Hər kəsin nağılı var; biri vardı, biri yox... - Lütviyyə Əsgərzadə

Üçlüklər

Ümidlərimi yığıb-yığışdırdım aldım əllərimə,

Gözümdəki sən adlı yaş da yuvarlandı üzərinə

kim dəymişdi ürəyimə?

***

Yuxuda gördüklərimi yozuram, yozammıram,

Taleyimi pozuram, pozammıram.

Almışam əlimə qələm, özümə tale yazıram...

***

Bu şəhərin səs-küyündə,

İstisində, bürküsündə yeriyirəm candərdi,

Ümidlərim bəlkə bu yay göyərdi.

***

Bir geyinə bilmədiyim donun,

bir keçirə bilmədiyim bayramın təəssüfütək,

təəssüf ki, varsan ürəyimdə...

***

Gecənin soyuğu, payızın çisgini,

taleyim qurğuşun kimi çöküb üzərimə.

Üşünürəm, bürünmüşəm kədərimə.

***

Hər kəsin nağılı var; biri vardı, biri yox...

Mənim nağılım sənsən.

Göydən üç alma düşdü.

***

Yay günü yağış yağır,

Hansı günahkar buluddur -

Mənim tək içdən ağlayır?

***

Gözəllik başa bəla deyirlər,

Hələ cavansan, yaşa deyirlər...

Bəzən ölüm də gözəl.

***

Güvəndiyim təkcə səndin.

Sənli dağa qar yağar?

Üşünürəm.

***

Yenə dərdələşirəm səninlə,

Yenə bacarmıram ürəyimlə,

Səni asacaqdım, alıram ipdən.

***

Günləri saya-saya gəlirdim;

Sayını itirdim,

Səni də.

***

Bir uzun qış gecəsi,

dəlisov küləklərin səsi...

Yarımçıq qalmış, bir ad günü süfrəsi...

***

Boz yuxular görürəm,

Sənin suratına, mənim ovqatıma bənzəyir,

Dünən bir film izlədim, həyatımıza bənzəyir.

Bir ala bilmədiyim donun,

Bir keçirə bilmədiyim bayramın

Təəssüfü tək varsan, təəssüf ki, könlümdə.

***

Bir quşam,

hanı sarayım? -

Bir küncündə daldalanım.

***

Payızın son günü;

qurtarır yarpaq tökümü.

Bir yarpaq yellənir ağacda, naəlac-naəlac...

***

Küləyin uçurduğu yarpaqtək gücsüzkən

Tufanın qabağına düşüb gedirəm...

Hələ çox qovacaq məni, bilirəm.

***

Asıldı dilimdən yenə,

"nəbilim", "necə."

Ömürdən uzun bir gecə...

***

Axşam düşür... yandırsam şam,

Dua etsəm,

Dərgah qapısına ulaşsam...

***

Külək pəncərəmi döyəcləyir.

Saatın "tik", "tak"ı ruhumu,

Fikirlər əsir alıb könlümü...

***

Baxçasında Nərgizlər açmış,

balkonunu qızılgüllər qucaqlamış

bir ev, hey yuxuma gəlir...

***

Qəzetin baş köşəsində, sensasyon xəbər;

Aranqutanların nəsli kəsilir!!!

Yazıq insan.

***

Bir başqa sensasyon xəbər,

Orisaya meteorid düşüb, yanıb bir neçə insan.

Guya yanmırdı insan...

***

Bir yuxu görürdüm, uşaqlıqda.

Bir saray qururdum qayalıqda.

Yuxulara inandıq da...

***

Nə kimim var,

nə kimsəm,

olanlar da yox kimi...

***

Deyirsən, ölürəm, yanında ölsəm?

Ölüləri də heç sevmirəm,

Tərslikdən.

***

Gündüzüm narahat,

Gecəm narahat -

Dünyamız kimi...

Evdə həyat var,

Bayırda ölüm,

Dərdə bax, gülüm...

Nə ölüm yenidir

Nə də ki, olum.

Bəs nədir qorxum?..

© Müəllif hüquqları qorunur! Mətndən istifadə etdikdə istinad mütləqdir!