimin içində gəzirəm səni,
Düymə gözlərimdə qan-yaş olmusan.
Evdə salladığın qaş-qabağından,
Uzaqdan zənglərin nə gözəl imiş.
Haqqın, ədalətin toranlığında
Sənin televizorun düz işləyirmiş.
Baxıb televizora zəng eləyirsən,
Qəşəm, qar yağacaq bu gün Bakıya.
Qalın paltarını geyin çıx evdən,
Bir az iti tərpən, yeyin çıx evdən.
Yollarda ləngimə üşüyərsən bax,
Əyninə palto gey, başına papaq.
İstəsən, heç işə getmə nə olar,
Evimizdə zoğal mürəbbəsi var,
Qırxbuğum, kəkotu, dağ nanəsi var,
Bir az da gözünə daş yarpızı qat,
Dəmlə iç, sonra da şirin -şirin yat.
Şəkərbura yemə şəkərin artar,
İpək əsəbini çəkər tarıma.
Qalın corabının yerin bilirsən,
Çıxart indi geyin ayaqlarına.
Qəşəm, kövrəlmişəm bilirsən nəyə?
Səndən paxlavanı gizlətməyimə.
Köynəyində çayın ləkələrinə,
Cibindəki kağız parçalarına,
Kağızda yarımçıq misralarına,
Ya bütöv, ya para dərmanlarına,
Əzilmiş sapsarı reseptlərinə,
Qorxub yazmadığın şeirlərinə.
Sevgi şeirlərinin üstündə səni
Aylarla, illərlə incitməyimə.
Dedilər bir şair tutublar dünən,
Deyəsən bizdə də kitabarı var.
Sənə qurban olum özünü gözlə,
Yenə soyuqlayıb burda havalar.
Gələn zənglərinlə düşürəm yenə,
Yayın istisinə, qışın qarına.
Nə deyim, nə deyim, nə deyim sənə,
Qurban olum sənin televizoruna.
© Müəllif hüquqları qorunur! Mətndən istifadə etdikdə istinad mütləqdir!
