Azərbaycan Yazıçılar Birliyi, Azərbaycan Mədəniyyət Nazirliyi və “Space” telekanalının iştirakı ilə sentyabrın 27-dən noyabrın 9-a qədər Azərbaycan da daxil olmaqla 30 ölkədən 44 şair “Şuşa ili” çərçivəsində “Şuşaya salam!” layihəsində gözəl Şuşa üçün şeir oxuyacaq, şəhər haqqında danışacaqlar. Bu gün – oktyabrın 6-da layihə görkəmli rumın şairi İon Hadırkanın Şuşa barədə ürək sözləri və Şuşaya ithafən qiraəti ilə davam edir.
İon Hadırka/ Rumıniya
Azərbaycan xalqını və Şuşa şəhərini ürəkdən salamlayıram.
Hələ qədimlərdən İpək yolunun üzərində yerləşən Şuşa şəhəri milli operanın vətəni və həqiqətən də Qafqazın konservatoriyasıdır. Şuşa bu gün də şairlərə, rəssamlara və tarixçilərə ilham verir.
Mən bilirəm ki, Şuşa böyük şair Molla Pənah Vaqifin vətənidir. Vaqif, almanca da daxil olmaqla, çoxlu sayda dilə çevrilib. Hesab edirəm ki, onun şeirləri ilə bizim böyük şairimiz Mihay Eminesku da tanış olub.
Kişineunun qonağı olmuş yazıçı Anar, yazıçı və kinorejissor, bizim böyük kinorejissor və şair Emil Lotyanunun müasiri və dostu olmuş Rüstəm İbrahimbəyov kimi yazıçıların adları da bizim üçün əzizdir.
Şuşa ənənələrin, incənətin və milli mədəniyyətin beşiyi və qalasıdır. Milli mədəniyyətin və dünya irsinin şəhəri adlanmaq onun haqqıdır.
Salam, Şuşa ! Əziz Şuşa, bu şeiri sənin üçün oxuyuram.
Buğdanın günəşli şərqisi
Gizlin aləmlərin gənc elçisi,
bulağın şır-şırından ruhlanan,
bizim və özünün əziz Günəşinə
danışqan Uddan şövqlənərək
şərqi qoşur:
“İnsan ordularından uzaqda
məni qoruyan
yerin yorğanı altdan
yazıram.
İmperiyanın qabığını qır,sındır,
odlu şüalarının iynəsilə
diblərinə işlə kökümün,
qardaşlarım buğda dənəciklərinin ürəyinə.
Böyüt bizi!
Xilas elə
bu uzun ölüm yuxusundan
və yayın bu yorucu yükündən
azad elə,
bir yerə topla bizi,
bir şahanə çələngə
ki, əyilməz sünbüllərin
sənin
ən uca nöqtədə
qızılı rənginə boyansınlar,
boylansınlar...”
Tərcümə: Səlim Babullaoğlu, Jalə İsmayıl
© Müəllif hüquqları qorunur! Mətndən istifadə etdikdə istinad mütləqdir!
