AMEA Gəncə Bölməsinin elmi işçisi, filologiya üzrə fəlsəfə doktoru Əlimuxtar Muxtarovun “Qarabağ Azərbaycandır nidasından Şuşa İlinə” kitabı Qırğızıstanın paytaxtı Bişkek şəhərində fəaliyyət göstərən Türkdilli Dövlətlərin Siyasətinə Dəstək Fondunun xətti ilə “Uluu Toolor” nəşriyyatında nəfis şəkildə nəşr edilib.
Alimin beş dildə - Azərbaycan, türk, qırğız, özbək və rus dillərində işıq üzü görən kitabı ölkə başçısının 2022-ci ilin Azərbaycanda "Şuşa İli" elan olunması haqqında Sərəncamından irəli gələn vəzifələrin yerinə yetirilməsinə sanballı ədəbi töhfədir.
AMEA Gəncə Bölməsindən Edebiyyatqazeti.az-a xəbər verildiyi kimi, kitab ölkə başçısı İlham Əliyevin 05 yanvar 2022-ci ili “Şuşa İli” elan etməsi ilə bağlı imzaladığı Sərəncamın Azərbaycan, türk, özbək, qırğız və rus dillərində tərcüməsi ilə başlayır.
Kitabda tarixi zəfərdən sonra qısa zaman kəsiyində Qarabağın hər bir guşəsində, Azərbaycanın mədəniyyət paytaxtı elan edilən Şuşada möhtəşəm quruculuq layihələrinin gercəkləşdiyi qürur hissi ilə qeyd edilir. Qısa müddətdə hazırlanan Baş plana uyğun olaraq Molla Pənah Vaqifin büstünün və muzey-məqbərə kompleksinin öz ilkin görkəminə qaytarılması, Bülbülün ev-muzeyinin əsl sənət məbədinə çevrilməsi, Üzeyir bəyin heykəlinin, eyni zamanda buradakı tarix-mədəniyyət abidələrinin, dini və memarlıq məkanlarının bərpası ölkəmizin mədəniyyət paytaxtındakı kompleks tədbirlərin tərkib hissəsi kimi qeyd edilir, qürurverici tarixi hadisələr adlandırılır.
Bu il türk dövlətləri musiqiçilərinin iştirakı ilə Bişkek və İssık-Kulda “İssık- Kul - Türkün inci dünyası” adlı festival keçiriləcəkdir. Tədbirdə Heydər Əliyev Fondunun vitse-prezidenti Leyla Əliyevanın sözlərinə bəstələnmiş “İssık-Kul” mahnısının təqdimatı nəzərdə tutulur. Festivalda yeni nəşr olunmuş “Qarabağ Azərbaycandır nidasından Şuşa İlinə” kitabı beş türk dövləti oxucularına təqdim olunacaqdır.
Qeyd edək ki, mətni türk dilinə Yusuf Aslan, özbək dilinə Gülzira Şərifova, qırğız dilinə Cumadin Kadırov, rus dilinə isə Aynurə Əmiraslanova tərcümə etmişlər.
© Müəllif hüquqları qorunur! Mətndən istifadə etdikdə istinad mütləqdir!
