Gözlərindən hiss olunur - ölümdən qorxmur bu adam... - Elvin İntiqamoğlunun şeirləri

Elə bil

Həyat

gah deyir addım at,

gah deyir dayan -

Elə bil

azyaşlı uşaq

işığı söndürür, yandırır...

Bəzən

adam tapa bimirəm mən

sevincimi bölüşməyə -

Elə bil

Başıma bədbəxt bir hadisə gəlib:

o yan durur,

bu yan durur...

Təkəm,

istəmirəm gecikəm.

Çatmalı olduğum yerə gedirəm qaça-qaça,

Qaytarır içimdəki səs

qaçmağa başladığım

yolun başlanğıcına -

Elə bil

Allah məni

gözlərimlə qaşlarımın arasında dayandırır...

Yenə

narahat oluram nəsə

günah eylədiyim gün.

Özümdən ixtiyarsız

gözübağlı dua edirəm yatağımda -

Elə bil

yuxuda Əzrail şapalaq vurub

əllərimi oyandırır...

Qiyamətdən əlamət

Daş yağacaq başımıza:

Dünyanın yığdığı daşlar

ətəyindən düşəcək -

Gözündən düşməyənlər

ürəyindən düşəcək...

Od yağacaq başımıza:

Günahlar dönəcək külə,

yer yanacaq həmin gün -

Şeytan qır qazanından

bir qab alov çəkəcək

acından ölənlər üçün...

Qan yağacaq başımıza:

Şəhidlərlə mələklər

gözləri yaşlı-yaşlı

yaxamızdan tutacaq -

Şəhidlər qərənfilləri

əməl dəftərimizin

başdaşına atacaq...

Bir günün tənhalığı

Bu evdə iki gün qabaq

iki nəfər var idi -

İndi ancaq biri var,

yetim qalıb elə bil...

Masanın üzərində çərçivəsiz,

əzik şəkil -

Şəkil siqaret qoxulu,

şəkil xatirə dolu...

Bir nəfərin əlində bir qədəh şərab,

gəzir otaqda ruh kimi:

Çıxıb gedən, gün gələcək,

bu yanlara cüt gələcək,

bu özünə gələnəcən...

Artıq zaman gec olacaq,

o itirdiyi zamanın

qədrini tez bilənəcən...

Yas saxlayır keçmişə,

üzün qırxmır bu adam...

Belə getsə

intiharla bitəcək -

Gözlərindən hiss olunur -

ölümdən qorxmur bu adam...

Mərhələ

Öncə dünya yarandı,

Adəm, Həvva yarandı.

Nə var sonra yarandı,

həyat təkamül etdi...

Seçildi cənnət ünvan,

xoş yaşayırdı insan.

Odlu-alovlu şeytan

nöqtəni vergül etdi...

Buğda İlahi məktub...

nöqsan Həvvaya mənsub,

nəfsinə oldu məğlub,

dünya tənəzzül etdi...

Güləyən qız

Gözlərinə yaraşmayır göz yaşı