Pərviz Əbil 2002-ci ildə Salyan rayonunda anadan olub. Salyan rayonu 6 saylı tam orta məktəbin şagirdidir.
Tilsim
Sənin soyuqluğun işlədi cana,
Ruhumu don vurdu, cismim daraldı.
Sənsiz ölə-ölə yaşadım, amma
Ürəyim "sən" adlı fəsildə qaldı.
Məni tərk etdiyin günümdən başqa,
Hər şeyi unudub yaddaşım daha.
Kədər ağacını suvarmaq üçün,
İçimə süzülür göz yaşım daha.
Sənsizliklə öldüm diri gözünə,
Boğuldum həsrətin yağışlarında.
Öldü uşaq kimi arxanca qaçan
əliboş qayıdan baxışlarım da…
Sənsiz evimiz də mənə bənzəyir.
Qayıt, sənsizliyə dözmürük axı…
Açılmaz tilsimə salmısan bizi,
Məndə qəlb açılmır, bu evdə qapı.
Balaca...
Oxunmur alın yazın qaralıqdan, balaca,
Allah ki ağ yazmışdı alnındakı yazını.
Sənin alın yazını
kim qaraldıb beləcə?
Heç bilmirsən həyat nədir,
Həyat körpə qucağına
nisgil tumu əkir, uşaq.
Ürəyinin dəyirmanı yalnızlığın küləyilə
dərd üyüdür.
Çiyinlərin səndən böyük
dərd yükünü,
söylə, necə daşıyacaq?
"Ah" çəkmisən Yer titrəyib
göydə Allah ağlayıb.
"Yetimlik" sindromu iç evini qurudub.
Dərdlərinin sayını
heç özün də bilmirsən,
Dərdlərinin sayını Allahın da unudub.
Körpə, baxma qapıya!
Baxmaq ağrı-acını üzərinə yeridir.
O qapının qarşısı min cinayət yeridir.
Elə bilmə onlar yalnız səni
atdı bu qapının önünə.
İnan ki, yox...
Onlar səni,
Vicdanını,
Allahını atıb getdi bu qapının önünə!..
© Müəllif hüquqları qorunur! Mətndən istifadə etdikdə istinad mütləqdir!
