Qar çiçəkləri
Sənə çiçək almaq ağlıma gəlməz,
Gətirdim yurd boyda qar çiçəkləri.
Sırsıra- evlərin boyunbağısı,
Durub qar altında - yar çiçəkləyib.
De harda qalmısan? Gəlib çıxsana.
Xaraba ömrümü bir də yıxsana.
Qaraya ağ gəlib, gözüm, baxsana
Başdaşı - qar əlcək, gor çiçəkləyib.
O qədər dərd çəkdim, ölüm vız gəlir.
Yaza qış düşübdü, qışa yaz gəlir.
Böhtanda batmışam, sənə söz gəlir,
Ağ saça qar yağıb, qar çiçəkləyib.
Ölümünə tərk edilən adam
Gəmilər ölümünə tərk etdi,
Limanlarda qaldı
Salxım söyüd altında.
Qatarlar, təyyarələr getdi
Xoşbəxtcəsinə...
Onu ölümünə tərk etdilər.
Hamıya yüyürən
Hamıya qucaq adam,
Ocaq adam
Ölümünə tərk edildi.
Bütün bunlara rəğmən
Hayıf ki...
Bağışlayın,
Ölmədi
ölümünə tərk edilən adam.
Ölümünə atdılar, aldatdılar
Ölümünə vurdular, unutdular!
Sonra...
Özü-özünü satdı, aldatdı,
Yenə də ölmədi,
Bağışlayın,
Hayıf ki...
Çəkilmə
Məni məndən çəkdim,
Qoymadım ki,
batam mən bataqlıqda -
Bir uşaq qocanı,
Bir qosqoca uşağı
Çəkib qurtardım, şükür.
Ayağımdan yolları,
Əlimdən əlləri çırpdım.
Ömrümü toz basmışdı,
Çıxardıb əynimdən yaşanmış ömrü
Çırpına-çırpına çırpdım.
Sağ əlim tək dəliqanlı,
Sol əlim kimi fağıram.
Həyata həyat içindən
Çox-çox uzaqdan baxıram
Çəkdim apardım özümü
Məclislərin duzu kimi.
“Dünya qumardı” deyirlər,
O pokerin tuzu kimi,
əyrisi-düzü kimi
Çəkdim apardım özümü.
Özümü özümdən çəkib apardım,
oğlumdan-qızımdan çəkib apardım -
mən sevdalı, sən bazarçı,
sözümü sözümdən çəkib apardım
özümü özümdən çəkib apardım.
Sonda nə...
Yerdən atılanı göy götürmədi,
Göydən nə yağdı ki, Yer bitirmədi?
Bu sirli dünyamız sirr götürmədi,
Əvvəl nöqtə, sonra sual, sonda nə?
Açılan düyündə min bir düyün var,
Bitən hər oyunda təzə oyun var.
Sanma ki, bir yerin, bircə Göyün var,
Əvvəl nöqtə, sonra sual, sonda nə?
Yer adlı nənnidə yellən, ha yellən,
Düşüb öz dalınca teylən, ha teylən.
Nəynən gəlmişdin, gedirsən nəynən -
Əvvəl nöqtə, sonra sual, sonda nə?
Tək adam ordu kimi
Ordu kimi tək adam...
Burada nə gəzirsən,
Hamı bazarlıq oldu.
Nadan tutub hər yanı
Kürək-kürəyə
Ürək-ürəyə durmağa,
Bircə adammı qaldı?
Qırılan qoşun sərkərdəsi!
Burada nə gəzirsən?
Bir addımlıq yolun yox,
Bir adamlıq çıxışın.
Pulun, əlin, dilin yox,
Axır özünə sığışdın
Özündən çıxıb getməyə
Halın yox.
Üzündən görünür ki,
Döyüşməkdən yorulmuş
Meydanda tək qalmısan
Ay ordusu qırılmış.
Birləşin, birləşin
Bütün ölkələrin istedadsızları,
birləşin!
Qarşınızda dayanıb
Ordu kimi tək adam,
Tək adam ordu kimi!
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
