Bayrağımı sevirəm
Bayrağımı sevirəm,
Yaşılı, qırmızını, göyünü.
Bir də, bir də vətənimin
Ay-ulduzlu göyünü.
Bayrağımı sevirəm,
Qoy ucalsın əllərdə.
Dalğalansın hər zaman
Nur üzlü könüllərdə.
Bayrağımı sevirəm,
Anamı sevən qədər.
Qürurum, sirdaşımdı
Ən azı ömrüm qədər.
Şəhidlər xiyabanı
Ziyarətə gəldiyim yer,
Diri-diri öldüyüm yer,
Baxıb öyündüyüm yer,
Şəhidlər xiyabanı.
Anaların qüruru,
Karvan gedir, yorulmur,
Allah! Necə qorunur
Şəhidlər xiyabanı!
Gedən getdi, gəlmədi,
Onlar sağdı, ölmədi,
Yerin-göyün məbədi
Şəhidlər xiyabanı.
Qışın oğlan çağında,
Qərənfillər bağında,
Gözəllik ünvanında
Şəhidlər xiyabanı.
Baxıram yol uzunu,
Çəkəmmirəm gözümü.
Ünvanıdır sözümün
Şəhidlər xiyabanı.
Hara aparır
Dünyama dür səpilir,
İlahinin səsindən.
Yunis Əmrə, Mevlana,
Veysəlin nəfəsindən.
Ruhumda min havacat,
Şah damar tərpənişdə.
Könülləri seyr edən,
Seçilmirəm dərvişdən.
Göz yaşım qəlbə axır,
Bu nə gözəllik Allah!
İlahilər xəzinəm,
Sənə gəlirik Allah!
Halım yerindən qopur,
Havalanıb uçuram.
Bu sədadan zövq alıb,
Ürəyimi açıram.
Bu səs sirri xüdadır,
Məni məndən qoparır.
Cənnət-məkan olmuşam,
Öz yanına aparır.
Aşıb-daşacaq
Pərvanə deyiləm odda alışam,
Zərbəni unudub susam, barışam,
Mənəm gözəllikdə dönən, yarışan,
Nadanlar gözümdə oyun-oyuncaq.
Dünyamla baş-başa qalmışam hələ,
Şipşirin xəyala dalmışam hələ,
Haçalı-keçidli yolmuşam hələ,
Hər sözüm-söhbətim qanad açacaq.
İmdadım Allahdan olacaq mənim,
Gör necə sadiqəm, qucacaq məni.
Ən rahat ilahi qalacıq mənim,
Ünvanım sevgiylə aşıb-daşacaq.
İnci gəzdim
Ümmanda inci gəzdim,
Könlüm nura boyandı.
Ruhumun hər əzası
Bircə-bircə oyandı.
Hislərim mələkləndi,
Gəzdim düzü-dünyanı.
Sevgimlə yola çıxdım,
Sevindirdim duyanı.
Ümmanda inci gəzdim,
Gəzdim düzəm yaxama.
Gözəlliyi pay verəm
Hər qarşıma çıxana.
Tanrıma üz tuturam
Yaman çaşıb qalmışam,
Zamandan baş açmıram.
Yox demirəm qorxağam,
Bu dünyadan qaçmıram.
Matım-qutum quruyur,
Yolumda nadan görsəm.
Mənə naşı deməyin,
Gördüklərimə gülsəm.
Tanrıma üz tuturam,
Kömək olsun bizlərə.
Sevinc, təbəssüm yaysın
Donuq qalmış üzlərə.
Gözəlliyə qərq olub
Külək məni məst edəcək bu gecə,
Külək mənə nəfəs verir, dəm verir.
Külək süzür, nəğmələnir elə bil,
Zildən enib ürəyimə bəm verir.
Söz-söhbətim onunladı, onunla,
Bu coşquyla ulduzlara çatıram.
Qəlbim yenə sətirlənir, düzülür,
Sevincimi sonsuzluğa qatıram.
Aman allah! Tənhalığın içində,
Toy-büsata, çal-çağıra dönmüşəm.
Ümman boyda gözəlliyə qərq olub,
Ürəyimi yerlə, göylə bölmüşəm.
Hoqqular
Ümid günəşin
Uzaqdan
Şüasına bənzər.
Payızın qoxusu
Qəlbimin
Sızıltısıdır.
Düşmənə
Haqsız yanaşma.
Ədalətli ol.
Yaxşılığı edən
Unudar.
Alan unutmaz.
Qış gəldi.
Hava təmizləndi.
Körpə nəfəsi kimi.
Yaxşılıq
İnsana zövq verər.
Ruhu təmizlər.
Könül gözəlləşdi.
İnsan
Nur tək saçdı.
Göydə
Ulduzlar sayrışır.
Arzularımın
Sayı qədər.
Yaz gəldi
Hər yan təzə-tər.
Ruhum gözəlliyə boyandı.
Paxıllıq
Cəhənnəm odu.
Ora düşən qurtulmaz.
Sevməyi bacar.
Sevsən, sevilərsən.
İnsanlıq
Ucalıqdır.
Alçaqlıq
Cəhənnəm odu.
Yaxşılığı et, unut.
Yolun açıq olsun.
Rəhimdil ol.
Rəhmin bol olsun.
Cənnəti
Bu dünyada qazanarsan.
Üzünün təbəssümü
Dörd yanı işıqlandırar.
Haqqı ucaldıb
Haqsıza örnək ol.
Varlı coşanda
Dəliqanlı.
Kasıb coşanda
Dəli deyərlər.
Niyyətini düz tut.
Yolun haçalanmasın.
Allaha zikr edib,
Şükrümü çatdırdım.
O məni gördü.
Bağışlamağı bacar.
Ruhun rahatlansın.
Təkəbbür
İnsanlığı
Məhv edir.
Sadə ol,
İnsanları sev.
Allah da səni sevər.
© Müəllif hüquqları qorunur! Mətndən istifadə etdikdə istinad mütləqdir!
