"Şuşaya salam!" layihəsində İraq-Türkmən şairi Şəmsəddin Kuzəçidir - VİDEO

 

Azərbaycan Yazıçılar Birliyi, Azərbaycan Mədəniyyət Nazirliyi və “Space” telekanalının iştirakı ilə sentyabrın 27-dən noyabrın 9-a qədər Azərbaycan da daxil olmaqla 30 ölkədən 44 şair “Şuşa ili” çərçivəsində “Şuşaya salam!” layihəsində gözəl Şuşa üçün şeir oxuyacaq, şəhər haqqında danışacaqlar. Bu gün - 20 oktyabrda layihə İraq-Türkmən şairi Şəmsəddin Kuzəçi və onun Şuşa barədə ürək sözləri və Şuşaya ithafən qiraəti ilə davam edir.

 

Şəmsəddin Kuzəçi / İraq-Kərkük

Şəmsəddin Kuzəçi, Kərkük, İraq. Ümummilli Lider mərhum Heydər Əliyev dedi ki, tarixi araşdırdığımızda gördük Şimali Azərbaycan, Cənubi Azərbaycan, İraq türkmanları bir bütünün parçalarıdır. Və biz də o bütünün parçaları olaraq, İraq türkmanları olaraq “Şuşa ili” münasibətilə ən əvvəl Azərbaycan xalqını və Şuşa sakinlərini cani-dildən təbrik edirik. Şuşa həqiqətən Azərbaycanın qəlbidir, mədəniyyət mərkəzidir və təbiətin gözəlliyidir. Buna görə də təkrar Azərbaycan xalqını təbrik edirik.

Şuşa, salam. Bu şeiri sənin üçün oxuyuruq.

 

Gətirmişəm

Kərkükün qalasından

Öz Türkmən balasından

Mor sünbül lalasından

Məhəbbət gətirmişəm

 

Azərbaycan soyundan

Oğuz, bayat köyündən

Dəclə, Fərat suyundan

Dad-fəryad gətirmişəm

 

Füzuli nəfəsindən,

Kərbəla havasından,

Kuzəçinin səsindən

Min hoyrat gətirmişəm.

 

Kərkük, Təbriz, Marağa,

Xudam salma irağa,

Vətənim Qarabağa

Mən övlad gətirmişəm.

 

Hazırladı: Səlim Babullaoğlu


© Müəllif hüquqları qorunur! Mətndən istifadə etdikdə istinad mütləqdir!