Azərbaycan Yazıçılar Birliyi, Azərbaycan Mədəniyyət Nazirliyi və “Space” telekanalının iştirakı ilə sentyabrın 27-dən noyabrın 9-a qədər Azərbaycan da daxil olmaqla 30 ölkədən 44 şair “Şuşa ili” çərçivəsində “Şuşaya salam!” layihəsində gözəl Şuşa üçün şeir oxuyacaq, şəhər haqqında danışacaqlar. Bu gün - 26 oktyabrda layihə tanınmış ABŞ şairi Aleksandr Səlimovun Şuşa barədə ürək sözləri və Şuşaya ithafən qiraəti ilə davam edir.
Aleksandr Səlimov / ABŞ
“Adım Aleksandr Səlimovdur. Mən Amerika Birləşmiş Ştatlarındanam. Azərbaycan xalqını Şuşanın işğaldan azad olunmasının növbəti ildönümü münasibətilə ürəkdən təbrik edirəm. İndi Şuşa ilidir. Öz gözəlliyi, gözəl təbiəti, dağları, çayları ilə, eləcə də tarixdən Azərbaycanın mədəniyyət mərkəzi kimi bilinən, dünyaya çoxlu gözəl şairlər və bəstəkarlar bəxş etmiş Şuşa şəhərinin ili. Mən şeirimi bu şəhərə ithaf edirəm. Salam, Şuşa!”
Qarın qana çevrildiyi
fevral soyuğu haqda xatirə
taleyə ünvanlanmış sual kimi
hər yerdən eşidilir.
Qan bahasına başa gəldi, amma dözdülər...
Ümidlə atdı nəbzlər:
vəfayla, güclə,
daha küləkdə yıxılmayaraq,
əksinə gərərək qanadlarını
alovların içərisində
genişdən də geniş açdılar -
zəfər nəğməsi dodaqlarında
zamanın dairələrini yararaq
varlıqlarının mavi bətnində,
keçmişlərinin yaşılında
və indinin qırmızısında;
bir qanad hilal oldu,
bir qanad da ulduz...
Yalnız çay olmaq istəyənlər
dağlardan axacaq,
bir vaxtlar anasını itirmiş,
amma sonda tapmış
bu torpağa
həyatı qaytaracaq.
Tərcümə: Səlim Babullaoğlu
© Müəllif hüquqları qorunur! Mətndən istifadə etdikdə istinad mütləqdir!
